ရန်သူတစ်ဦးတည်းရှိတာတောင် များလွန်းတယ် ဟု အင်ဒိုနီးရှားသမ္မတ ပရာဘိုဝို မကြာခဏ ပြည်ပခရီးစဉ်များအပေါ် ဝေဖန်မှုများကို ပြန်လည်တုံ့ပြန်

ဂျကာတာ - အင်ဒိုနီးရှားသမ္မတ ပရာဘိုဝို ဆူဘီယန်တိုသည် ၎င်း၏ မကြာခဏ ပြည်ပခရီးစဉ်များနှင့် ပတ်သက်၍ ဝေဖန်မှုများကို လတ်တလောလများအတွင်း ဒုတိယအကြိမ်မြောက် ပြန်လည်ချေပပြောဆိုလိုက်သည်။ အဆိုပါခရီးစဉ်များသည် မိတ်ဖက်နိုင်ငံများနှင့် ဆက်ဆံရေးကောင်းမွန်စေရန် ကြိုးပမ်းမှု၏ တစ်စိတ်တစ်ပိုင်းဖြစ်ပြီး အင်ဒိုနီးရှား၏ လွတ်လပ်၍ တက်ကြွသော နိုင်ငံခြားရေးမူဝါဒကို ထင်ဟပ်စေကြောင်း ၎င်းက ဆိုသည်။

သမ္မတ ပရာဘိုဝိုသည် ၎င်းကိုယ်တိုင်နှင့် အင်ဒိုနီးရှားသမ္မတဟောင်း ဂျိုကို “ဂျိုကိုဝီ” ဝီဒိုဒိုတို့ နှစ်ဦးစလုံး ဝေဖန်မှုများနှင့် ရင်ဆိုင်ခဲ့ရကြောင်း၊ ဂျိုကိုဝီမှာ ပြည်ပသို့ “ရှားရှားပါးပါး” သွားရောက်ခြင်းအတွက် ဝေဖန်ခံခဲ့ရပြီး မိမိမှာမူ ခရီးစဉ်များခြင်းအတွက် ဝေဖန်ခံနေရကြောင်း ဒေသတွင်းသတင်းဌာန Antara ၏ ဖော်ပြချက်အရ ဗုဒ္ဓဟူးနေ့ (ဇွန်လ ၁၀ ရက်) တွင် ပြောကြားခဲ့သည်။

“ဂျိုကိုဝီလိုမျိုး ပြည်ပကို သွားရောက်မှုနည်းတဲ့ သမ္မတတစ်ယောက် ရှိခဲ့ပြီး သူလည်း ဝေဖန်ခံခဲ့ရပါတယ်။ ဂျိုကိုဝီက ပြည်ပကို ဘယ်တော့မှ မသွားဘူး၊ နိုင်ငံခြားရေးမူဝါဒကို ဂရုမစိုက်ဘူးလို့ လူတွေက ပြောကြတယ်။ အခု ကျွန်တော်က ပြည်ပကို မကြာခဏ သွားတော့လည်း လူတွေက ကျွန်တော့်ကို ဝေဖန်ကြပြန်တယ်။ တကယ်တော့ ဒါဟာ ပြဿနာမဟုတ်ပါဘူး” ဟု ပရာဘိုဝိုက ပြောသည်။

အသက် ၇၄ နှစ်အရွယ် သမ္မတသည် ရာထူးသက်တမ်း နှစ်နှစ်မပြည့်မီအတွင်း နိုင်ငံပေါင်း ၂၉ နိုင်ငံသို့ ပြည်ပခရီးစဉ် ၅၄ ကြိမ် သွားရောက်ခဲ့ကြောင်း အများပြည်သူဆိုင်ရာ ခရီးသွားမှတ်တမ်းများအရ သိရသည်။ ယင်းအရေအတွက်မှာ ၎င်း၏ ရှေ့တော်ဆက် ဂျိုကိုဝီ၏ ပထမဆုံးနှစ်အတွင်း နိုင်ငံတော်ခရီးစဉ် ၁၆ ကြိမ် သို့မဟုတ် သမ္မတဟောင်း ဆူစီလို ဘမ်ဘန် ယူဒိုယိုနို၏ ပထမဆုံးနှစ်အတွင်း ပြည်ပခရီးစဉ် ၁၀ ကြိမ်ထက် များစွာပိုမိုများပြားနေသည်။

ပရာဘိုဝိုသည် မလေးရှားနိုင်ငံသို့ ငါးကြိမ်တိုင်တိုင် သွားရောက်ခဲ့သည်အပါအဝင် နိုင်ငံအချို့သို့ အကြိမ်ကြိမ် သွားရောက်ခဲ့သည်။ ဝေဖန်သူများကမူ ဤသို့ မကြာခဏ သွားရောက်ခြင်းသည် သံတမန်ရေးရာ ဦးစားပေးများနှင့် ဘဏ္ဍာရေးဆိုင်ရာ ထိရောက်မှုရှိစေရန် ကတိကဝတ်များနှင့် ကိုက်ညီမှုရှိမရှိ မေးခွန်းထုတ်လျက်ရှိသည်။

ဗုဒ္ဓဟူးနေ့တွင် ပရာဘိုဝိုက အင်ဒိုနီးရှား၏ လွတ်လပ်၍ တက်ကြွသော နိုင်ငံခြားရေးမူဝါဒကို ထပ်လောင်းအတည်ပြုပြောကြားခဲ့ပြီး ကမ္ဘာလုံးဆိုင်ရာ ပဋိပက္ခများနှင့် တင်းမာသော ဆက်ဆံရေးများကြောင့် နိုင်ငံအများအပြား ထိခိုက်နေချိန်တွင် နိုင်ငံတည်ထောင်သူများထံမှ အမွေဆက်ခံရရှိထားသည့် အဆိုပါမူဝါဒများသည် အလွန်အရေးပါကြောင်း ပြောကြားခဲ့သည်။

အဆိုပါမူဝါဒ၏ အခြေခံသဘောတရားများသည် အင်ဒိုနီးရှား၏ ဘက်မလိုက်မှုနှင့် နိုင်ငံအားလုံးနှင့် ချစ်ကြည်ရင်းနှီးသော ဆက်ဆံရေးကို ထိန်းသိမ်းထားရန် ကတိကဝတ်များတွင် ထင်ဟပ်နေကြောင်း ၎င်းက ဖြည့်စွက်ပြောကြားသည်။

“မိတ်ဆွေတစ်ထောင်ဆိုတာ နည်းလွန်းပါတယ်။ ရန်သူတစ်ယောက်ဆိုတာ များလွန်းပါတယ်။ ဒါဟာ ကျွန်တော်ရွေးချယ်တဲ့ လမ်းစဉ်ပါပဲ။ ကျွန်တော်ဟာ သမ္မတ ပူတင်နဲ့ ဆက်ဆံရေးကောင်းမွန်သလို သမ္မတ ထရမ့်နဲ့လည်း ဆက်ဆံရေးကောင်းမွန်ပါတယ်” ဟု ရုရှားသမ္မတ ဗလာဒီမာ ပူတင်နှင့် အမေရိကန်သမ္မတ ဒေါ်နယ်ထရမ့်တို့ကို ရည်ညွှန်း၍ ၎င်းက ပြောကြားခဲ့သည်။

“bebas dan aktif” (လွတ်လပ်၍ တက်ကြွသော) ဟု လူသိများသည့် နိုင်ငံခြားရေးမူဝါဒမှာ ၁၉၄၈ ခုနှစ်တွင် ထိုစဉ်က ဒုတိယသမ္မတ မိုဟာမက် ဟတ်တာက စတင်ဖော်ဆောင်ခဲ့သည့် နိုင်ငံ၏ ရေရှည်ဘက်မလိုက်ရေး မူဝါဒဖြစ်သည်။ အဆိုပါမူဝါဒသည် အင်ဒိုနီးရှားနိုင်ငံအနေဖြင့် နိုင်ငံတကာဆက်ဆံရေးတွင် အပြည့်အဝ လွတ်လပ်မှုကို ထိန်းသိမ်းထားရန်နှင့် စစ်ရေးမဟာမိတ်အဖွဲ့များတွင် ပါဝင်ခြင်း သို့မဟုတ် ကမ္ဘာ့အင်အားကြီးနိုင်ငံများ၏ လွှမ်းမိုးမှုအောက်သို့ ရောက်ရှိခြင်းမှ ရှောင်ကြဉ်ရန် အာမခံချက်ပေးထားသည်။