# အလုပ်သမားပါတီ (WP) က ဇွန် ၂၈ တွင် အထူးကေဒါညီလာခံ ကျင်းပမည်၊ ပါတီအကြီးအကဲအဖြစ်မှ ပရီတန်ဆင်းဂ် (Pritam Singh) ကို ဖယ်ရှားရေး အစီအစဉ်တွင် ထည့်သွင်းထား

စင်ကာပူ၊ ဇွန် ၂

စင်ကာပူ အလုပ်သမားပါတီ (Workers' Party - WP) ၏ အထွေထွေအတွင်းရေးမှူးအဖြစ် ပရီတန်ဆင်းဂ် (Pritam Singh) ၏ ရှေ့ဆက်မည့်အလားအလာကို လာမည့် ဇွန် ၂၈ ရက်တွင် ကျင်းပမည့် အထူးကေဒါညီလာခံ (Special Cadres Conference) ၌ ဆွေးနွေးဆုံးဖြတ်သွားမည်ဖြစ်ပြီး၊ ၎င်းအနေဖြင့် ရာထူးမှ နှုတ်ထွက်ပေးရန် ငြင်းဆန်ပါက ရာထူးတွင် ဆက်ထားရှိရန် ရှိ၊ မရှိကို လျှို့ဝှက်မဲခွဲဆုံးဖြတ်ခြင်း ခံရမည်ဖြစ်ကြောင်း CNA သတင်းဌာနက စုံစမ်းသိရှိရသည်။

ကေဒါအဖွဲ့ဝင်များထံ ပေးပို့ထားသည့် သတိပေးအကြောင်းကြားစာအရ ယခုအထူးညီလာခံကို "ကေဒါအဖွဲ့ဝင် ၂၅ ဦး၏ တောင်းဆိုချက်အရ" ကျင်းပရခြင်းဖြစ်ကြောင်း ဖော်ပြထားသည်။

ယခုနှစ်အစောပိုင်းက ပါတီ၏ ဗဟိုအလုပ်အမှုဆောင်ကော်မတီ (CEC) သည် ပရီတန်ဆင်းဂ်အား လွှတ်တော်အခွင့်အရေးကော်မတီသို့ လိမ်လည်ထွက်ဆိုခဲ့မှုကြောင့် တရားရုံးက ပြစ်ဒဏ်ချမှတ်ခဲ့ခြင်းအပေါ် ပါတီတွင်း စည်းကမ်းထိန်းသိမ်းရေးဆိုင်ရာ လုပ်ငန်းစဉ်များအပြီးတွင် သတိပေးနှုတ်ပိတ်စာ (Letter of Reprimand) တစ်စောင် ထုတ်ပြန်ခဲ့ဖူးသည်။

ကေဒါများထံ ပေးပို့သော အကြောင်းကြားစာတွင် ယခုလနှောင်းပိုင်း၌ ပြုလုပ်မည့် အစည်းအဝေးအတွက် အစီအစဉ် ၃ ရပ်ကို ချပြထားသည်။

• ပထမအချက်အနေဖြင့် စင်ကာပူတရားလွှတ်တော်ချုပ်၏ စီရင်ချက်အရ လွှတ်တော်အခွင့်အရေးကော်မတီကို လိမ်လည်ထွက်ဆိုမှုဖြင့် ပြစ်ဒဏ်အတည်ပြုခံထားရသည့် စွဲချက်များနှင့် ပတ်သက်၍ ပရီတန်ဆင်းဂ်က ကေဒါအဖွဲ့ဝင်များထံ ရှင်းလင်းတင်ပြရန် (Account to cadre members) ဖြစ်သည်။

• ဒုတိယအချက်အနေဖြင့် ပါတီ၏ ဖွဲ့စည်းပုံအခြေခံဥပဒေ ပုဒ်မ ၃၀ ဖြစ်သော "ပါတီနှင့် စင်ကာပူပြည်သူလူထုအပေါ် ဆက်ဆံရာတွင် ရိုးသားဖြောင့်မတ်ပြီး ပွင့်လင်းမြင်သာမှု ရှိရမည်" ဟူသော ပြဋ္ဌာန်းချက်ကို ဖောက်ဖျက်ခဲ့သည့်အတွက် ပရီတန်ဆင်းဂ်အနေဖြင့် အထွေထွေအတွင်းရေးမှူး ရာထူးမှ ချက်ချင်းနှုတ်ထွက်ပေးရန် ကေဒါများက တောင်းဆိုထားသည်။

• တတိယအချက်အနေဖြင့် အကယ်၍ ပရီတန်ဆင်းဂ်က ရာထူးမှ နှုတ်ထွက်ခြင်းမပြုပါက ၎င်းအား အထွေထွေအတွင်းရေးမှူးအဖြစ် ဆက်လက်ထားရှိခြင်း ရှိ၊ မရှိကို ကေဒါများက "လျှို့ဝှက်မဲခွဲဆုံးဖြတ်ခြင်း" (Secret vote) ပြုလုပ်သွားမည် ဖြစ်သည်။

မွန်းတည့် ၁၂ နာရီတွင် ကျင်းပမည့် အဆိုပါ အထူးကေဒါညီလာခံ၏ သဘာပတိအဖြစ် WP ပါတီ၏ မူဝါဒသုတေသနအကြီးအကဲ ဂျရတ်ဂီယမ် (Gerald Giam) က ဆောင်ရွက်မည်ဖြစ်သည်။

ထို့အပြင် ၎င်းနေ့ မွန်းလွဲ ၃ နာရီတွင် ပါတီ၏ နှစ်ပတ်လည် ပုံမှန်ကေဒါအဖွဲ့ဝင်များညီလာခံ (Ordinary Cadre Members' Conference) ကို ဆက်လက်ကျင်းပမည်ဖြစ်ပြီး၊ ထိုညီလာခံတွင် ပါတီ၏ အထွေထွေအတွင်းရေးမှူး၊ ဥက္ကဋ္ဌနှင့် အမြင့်ဆုံးဆုံးဖြတ်ချက်ချမှတ်ပိုင်ခွင့်ရှိသော ဗဟိုအလုပ်အမှုဆောင်ကော်မတီ (CEC) အတွက် အဖွဲ့ဝင် ၁၂ ဦးကို ကေဒါများက ရွေးချယ်တင်မြှောက်ကြမည် ဖြစ်သည်။

ယခင် ဗဟိုအလုပ်အမှုဆောင်ကော်မတီ (CEC) ရွေးကောက်ပွဲ သုံးကြိမ်ကို ၂၀၂၀ ပြည့်နှစ် ဒီဇင်ဘာလ၊ ၂၀၂၂ ခုနှစ် နိုဝင်ဘာလနှင့် ၂၀၂၄ ခုနှစ် ဇွန်လတို့တွင် ကျင်းပခဲ့သည်။

အဆိုပါကိစ္စနှင့် ပတ်သက်၍ CNA သတင်းဌာနက ဆက်သွယ်မေးမြန်းရာတွင် အလုပ်သမားပါတီ (WP) က တစ်စုံတစ်ရာ မှတ်ချက်ပေးရန် ငြင်းဆိုခဲ့သည်။