ရမှတ်မရရှိခဲ့သော မိုနာကိုပြိုင်ပွဲအပြီး ရပ်ဆဲလ်၏ ချန်ပီယံဆုမျှော်လင့်ချက်များ ထိုးကျသွား

မိုနာကို၊ ဇွန် ၇ - Mercedes အသင်းမှ ကားမောင်းသမား ဂျော့ချ် ရပ်ဆဲလ်၏ F1 ချန်ပီယံဆုအတွက် မျှော်လင့်ချက်မှာ တနင်္ဂနွေနေ့က ကျင်းပခဲ့သည့် မိုနာကို ဂရင်းပရီပြိုင်ပွဲတွင် Drive-through ပြစ်ဒဏ်ကြောင့် အမှတ်ပေးဇယားတွင် ပါဝင်နိုင်ခြင်းမရှိဘဲ နှစ်ပွဲဆက်တိုက် ထိုးနှက်ချက်ခံခဲ့ရသည်။

ရပ်ဆဲလ်သည် ပစ်လေန် (pit lane) အတွင်း အရှိန်လွန်မောင်းနှင်မှုကြောင့် ကနဦးတွင် ငါးစက္ကန့် အချိန်ဖြတ်တောက်ခံရသည့် ပြစ်ဒဏ်ကို ရရှိခဲ့သည်။ ၎င်း၏အသင်းဖော် ကီမီ အန်တိုနယ်လီ အနိုင်ရရှိခဲ့သည့် ယခုပြိုင်ပွဲတွင် အဆိုပါပြစ်ဒဏ်ကို ရရှိခဲ့သည့် ကားမောင်းသမား ငါးဦးအနက် ရပ်ဆဲလ်လည်း တစ်ဦးအပါအဝင်ဖြစ်သည်။

ထို့နောက် ၎င်းသည် ပစ်စတော့ (pit stop) ပြုလုပ်ချိန်တွင် ငါးစက္ကန့် အချိန်ဖြတ်တောက်ခံရသည့် ပြစ်ဒဏ်ကို လိုက်နာဆောင်ရွက်ခြင်းမရှိသဖြင့် Drive-through ပြစ်ဒဏ်ကို ထပ်မံချမှတ်ခံခဲ့ရသည်။

အလံနီပြသပြီးနောက် ပြိုင်ပွဲကို ပြန်လည်စတင်ချိန်တွင် နောက်ဆုံးပတ်များ၌ အဆိုပါပြစ်ဒဏ်ကို မဖြစ်မနေ ခံယူခဲ့ရသဖြင့် ရပ်ဆဲလ်မှာ အဆင့်များစွာ ကျဆင်းသွားခဲ့ပြီး ပြိုင်ပွဲကို အဆင့် ၁၃ ဖြင့်သာ အဆုံးသတ်ခဲ့ရသည်။

ကနေဒါ ဂရင်းပရီပြိုင်ပွဲမှ နုတ်ထွက်ခဲ့ရပြီးနောက် ယခု မိုနာကိုပြိုင်ပွဲတွင်လည်း စိတ်ပျက်ဖွယ်ရလဒ်များ ထွက်ပေါ်ခဲ့သဖြင့် ရပ်ဆဲလ်သည် ကားမောင်းသမားများ၏ အမှတ်ပေးဇယားတွင် Ferrari အသင်းမှ လူးဝစ် ဟာမီလ်တန်၏နောက် တတိယနေရာသို့ ကျဆင်းသွားခဲ့ပြီး အန်တိုနယ်လီထက် ၆၈ မှတ်အထိ နောက်ကောက်ကျနေပြီဖြစ်သည်။

"ပထမဆုံးအနေနဲ့ ကျွန်တော် ဘာကြောင့် ပြစ်ဒဏ်ရသလဲဆိုတာ သေချာမသိပါဘူး၊ ဘာလို့လဲဆိုတော့ ကျွန်တော် လိုင်းမဖြတ်ခင်ကတည်းက ပစ်လေန် အရှိန်ထိန်းစနစ် (pit limiter) ကို သုံးထားလို့ပါ" ဟု ၎င်း၏ ကနဦးပြစ်ဒဏ်နှင့် ပတ်သက်၍ ပြောကြားခဲ့သည်။ "လိုင်းဖြတ်ပြီးမှပဲ ကျွန်တော် အရှိန်ထိန်းစနစ်ကို ပိတ်ခဲ့တာပါ။ ဒါပေမဲ့ ဆော့ဖ်ဝဲမှာ ပြဿနာတစ်ခုခုရှိနေတာ သေချာပြီး ကားမောင်းသမား အတော်များများလည်း ပြစ်ဒဏ်တွေ ရခဲ့ကြပါတယ်။"

"ပြီးတော့ ပစ်စတော့မှာလည်း အကြီးအကျယ် ရှုပ်ထွေးမှုတွေ ဖြစ်ခဲ့ပြီး Drive-through ပြစ်ဒဏ်ရခဲ့တာဟာ ကျူးလွန်တဲ့အမှားနဲ့ ပြစ်ဒဏ်က မမျှတပါဘူး။"

"ဘာပြောရမှန်းတောင် မသိတော့ပါဘူး။ နှစ်ပွဲဆက်တိုက် ဖြစ်နေတာပါ - ပြီးခဲ့တဲ့အပတ်က ပြိုင်ပွဲကို အနိုင်ရနိုင်ခဲ့သလို ဒီနေ့လည်း အဆင့် ၃ သို့မဟုတ် ၄ လောက် ရနိုင်ခဲ့ပါတယ်။ ကျွန်တော့်ထိန်းချုပ်မှုအပြင်ဘက်က အကြောင်းအရာတွေကြောင့် အမှတ်ပေါင်း ၄၀ လောက် ဆုံးရှုံးခဲ့ရတာပါ" ဟု ၎င်းက ဆိုသည်။

ပစ်လေန်အတွင်း အရှိန်လွန်မောင်းနှင်မှုကြောင့် ပြစ်ဒဏ်ခံရသူမှာ ရပ်ဆဲလ်တစ်ဦးတည်း မဟုတ်ပေ။ ဒုတိယနေရာရရှိခဲ့သည့် ဟာမီလ်တန်သည်လည်း ၎င်း၏ ပစ်စတော့တွင် ငါးစက္ကန့် ပြစ်ဒဏ်ကို ခံယူခဲ့ရသော်လည်း ၎င်း၏ ပြိုင်ပွဲရလဒ်ကို ထိခိုက်မှုမရှိခဲ့ပေ။

Alpine အသင်းမှ ပီယာ ဂက်စ်လီအတွက်မူ ထိုသို့မဟုတ်ခဲ့ပေ။ ၎င်းသည် အဆိုပါပြစ်ဒဏ်အတွက် နှစ်ကြိမ်တိုင်တိုင် အရေးယူခံခဲ့ရပြီး ပြိုင်ပွဲပြန်လည်စတင်ပြီးနောက် အဆင့် ၃ ဖြင့် အဆုံးသတ်နိုင်ခဲ့သော်လည်း ၁၀ စက္ကန့် ပြစ်ဒဏ်ကြောင့် အဆင့် ၇ သို့ ကျဆင်းသွားခဲ့ရသည်။