ပင်တဂွန်တွင် အန္တရာယ်ရှိသောပစ္စည်းများပေါက်ကွဲမှုဖြစ်ပွားပြီးနောက် မီးသတ်တပ်ဖွဲ့ဝင်များ ရောက်ရှိနေ

အမေရိကန်ကာကွယ်ရေးဝန်ကြီးဌာန တည်ရှိရာ ပင်တဂွန်စစ်ဌာနချုပ်တွင် ဖြစ်ပွားခဲ့သည့် အန္တရာယ်ရှိသော ပစ္စည်းများဆိုင်ရာ ဖြစ်စဉ်တစ်ခုအား မီးသတ်တပ်ဖွဲ့ဝင်များက စုံစမ်းစစ်ဆေးလျက်ရှိကြောင်း တာဝန်ရှိသူများက ပြောကြားသည်။

ကြာသပတေးနေ့က ထုတ်ပြန်သည့် ကြေညာချက်တစ်ခုတွင် ပင်တဂွန်ပြောရေးဆိုခွင့်ရှိသူ Sean Parnell က “ဌာနအနေဖြင့် ထိခိုက်မှုရှိသည့် ဧရိယာအတွင်း နေရာ၌ပင် ခိုလှုံနေထိုင်ရန် အမိန့်ထုတ်ပြန်ခြင်းအပါအဝင် စံသတ်မှတ်ထားသော ကာကွယ်ရေးလုပ်ထုံးလုပ်နည်းများကို ဆောင်ရွက်လျက်ရှိသည်” ဟု ပြောကြားခဲ့သည်။

“ပင်တဂွန်မှာ အဆောက်အအုံနဲ့ အဆောက်အအုံအတွင်းရှိသူတွေရဲ့ လုံခြုံရေးကို အာမခံချက်ပေးနိုင်ဖို့ ခေတ်မီဆန်းပြားတဲ့ စနစ်တွေ တပ်ဆင်ထားပါတယ်” ဟု Parnell က ဆိုသည်။

“အဲဒီစနစ်တွေက လေထုအရည်အသွေးဆိုင်ရာ ပြဿနာတစ်ခုကို စစ်ဆေးတွေ့ရှိခဲ့တာဖြစ်ပြီး၊ အဲဒီပြဿနာရဲ့ အရေးပါမှုကို ကျွန်ုပ်တို့ မဆုံးဖြတ်နိုင်ခင်အထိ ကြိုတင်ကာကွယ်မှုဆိုင်ရာ အစီအမံတွေကို လုပ်ဆောင်နေရတာ ဖြစ်ပါတယ်” ဟု ၎င်းက ဖြည့်စွက်ပြောကြားသည်။

Arlington ကောင်တီ မီးသတ်နှင့် ကယ်ဆယ်ရေးတပ်ဖွဲ့က X လူမှုကွန်ရက်တွင် ရေးသားဖော်ပြရာ၌ “ကျွန်ုပ်တို့၏ အန္တရာယ်ရှိသော ပစ္စည်းများဆိုင်ရာ အဖွဲ့ (Hazardous Materials Team) အပါအဝင် တပ်ဖွဲ့ဝင်များသည် ပင်တဂွန်တွင် ဖြစ်ပွားနေသည့် အန္တရာယ်ရှိသော ပစ္စည်းများဆိုင်ရာ ဖြစ်စဉ်တစ်ခုနှင့် ပတ်သက်၍ PFPA ၏ Hazmat အဖွဲ့အား ကူညီဆောင်ရွက်ပေးလျက်ရှိသည်” ဟု ဖော်ပြထားသည်။

နောက်ထပ်အသေးစိတ်အချက်အလက်များကို ချက်ချင်းရရှိနိုင်ခြင်း မရှိသေးပေ။

စတုရန်းမီတာ ၆၀၀,၀၀၀ ကျယ်ဝန်းသည့် ပင်တဂွန်သည် ကမ္ဘာ့အကြီးဆုံး အနိမ့်ထပ်ရုံးခန်း အဆောက်အအုံဖြစ်သည်။ အဆိုပါ အဆောက်အအုံတွင် စစ်ဘက်နှင့် အရပ်ဘက် ဝန်ထမ်းပေါင်း ၃၀,၀၀၀ နီးပါး နေ့စဉ် တာဝန်ထမ်းဆောင်လျက်ရှိသည်။

ဆက်လက်ဖော်ပြပါမည်...