အိုမန်ကမ်းလွန်တွင် မီးလောင်နေသော ရေနံတင်သင်္ဘောမှ သင်္ဘောသားများကို ကယ်ဆယ်နိုင်ခဲ့ကြောင်း အိန္ဒိယပြောကြား

မြူးဘိုင်း- အိုမန်နိုင်ငံ ကမ်းလွန်တွင် မီးလောင်ကျွမ်းနေသည့် ရေနံတင်သင်္ဘောတစ်စင်းပေါ်မှ အိန္ဒိယသင်္ဘောသား ၂၄ ဦးကို အိုမန်အာဏာပိုင်များက တနင်္လာနေ့ (ဇွန်လ ၈ ရက်) တွင် လေကြောင်းမှတစ်ဆင့် ကယ်ဆယ်ခဲ့ကြောင်း နယူးဒေလီရှိ တာဝန်ရှိသူများက ပြောကြားခဲ့သော်လည်း မီးလောင်ရသည့်အကြောင်းရင်းကိုမူ ထုတ်ဖော်ပြောကြားခြင်း မရှိပေ။

"MT Marivex သင်္ဘောပေါ်တွင် လိုက်ပါလာသည့် အိန္ဒိယနိုင်ငံသား သင်္ဘောသား ၂၄ ဦးလုံးကို လျင်မြန်စွာ တုံ့ပြန်ကယ်ဆယ်ပေးပြီး ၎င်းတို့၏ လုံခြုံမှုကို အာမခံပေးခဲ့သည့်အတွက် အိုမန်အာဏာပိုင်များကို ကျေးဇူးတင်ရှိပါသည်" ဟု အိုမန်နိုင်ငံဆိုင်ရာ အိန္ဒိယသံရုံးက လူမှုကွန်ရက်တွင် ထုတ်ပြန်ချက်တစ်ခု၌ ဖော်ပြထားသည်။

အိန္ဒိယနိုင်ငံ ဆိပ်ကမ်း၊ သင်္ဘောနှင့် ရေကြောင်းပို့ဆောင်ရေးဝန်ကြီးဌာနက ပလောင်နိုင်ငံအလံတင် ရေနံတင်သင်္ဘော MT Marivex တွင် မွန်းလွဲ ၁ နာရီခွဲခန့် (စင်ကာပူစံတော်ချိန် ညနေ ၄ နာရီခွဲ) က မီးလောင်မှုဖြစ်ပွားကြောင်း သတင်းရရှိခဲ့သည်ဟု ဆိုသည်။

"MT Marivex သင်္ဘောမှာ မီးလောင်မှုဖြစ်ပွားကြောင်း သတင်းရရှိခဲ့ပြီး အဆိုပါသင်္ဘောပေါ်မှာ အိန္ဒိယသင်္ဘောသား ၂၄ ဦး လိုက်ပါလာခဲ့ပါတယ်... အိန္ဒိယသင်္ဘောသားအားလုံး ဘေးကင်းလုံခြုံပါတယ်" ဟု ဝန်ကြီးဌာန၏ ဒါရိုက်တာ Opesh Kumar Sharma က သတင်းထောက်များကို ပြောကြားခဲ့သည်။

အိန္ဒိယနိုင်ငံ Forward Seamen's Union မှ လူမှုကွန်ရက်တွင် တင်ထားသော ရုပ်ပုံများတွင် သင်္ဘော၏ တံတားနှင့် နေထိုင်ရာအခန်းများမှ အနက်ရောင်မီးခိုးလုံးများ အူထွက်နေစဉ် သင်္ဘောသားများကို ရဟတ်ယာဉ်ဖြင့် ကယ်ဆယ်နေသည်ကို တွေ့မြင်ရသည်။

သင်္ဘောခြေရာခံဝန်ဆောင်မှု MarineTraffic ၏ ဖော်ပြချက်အရ အဆိုပါရေနံတင်သင်္ဘောသည် အိုမန်နိုင်ငံ၏ မြို့တော် မတ်စကတ်မြို့ တောင်ဘက်၊ အိုမန်ကမ်းလွန်တွင် ရှိနေကြောင်း သိရသည်။