ရေကြည်အမတ (၃၄၄) တပ်ရင်းAA နှင့် PDF ထံကျရောက်မည့် အခြေအနေသို့ ဆိုက်ရောက်နေ

“အမတ (၃၄၄) တပ်ရင်းအခြေအနေစိုးရိမ်ရ၍ ဒုတိုင်းမှူးက တိုင်းမှူးထံ လာရောက်တင်ပြဟုဆို”

နိရဉ္စရာ၊ မေ ၁၇/ ၂၀၂၆

ဧရာ၀တီတိုင်း၊ရေကြည်မြို့နယ်၊ငသိုင်းချောင်း-ဂွ လမ်းပေါ်ရှိ အမတ (၃၄၄) တပ်ရင်းသည်အာရက္ခတပ်တော်(AA)နှင့် ပြည်သူ့တော်လှန်ရေးတပ် (PDF) လက်ထဲ ကျရောက်မည့် အခြေအနေသို့ ဆိုက်ရောက်နေသည်ဟုအထူးသတင်းတပ်ဖွဲ့- ပုသိမ်မှ သတင်းဖော်ပြသည်။

၎င်းပြင် အာဏာသိမ်း စစ်တပ်မှ တပ်သားများသည် တပ်ဖျက်ထွက်ပြေးမှုရှိနေဟုလည်း သတင်းတွင် ဖော်ပြထားသည်။

ရေကြည် အမတ (၃၄၄) တပ်ရင်း အခြေအနေစိုးရိမ်ရသည့် အခြေအနေများနှင့်ပတ်သက်၍ မေလ ၁၅ ရက်နေ့ နံနက်ပိုင်းတွင် ဒုတိယစစ်တိုင်းမှူး ရဲလင်းအောင်ကိုယ်တိုင် စစ်သုံး Hilux ကား ၂ စီးဖြင့် နတခ တိုင်းစစ်ဌာနချုပ်သို့ ပြန်လည်ရောက်ရှိလာပြီး၊ နတခတိုင်းမှူး အောင်ကျော်ခိုင်ထံ အရေးပေါ် သွားရောက်တင်ပြခဲ့ကြောင်း တိုင်းစစ်ဌာနချုပ်ရုံးမှ သိရှိရသည်ဟုလည်း သတင်းတွင်ဖော်ပြထားသည်။

၎င်းပြင် လက်ရှိဧရာဝတီတိုင်းအတွင်း စစ်ရေးအခြေအနေမှာအာဏာသိမ်းစစ်တပ်သည်နယ်မြေအများစုကို စွန့်လွှတ်ကာ နောက်ဆုတ်နေရသည့် အခြေအနေနှင့်ရင်ဆိုင်နေရပြီး တပ်တွင်း၌လည်း မကျေလည်မှုများ အကြီးအကျယ် ဖြစ်ပွားနေကြောင်း တပ်တွင်းသတင်း‌ပေးထံမှ သိရသည်ဟုဆိုသည်။

ပုသိမ်အခြေစိုက်အနောက်တောင်တိုင်း စစ်ဌာနချုပ် (နတခ)တွင် တပ်တွင်းသတင်းပေါက်ကြားမှုဖြင့် စစ်မှုထမ်းဟောင်း မိသားစုဝင် ၃ ဦး ဖမ်းဆီးခံရပြီး သတင်းပေးအဖြစ် မတရားစွပ်စွဲထားသည်ဟုသိရသည်။

ပုသိမ်မြို့အခြေစိုက် အနောက်တောင်တိုင်းစစ်ဌာနချုပ် (နတခ) အတွင်း တပ်တွင်းသတင်းများ သတင်းအထူးတပ်ဖွဲ့ထံ ပေါက်ကြားသည်ဟုဆိုကာ တပ်ဝင်းအတွင်း နေထိုင်သည့် စစ်မှုထမ်းဟောင်းများနှင့် ၎င်းတို့၏ မိသားစုဝင် အမျိုးသား ၃ ဦးကို စစ်ဘက်ရေးရာလုံခြုံရေးတပ်ဖွဲ့ (စရဖ) က မေလ ဒုတိယပတ်အတွင်း သတင်းပေးအဖြစ် မတရားစွပ်စွဲ၍ ဖမ်းဆီးသွားကြောင်းဖော်ပြထားသည်။

အထူးသဖြင့် ခလရ (၃၈) တပ်ရင်းမှ တပ်သားများနှင့် တပ်ရင်းမှူး မင်းမင်းထွန်းတို့သည် ရှေ့တန်းမှ ပြန်လည်ဆုတ်ခွာခွင့်မရဘဲ ဆက်လက်ခုခံနေရသည့်အတွက် နောက်တန်းသို့ ပြန်လည်ဝင်ရောက်လိုကြသော်လည်း စစ်တိုင်းမှူး၏ ခြေလျင်၊ ခြေမြန်တပ်ဖွဲ့များအပေါ် ခွဲခြားဆက်ဆံမှုများကြောင့် ပြန်ခွင့်မရဘဲ ဖြစ်နေကြောင်း သိရသည်။