အယ်လ်နီညို ရာသီဥတုဖြစ်စဉ် စတင်ဖြစ်ပေါ်နေပြီဟု အမေရိကန်အေဂျင်စီက ပြောကြား

"သေမင်းတမန် အချက်ပေးသံ"

ဥရောပသမဂ္ဂ၏ ကိုပါးနီးကပ်စ် ရာသီဥတုပြောင်းလဲမှုဆိုင်ရာ ဝန်ဆောင်မှုဌာန (Copernicus Climate Change Service) က ယခုနှစ်နှောင်းပိုင်းတွင် အလွန်ပြင်းထန်သော အယ်လ်နီညို (El Nino) ရာသီဥတုဖြစ်စဉ်တစ်ခု ဖြစ်ပေါ်လာနိုင်ခြေ ပိုမိုများပြားလာကြောင်း ဗုဒ္ဓဟူးနေ့တွင် ပြောကြားခဲ့သည်။

"လက်ရှိအခြေအနေအရ အလယ်အလတ်မှ ပြင်းထန်သည့်အဆင့်၊ သို့မဟုတ် ဖြစ်နိုင်ခြေရှိသည်မှာ ပြင်းထန်သည့်အဆင့်မှသည် စံချိန်တင်အဆင့်အထိ ရောက်ရှိသွားနိုင်သည့် ဖြစ်စဉ်တစ်ခု ဖြစ်လာဖို့ အလားအလာ အလွန်များနေပါတယ်" ဟု အဆိုပါဌာန၏ ဒါရိုက်တာ Carlo Buontempo က AFP သတင်းဌာနသို့ ပြောကြားခဲ့သည်။

NOAA ၏ ခန့်မှန်းချက်နှင့် ပတ်သက်၍ နိုင်ရိုဘီအခြေစိုက် ရာသီဥတုနှင့် စွမ်းအင်ဆိုင်ရာ သုတေသနအဖွဲ့ Power Shift Africa ၏ ဒါရိုက်တာ Mohamed Adow က ကမ္ဘာတစ်ဝန်းရှိ သန်းပေါင်းများစွာသော လူများအတွက် "ဒါဟာ ရိုးရိုးရာသီဥတု ခန့်မှန်းချက်တစ်ခုမျှသာ မဟုတ်ဘဲ ကြောက်ရွံ့ရမည့် သေမင်းတမန် အချက်ပေးသံတစ်ခု ဖြစ်ပါတယ်" ဟု ဆိုသည်။

"ဒါဟာ မိုးခေါင်ရေရှားမှု၊ သီးနှံများ ပျက်စီးမှု၊ စားနပ်ရိက္ခာဈေးနှုန်းများ မြင့်တက်လာမှုနဲ့ မိသားစုများ ထပ်မံ၍ အတိဒုက္ခရောက်ရမည့် အခြေအနေကို ဆိုလိုတာဖြစ်ပါတယ်"

ယခုလအစောပိုင်းက ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်က လာမည့်ပြင်းထန်သော ရာသီဥတုအခြေအနေကို "အရေးပေါ် ရာသီဥတုဆိုင်ရာ သတိပေးချက်တစ်ခုအဖြစ်" သဘောထားကြရန် ကမ္ဘာ့နိုင်ငံများကို တိုက်တွန်းခဲ့သည်။

"အယ်လ်နီညို အခြေအနေတွေဟာ ပူနွေးလာနေတဲ့ ကမ္ဘာကြီးအတွက် မီးလောင်ရာလေပင့် ဖြစ်စေပါလိမ့်မယ်" ဟု ၎င်းက ပြောကြားခဲ့သည်။

"တစ်ခုတည်းသော ထိရောက်တဲ့ တုံ့ပြန်မှုကတော့ ဒီအကျပ်အတည်းနဲ့ ထိုက်တန်တဲ့ ရာသီဥတုဆိုင်ရာ လုပ်ဆောင်ချက်တွေပဲ ဖြစ်ပါတယ်။ ရုပ်ကြွင်းလောင်စာဆီအပေါ် မှီခိုနေမှုကို အဆုံးသတ်ဖို့၊ ပြန်လည်ပြည့်ဖြိုးမြဲစွမ်းအင်သို့ ကူးပြောင်းမှုကို အရှိန်မြှင့်တင်ဖို့၊ အထိခိုက်လွယ်ဆုံးသူတွေကို ကာကွယ်ပေးဖို့နဲ့ လူတိုင်းအတွက် ကြိုတင်သတိပေးစနစ်တွေကို ပံ့ပိုးပေးဖို့ လိုအပ်ပါတယ်"