ပါရာဂွေးကစားသမား အယ်လ်မီရွန် ဖီဖာ၏ ပါးစပ်အုပ်ထားခြင်းဆိုင်ရာ စည်းမျဉ်းသစ်အရ အထုတ်ခံရ

ဆန်တာကလာရာ - ပါရာဂွေးကစားသမား မီဂွယ် အယ်လ်မီရွန် (Miguel Almiron) သည် သောကြာနေ့ (ဇွန်လ ၁၉ ရက်) က ကွင်းအတွင်း အငြင်းပွားမှုဖြစ်ပွားစဉ် ပါးစပ်ကို လက်ဖြင့်အုပ်ထားခဲ့သည့်အတွက် ဖီဖာ (FIFA) ၏ စည်းမျဉ်းသစ်အရ အနီကတ်ပြ ထုတ်ပယ်ခံရသည့် ပထမဆုံးသော ကစားသမားအဖြစ် မလိုလားအပ်သည့် ဘောလုံးသမိုင်းမှတ်တမ်းတစ်ခုကို ရေးထိုးခဲ့သည်။

နယူးကာဆယ်အသင်း၏ ကစားသမားဟောင်း အယ်လ်မီရွန်သည် ဆန်တာကလာရာ၊ ကယ်လီဖိုးနီးယား၌ ကျင်းပသည့် ကမ္ဘာ့ဖလား အုပ်စု (D) ပွဲစဉ်တွင် တူရကီအသင်းမှ မာ့တ် မူလ်ဒူ (Mert Muldur) အား တစ်စုံတစ်ရာ ပြောကြားနေစဉ် ပါးစပ်ကို လက်ဖြင့်အုပ်ထားခဲ့သည့်အတွက် ပထမပိုင်း နာကျင်အချိန်ပိုတွင် ကွင်းမှ ထုတ်ပယ်ခံခဲ့ရခြင်းဖြစ်သည်။

VAR ပြန်လည်စစ်ဆေးပြီးနောက် အယ်လ်မီရွန် ထုတ်ပယ်ခံရချိန်တွင် ပါရာဂွေးအသင်းက ၁-၀ ဂိုးဖြင့် ဦးဆောင်နေခဲ့သည်။

ကစားသမားများအနေဖြင့် ပြိုင်ဘက်များနှင့် အငြင်းပွားမှုဖြစ်ပွားစဉ် ပါးစပ်ကို လက်ဖြင့်အုပ်ထားပါက အနီကတ်ပြ အရေးယူမည်ဖြစ်ကြောင်း ဖီဖာက ဧပြီလတွင် ကြေညာခဲ့သည်။

ယခုကမ္ဘာ့ဖလားတွင် စတင်ကျင့်သုံးနေသည့် အဆိုပါလုပ်ဆောင်ချက်သည် လူမျိုးရေးခွဲခြားမှုကို တိုက်ဖျက်ရန် ပိုမိုကျယ်ပြန့်သော ကြိုးပမ်းမှု၏ တစ်စိတ်တစ်ပိုင်းဖြစ်ကြောင်း ဖီဖာက ပြောကြားခဲ့သည်။

ယခုစည်းမျဉ်းသစ်သည် ယခုနှစ်အစောပိုင်းက ချန်ပီယံလိဂ်ပွဲစဉ်တစ်ခုတွင် ဘင်ဖီကာအသင်း၏ တောင်ပံကစားသမား ဂျီယန်လူကာ ပရက်စ်တီယာနီ (Gianluca Prestianni) က ရီးရဲလ်မက်ဒရစ်ကြယ်ပွင့် ဗီနီစီယပ်စ် ဂျူနီယာ (Vinicius Junior) အား လူမျိုးရေးအရ စော်ကားခဲ့သည်ဟု စွပ်စွဲခံခဲ့ရသည့် အငြင်းပွားမှုနောက်ပိုင်း ပေါ်ပေါက်လာခြင်းဖြစ်သည်။

ပရက်စ်တီယာနီက ဗီနီစီယပ်စ်အား လူမျိုးရေးအရ စော်ကားခဲ့ခြင်းမရှိကြောင်း ငြင်းဆိုခဲ့သော်လည်း နောက်ပိုင်းတွင် "လိင်စိတ်တိမ်းညွတ်မှုဆိုင်ရာ အပြုအမူ" ကြောင့် ပွဲပယ် ၆ ပွဲ (၃ ပွဲမှာ ဆိုင်းငံ့) ချမှတ်ခံခဲ့ရသည်။

ဖီဖာဥက္ကဋ္ဌ ဂျီယန်နီ အင်ဖန်တီနို (Gianni Infantino) သည် အဆိုပါဥပဒေသစ်ကို ထောက်ခံအားပေးသူတစ်ဦးဖြစ်သည်။

"သင်ဟာ ဖုံးကွယ်စရာတစ်ခုခုမရှိဘူးဆိုရင် တစ်စုံတစ်ရာပြောတဲ့အခါ ပါးစပ်ကို ဖုံးကွယ်ထားစရာမလိုပါဘူး။ ဒါပါပဲ၊ အရမ်းရိုးရှင်းပါတယ်" ဟု အင်ဖန်တီနိုက မတ်လတွင် ပြောကြားခဲ့သည်။