တယ်လီဂရမ်အသုံးပြုမှုကို ခေတ္တပိတ်ပင်ထားသည့် အိန္ဒိယအစိုးရ၏ အမိန့်ကို တယ်လီဂရမ်က ကန့်ကွက်

နယူးဒေလီ၊ ဇွန် ၁၇ - စာမေးပွဲမသမာမှုများကို တားဆီးရန်အတွက် အိန္ဒိယအစိုးရက ပလက်ဖောင်းအသုံးပြုမှုကို ယာယီပိတ်ပင်ထားသည့် အမိန့်ကို ဆန့်ကျင်၍ Messaging app တစ်ခုဖြစ်သော Telegram က နယူးဒေလီတရားရုံးတွင် အယူခံဝင်ထားကြောင်း တရားရေးဆိုင်ရာ သတင်းဝက်ဘ်ဆိုက်တစ်ခုက ဗုဒ္ဓဟူးနေ့တွင် ဖော်ပြခဲ့သည်။

မေးခွန်းလွှာများကို ကြိုတင်ရရှိထားသည်ဟု အခိုင်အမာပြောဆိုနေသည့် လိမ်လည်လှည့်ဖြားသော ချန်နယ်များကို ထိန်းချုပ်ရန်အတွက် အဆိုပါ App ကို ပိတ်ပင်လိုက်သည့် ထူးခြားသော အမိန့်မှာ အင်္ဂါနေ့မှစတင်၍ အသက်ဝင်ခဲ့သော်လည်း ယင်းကဲ့သို့ အလုံးစုံပိတ်ပင်မှုအပေါ် သဘောထားကွဲလွဲမှုများ ဖြစ်ပေါ်လျက်ရှိသည်။

Telegram ၏ ရှေ့နေများသည် ဗုဒ္ဓဟူးနေ့တွင် ဒေလီအထက်တရားရုံးရှိ တရားသူကြီးတစ်ဦးထံ၌ ၎င်းတို့၏ အယူခံဝင်မှုကို တင်ပြခဲ့ပြီး တရားသူကြီးက Telegram ၏ အယူခံလွှာကို မကြာမီ လက်ခံစစ်ဆေးရန် သဘောတူညီခဲ့ကြောင်း ဒေသတွင်း မီဒီယာသတင်းများက ဖော်ပြသည်။

Telegram ဘက်မှ Reuters ၏ မှတ်ချက်ပေးရန် တောင်းဆိုချက်ကို ချက်ချင်းတုံ့ပြန်ခြင်း မရှိသေးပေ။

Telegram တည်ထောင်သူ Pavel Durov က ဗုဒ္ဓဟူးနေ့တွင် အဆိုပါပိတ်ပင်မှုသည် မေးခွန်းပေါက်ကြားမှုကို တားဆီးရာတွင် ထိရောက်မှုရှိမရှိကို မေးခွန်းထုတ်ခဲ့ပြီး ယင်းသည် "စာမေးပွဲအကြောင်းအရာများကို ပေါက်ကြားစေခဲ့သည့် အတွင်းလူများ" အတွက်မဟုတ်ဘဲ Telegram ကို အသုံးပြုနေသည့် အိန္ဒိယနိုင်ငံသား သန်း ၁၅၀ အတွက်သာ ပြစ်ဒဏ်တစ်ခုဖြစ်ကြောင်း ပြောကြားခဲ့သည်။

ပြီးခဲ့သည့်လက အိန္ဒိယအစိုးရသည် ဆေးတက္ကသိုလ်ဝင်ခွင့်အတွက် အဓိကကျသော စာမေးပွဲတစ်ခုကို ဖျက်သိမ်းခဲ့ပြီးနောက် အာဏာပိုင်များက မေးခွန်းများပေါက်ကြားခဲ့သည်ဆိုသော စွပ်စွဲချက်များကို စုံစမ်းစစ်ဆေးနေကြောင်း ပြောကြားခဲ့သည်။

ကျောင်းသား ၂.၃ သန်း ဖြေဆိုသည့် အဆိုပါ ဆေးတက္ကသိုလ်ဝင်ခွင့် စာမေးပွဲ၏ မေးခွန်းလွှာပေါက်ကြားမှုဟု စွပ်စွဲခံထားရသည့် ဖြစ်စဉ်ကြောင့် အိန္ဒိယနိုင်ငံ၏ နေရာအသီးသီးတွင် ဆန္ဒပြမှုများ ဖြစ်ပေါ်ခဲ့ပြီး အိန္ဒိယပညာရေးဝန်ကြီး Dharmendra Pradhan ၏ ရာထူးမှ နုတ်ထွက်ပေးရန် တောင်းဆိုမှုများလည်း ရှိခဲ့သည်။

Telegram အပေါ် ကန့်သတ်ချက်ကို "အိန္ဒိယနိုင်ငံ၏ အချုပ်အခြာအာဏာနှင့် နယ်မြေပိုင်နက် တည်တံ့ခိုင်မြဲရေးအတွက်" အင်တာနက်အက်ပ်များကို ပိတ်ပင်ခွင့်ပြုထားသည့် အိန္ဒိယသတင်းအချက်အလက်နည်းပညာ (IT) ဥပဒေပါ ပြဋ္ဌာန်းချက်အရ ထုတ်ပြန်ခဲ့ခြင်းဖြစ်သည်။