လမ်းပိတ်ဆို့ဆန္ဒပြသူများကို ပြတ်ပြတ်သားသား အရေးယူရန် ဘိုလီးဗီးယားသမ္မတ ပြော

ဘိုလီးဗီးယား တနိုင်ငံလုံးမှာ စားနပ်ရိက္ခာ၊ စက်သုံးဆီနဲ့ ဆေးဝါးထောက်ပံ့မှုတွေကို ပြတ်တောက်သွားအောင် လုပ်ခဲ့တဲ့ ရက် ၅၀ ကြာ လမ်းပိတ်ဆို့မှု အကျပ်အတည်းအတွက် တာဝန်ရှိသူတွေကို တရားဥပဒေအရ ပြတ်ပြတ်သားသား အရေးယူပေးဖို့ ဇွန် ၂၄ ရက်က လာပက်ဇ်မြို့မှာ ကျင်းပတဲ့ ရဲတပ်ဖွဲ့ နှစ်ပတ်လည်အခမ်းအနားမှာ ဘိုလီးဗီးယားသမ္မတ ရိုဒရီဂို ပက်ဇ်က တောင်းဆိုလိုက်ပါတယ်။

ထိခိုက်နစ်နာအောင် လုပ်ခဲ့သူတွေကို တရားစီရင်ရေးစနစ်နဲ့ အစိုးရရှေ့နေတွေဘက်က “ပြတ်ပြတ်သားသား အရေးယူဆောင်ရွက်ရမယ်လို့ သမ္မတ ပက်ဇ်က ပြောကြားလိုက်ပြီး တရားဝင် လူမှုရေးဆန္ဒပြမှုနဲ့ ဆန္ဒပြပွဲတွေထဲ စိမ့်ဝင်လာတဲ့ မူးယစ်ဆေးဝါး အကြမ်းဖက်သမားတွေရဲ့ နိုင်ငံရေးအတွေးအခေါ် ကွာခြားချက်တွေကို ခွဲခြားပြောဆိုသွားခဲ့ပါတယ်။

ဒီမိုကရေစီစနစ်မှာ အင်အားသုံးတာဟာ နောက်ဆုံးလက်နက်ပဲ ဖြစ်သင့်တာမို့ အစိုးရအနေနဲ့ အစောပိုင်းမှာ အလောတကြီး အင်အားမသုံးဘဲ ဆွေးနွေးညှိနှိုင်းမှုကိုပဲ စိတ်ရှည်ရှည်နဲ့ ဦးစားပေးခဲ့တာလို့ ရှင်းလင်းခဲ့ပါတယ်။

ဒါ့အပြင် သူ့ရဲ့ ကျန်ရှိနေသေးတဲ့ ၄ နှစ်ကျော် သက်တမ်းအတွင်းမှာ တခြားအဖွဲ့အစည်းတွေက ပိုင်စိုးပိုင်နင်း လုပ်ထားတဲ့ ဘိုလီးဗီးယားနယ်မြေ မှန်သမျှကို နိုင်ငံတော်အချုပ်အခြာအာဏာနဲ့ ဖွဲ့စည်းပုံအခြေခံဥပဒေအောက် ရောက်အောင် ပြန်သိမ်းသွားမယ်လို့လည်း သတိပေးခဲ့ပါတယ်။

သမ္မတ ပက်ဇ်ဟာ နိုင်ငံမှာ အရေးပေါ်အခြေအနေ ကြေညာခဲ့ပြီးနောက် ဘိုလီးဗီးယားနိုင်ငံမှာ လမ်းပိတ်ဆို့မှုတွေကို စတင်ဖယ်ရှားပေးခဲ့ပြီး ရက်ပိုင်းအကြာမှာ ဒီပြောကြားချက် ထွက်ပေါ်လာတာပါ။

အခုအခါမှာတော့ သမ္မတပက်ဇ် ထုတ်ပြန်ထားတဲ့ အရေးပေါ်အခြေအနေကြောင့် လမ်းပိတ်ဆို့မှုတွေ စတင်ပွင့်သွားပြီဖြစ်လို့ အစိုးရက လမ်းပြင်ဆင်ရေးနဲ့ ရှင်းလင်းရေးတွေ ဆက်လုပ်နေပါတယ်။

ဘိုလီးဗီးယားအစိုးရကို ဖြုတ်ချဖို့ ကြိုးပမ်းမှုတွေဟာ နိုင်ငံရဲ့ ဖွဲ့စည်းပုံအခြေခံဥပဒေဆိုင်ရာ အမိန့်အာဏာနဲ့ ဒီမိုကရေစီ တည်ငြိမ်မှုအတွက် “ကြီးမားတဲ့ ခြိမ်းခြောက်မှု” ဖြစ်တယ်လို့ ဇွန် ၂၃ ရက်မှာ အမေရိကန် နိုင်ငံခြားရေးဝန်ကြီးဌာနဟာ အာဂျင်တီးနား၊ ချီလီနဲ့ ပနားမားတို့ အပါအဝင် ဒေသတွင်း အစိုးရ ၁၄ ခုနဲ့အတူ ပူးတွဲပြီး ပြောကြားခဲ့ပါတယ်။

Source: Reuters