ကျောက်ဖြူတွင် အရပ်သား ဘုတ်တစ်စီးအား အာဏာသိမ်းစစ်တပ်မှ စပိဘုတ်ဖြင့် လာရောက်ပစ်ခတ်၍ ဒေသခံ ၂ ဦးဒဏ်ရာရ

နိရဉ္စရာ၊ ဇွန် ၈/ ၂၀၂၆

ရခိုင်ပြည်၊ ကျောက်ဖြူမြို့နယ်တွင် ဝက်တင်ဆောင်လာသည့်မော်တော်ဘုတ်တစ်စီးအား အာဏာသိမ်းစစ်တပ်နေဗီတစ်စီးမှ အမြန်ရေယာဉ်ငယ် စပိဘုတ်ဖြင့် နောက်ကနေ လာရောက်ပစ်ခတ်၍ ဒေသခံ ၂ ဦးဒဏ်ရာရရှိသွားကြောင်း သတင်းရရှိသည်။

ဒဏ်ရာရရှိသွားသူများမှာ အမ်းမြို့နယ်၊ စိတ္တရရွာမှ မောင်ဘတ်ပေ (၁၅) နှစ်နှင့် ဦးမောင်ဟန် (၅၂) နှစ်တို့ဖြစ်ကြောင်း သိရှိရသည်။

လူ ၃ ဦးလိုက်ပါလာသော အဆိုပါဘုတ်အား ဇွန်လ ၇ ရက် နံနက် ၉ နာရီအချိန်ခန့်တွင် ကျောက်ဖြူမြို့နယ်၊ သံဇစ်မြစ်ထဲအရောက်တွင်စပိဘုတ်ဖြင့် မောင်းနှင်လာပြီး စက်သေနတ်ဖြင့် ပစ်ခတ်ခဲ့သည်ဟု သိရသည်။

“ ဒီမော်တော်ဘုတ်က ရမ်းဗြဲမြို့နယ်၊ မင်းကြောင်းတံတားဖက်ကနေအိမ်မွေးဝက်တွေကိုတင်ပြီးပြန်လာစဉ်မှာကျောက်ဖြူမြို့နယ်၊ အောင်လံချိန်ရွာအောက်ဖက်သံဇစ်မြစ်ထဲမှာရပ်ထားတဲ့ နေဗီကနေ စပိဘုတ်တစ်စီး မောင်းနှင်လိုက်ပါလာပြီးနောက်ကနေ စက်သေတွေနဲ့ပစ်ခတ် သွားခဲ့တာ ဖြစ်ပါတယ်” ဟု ဒေသခံတဦးက ပြောသည်။

ထိုသို့အရပ်သား မော်တော်ဘုတ်အား အကြမ်းဖက် ပစ်ခတ်မှုကြောင့် ဘုတ်ပေါ်တွင်လိုက်ပါလာသော ဦးမောင်ဟန်၏ ခြေသလုံးနှစ်ဖက်၌ကျည်ဖောက်ထွက်သွားခဲ့ပြီးမောင်ဘတ်ပေ၏ ညာဖက်လက်မောင်းအောက်ညှပ်ရိုးနားတွင်ကျည်ထိမှန်ကာ ဒဏ်ရာများ ပြင်းပြင်းထန်ထန် ရရှိသွားခဲ့သည်ဟုသိရသည်။

၎င်းမော်တော်ဘုတ်ပေါ်တွင်ဦးမောင်ဆန်းနွယ်၊  ဦမောင်ဟန်နှင့်မောင်ဘတ်ပေတို့၃ ဦးလိုက်ပါလာပြီး ဦးမောင်ဆန်းနွယ်တွင် တစ်စုံတစ်ရာ ထိခိုက်ဒဏ်ရာရရှိခြင်း မရှိဟု သိရသည်။

လက်ရှိတွင် ဒဏ်ရာရရှိသွားသူများအားဆေးကုသမှုခံယူလျက်ရှိကြောင်း၎င်းဒေသခံက ပြောကြားသည်။

အာဏာသိမ်းစစ်တပ်သည် ကျောက်ဖြူစစ်မျက်နှာတွင် သူတို့မျှော်လင့်ထားသလို စစ်ဆင်ရေးများ အောင်မြင်မှုမရရှိဘဲ အရှုံးနှင့် ရင်ဆိုင်နေရရာမှ ဒေသခံ ရခိုင်ပြည်သူများအား အငြိုးအတေးဖြင့် လက်စားချေ ပစ်ခတ်သတ်ဖြတ်မှုများပြုလုပ်နေသလို လူနေကျေးရွာများအား ဗုံးကြဲတိုက်ခိုက် မီးရှို့မှုများကို အဆက်မပြတ် ပြုလုပ်လျှက် ရှိနေကြောင်း သိရှိရသည်။