နွေဦးတော်လှန်ရေး နေ့စဉ်မှတ်စု (၈ ဇွန် ၂၀၂၆ ) - BUR.MIZZIMA.COM

အမျိုးသားညီညွတ်ရေး အစိုးရ

-ရှမ်းပြည်နယ်တောင်ပိုင်း၊ အင်းလေးဒေသတွင် အင်းလေးပြည်သူ့ကာကွယ်ရေးတပ်ဖွဲ့ (IPDF) မှ ရဲဘော်နှစ်ဦး စစ်အုပ်စုတပ်၏ ဖမ်းဆီးခံထားရ၍ ဆက်နွှယ်သူများ ဘေးလွတ်ရာသို့ အရေးပေါ် တိမ်းရှောင်ကြရန် အင်းလေးပြည်သူ့ကာကွယ်ရေးတပ်ဖွဲ့ (IPDF) က ယနေ့ (မေလ ၈ ရက်) တွင် အရေးပေါ် သတိပေးချက် ထုတ်ပြန်လိုက်သည်။

-ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) ကိုယ်စားလှယ်အဖွဲ့သည် ကနေဒါနိုင်ငံ၊ တိုရွန်တိုမြို့ရှိ မြန်မာလူမှုအသိုင်းအဝိုင်းနှင့် ပြီးခဲ့သည့် မေလ ၃၀ ရက်နေ့က တွေ့ဆုံခဲ့ ကြောင်း သိရသည်။

-ပဲခူးတိုင်း၊ ရေတာရှည်မြို့နယ် ၊ နဂျပ်ကျေးရွာ (အောက်) ကို စစ်အုပ်စုက ယမန်နေ့ (ဇွန် ၆ ရက်) နံနက်ပိုင်းက လေကြောင်းတိုက်ခိုက်ခဲ့သည့်အတွက် ဒေသခံအရပ်သား သက်ကြီးပိုင်း အမျိုးသားတဦး သေဆုံးပြီး နှစ်ဦး ထိခိုက်ဒဏ်ရာရရှိခဲ့ကြောင်း ရေတာရှည်မြို့နယ်၊ ပြည်သူ့ကာကွယ်ရေးအဖွဲ့ (ပကဖ) တာဝန်ရှိသူတဦးက ဇွန် ၇ ရက် တွင် မဇ္ဈိမကို ပြောသည်။

-ရှမ်းပြည်နယ်အပါအဝင် မြန်မာနိုင်ငံရှိ ဒေသအများအပြားတွင် ဇွန်လ ၁၄ ရက်နေ့မတိုင်မီအထိ နေရာကွက်၍ မိုးသည်းထန်စွာ ရွာသွန်းနိုင်ကြောင်း ခန့်မှန်းထားသဖြင့် ရေကြီးရေလျှံမှုအန္တရာယ်များကို သတိပြုကြရန် အမျိုးသားညီညွတ်ရေးအစိုးရ (NUG) ၏ သက်ဆိုင်ရာဝန်ကြီးဌာနက သတိပေးထုတ်ပြန်ထားသည်။

-မကွေးတိုင်း၊ ဂန့်ဂေါခရိုင်၊ ဂန့်ဂေါမြို့နယ်အတွင်းရှိ ကျောမြို့တွင် တပ်စွဲထားသည့် စစ်ကောင်စီတပ်နှင့် ပျူစောထီးအဖွဲ့ဝင်များကို စနိုက်ပါဖြင့် ပစ်ခတ်တိုက်ခိုက်ခဲ့ရာ ပျူစောထီးအဖွဲ့ဝင် တစ်ဦး သေဆုံး ခဲ့ကြောင်း ကျောမြို့ ပြည်သူ့ကာကွယ်ရေးအဖွဲ့ (ပကဖ) က ထုတ်ပြန်ထားသည်။

-အမျိုးသားညီညွတ်ရေးအစိုးရ၏ လူ့အခွင့်အရေးဆိုင်ရာဝန်ကြီးဌာနက ပြည်ထောင်စုလွှတ်တော် ကိုယ်စားပြုကော်မတီ (CRPH) ထံ ဝန်ကြီးဌာန၏ လုပ်ငန်းဆောင်ရွက်ချက်များနှင့် ရှေ့ဆက်ဆောင်ရွက် မည့် လုပ်ငန်းစဉ်များကို ဇွန်လ ၅ ရက်နေ့တွင် ရှင်းလင်းတင်ပြခဲ့ကြောင်း သိရသည်။

တော်လှန်ရေး လှုပ်ရှားမှုများ

-မကွေးတိုင်း၊ လောင်းရှည်မြို့တွင် ရောက်ရှိနေသည့် စစ်ကောင်စီတပ်ဖွဲ့ဝင် အင်အား ၃၀၀ ခန့်သည် ဇွန်လ ၈ ရက်နေ့တွင် ဒေသတွင်းကားများကို ချောဆွဲအသုံးပြုကာ ဖောကား ၄ စီး၊ ကားငယ် ၄ စီး စုစုပေါင်း ၈ စီးဖြင့် ဆောမြို့ဘက်သို့ ထွက်ခွာလာကြောင်း ယောအလင်းတန်းက ထုတ်ပြန်သည်။

-ဗြိတိန်နိုင်ငံ၊ လန်ဒန်မြို့တွင် နေထိုင်သည့် မြန်မာ့ဒီမိုကရေစီအရေး ထောက်ခံသူများက နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ အသက် ၈၁ နှစ်မြောက် မွေးနေ့အထိမ်းအမှတ်အဖြစ် ၈ ဒသမ ၁ မိုင် လမ်းလျှောက်လှုပ်ရှားမှုကို ဇွန်လ ၆ ရက်နေ့တွင် ပြုလုပ်ခဲ့ကြသည်။

-အကြမ်းဖက်စစ်အုပ်စု၏ ကျောထောက်နောက်ခံ စီးပွားရေးလုပ်ငန်းကြီးများအပေါ် အရေးယူပိတ်ဆို့ မှုများ ချမှတ်ဆောင်ရွက်ပေးရန် ဂျပန်နှင့် တောင်ကိုရီးယားနိုင်ငံရှိ အလုပ်သမားသမဂ္ဂအဖွဲ့များက လှုပ်ရှားတောင်းဆိုလျက်ရှိကြောင်း Justice For Myanmar က အသိပေးထုတ်ပြန်ထားသည်။

-မြန်မာနိုင်ငံ အသွင်ကူးပြောင်းရေးကာလ တရားမျှတမှုရရှိရေး နိုင်ငံတကာဥပဒေပညာရှင်များ- ICJ က ဆွေးနွေးပွဲ ကျင်းပကြောင်း ICJ – International Commission of Jurists-ICJ က သတင်းထုတ် ပြန်သည်။

-လောင်းလုံးမြို့၏ မြောက်ပိုင်း စခန်းကြီးကျေးရွာအုပ်စုကို စစ်အာဏာရှင်တပ်က ယနေ့ နံနက်ပိုင်းကစပြီး လက်နက်ကြီးဖြင့်ပစ်ခတ်ကာ အင်အားအလုံးအရင်းဖြင့် စစ်ကြောင်းထိုးနေကြောင်း တော်လှန်ရေး အင်အားစုများနှင့် ဒေသခံများက ပြောသည်။

တိုင်းရင်းသား လက်နက်ကိုင်များ

-ရှမ်းပြည်နယ်မြောက်ပိုင်း၊ နမ့်ခမ်းမြို့နယ် ကောင်းတပ်ရပ်ကွက်တွင် ဖြစ်ပွားခဲ့သည့် ပေါက်ကွဲ မှုကြောင့် သေဆုံး၊ ထိခိုက်နစ်နာခဲ့သည့် မိသားစုဝင်များထံ တအာင်းတပ်မတော် (PSLF/TNLA) ခေါင်းဆောင်များက သွားရောက်တွေ့ဆုံကာ တောင်းပန်စကားပြောကြားခဲ့ပြီး ဝမ်းနည်းကြောင်း ထုတ်ဖော်ပြောဆိုခဲ့ကြောင်း TNLA က သတင်းထုတ်ပြန်ထားသည်။

-သဘာဝပတ်ဝန်းကျင် ထိန်းသိမ်းကာကွယ်ရေးနှင့် စိန်ခေါ်မှုများကို လက်တွေ့ကျကျဖြေရှင်း နိုင်ရေး သက်ဆိုင်ရာ လူပုဂ္ဂိုလ်၊ အဖွဲ့များနှင့်ပူးပေါင်းဆောင်ရွက်သွားရန် အဆင်သင့်ရှိနေ ကြောင်း ကေအဲန်ယူ-ကရင်အမျိုးသားအစည်းအရုံးနှင့် ကရင်နီပြည် ကြားကာလအုပ်ချုပ်ရေး ကောင်စီ-IEC က ပူးတွဲစာထုတ်သည်။

စစ်ကောင်စီ

-ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်ဦးဆောင်သည့် မြန်မာကိုယ်စားလှယ်အဖွဲ့သည် ဗီယက်နမ်နိုင်ငံ၊ ဟနွိုင်းမြို့၌ ကျင်းပမည့် အစည်းအဝေးများတွင် အာဆီယံဒေသတွင်း မြို့ပြစီမံခန့်ခွဲ မှုဆိုင်ရာ ပူးပေါင်းဆောင်ရွက်ရေး အခြေအနေများကို ဆွေးနွေးသွားမည်ဖြစ်ကြောင်း ရန်ကုန်တိုင်း ဒေသကြီးအစိုးရအဖွဲ့က အသိပေးထားသည်။

-ဧရာဝတီတိုင်းဒေသကြီးတွင် ဓာတ်မြေဩဇာခွဲတမ်း ခွဲဝေချထားပေးသည့် လုပ်ငန်းစဉ်များကို လွှတ်တော် က ထိန်းညှိကြပ်မတ်ရန် လိုအပ်နေပြီဖြစ်ကြောင်း အတုယောင် ဧရာဝတီတိုင်း ဒေသကြီး လွှတ်တော် စွမ်းအင်၊ စက်မှုလက်မှု၊ လမ်းပန်းဆက်သွယ်ရေးနှင့် ဆောက်လုပ်ရေးရာကော်မတီ ဥက္ကဋ္ဌ ဦးကြည်ကိုကို က ပြောသည်။

-ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်း ဦးဆောင်သော မြန်မာ ကိုယ်စားလှယ်အဖွဲ့သည် ဇွန်လ ၆ ရက်က လာအိုပြည်သူ့ဒီမိုကရက်တစ်သမ္မတနိုင်ငံအစိုးရ၏ ဖိတ်ကြားချက်အရ လာအိုနိုင်ငံ၊ ဗီယင်ကျန်းမြို့၌ လာအိုနိုင်ငံ ကျန်းမာရေးဝန်ကြီးဌာနနှင့် Asia Pacific Leaders Malaria Alliance (APLMA) တို့ပူးပေါင်းကျင်းပသည့် (၁၀) ကြိမ်မြောက်ငှက်ဖျားရောဂါ ပပျောက်ရေးဆိုင်ရာ အာရှ-ပစိဖိတ် ဒေသခေါင်းဆောင်များအစည်းအဝေးသို့ တက်ရောက်သည်။

-ငါးနှစ်ကျော်ကြာ သွားလာခွင့် ကန့်သတ်ထားခဲ့သည့် ဘူတာကြီးဂုံးကျော်တံတားအပါအဝင် မန္တလေးမြို့ရှိ လမ်းမကြီးများအား အရပ်သားတပိုင်းစစ်အစိုးရအဖွဲ့က ဖွင့်ပေးခဲ့ကြောင်း သိရသည်။

-မြဝတီမြို့ဝန်းကျင်ရှိ ဆိုဒ်များအတွင်း တရားမဝင်လမ်းကြောင်းမှတစ်ဆင့် ဝင်ရောက်နေသည့် ပြည်ပနိုင်ငံသားနှစ်ဦး ဇွန် ၇ ရက်တွင် ထပ်မံဖမ်းဆီးရမိကြောင်း စစ်အုပ်စု ဝေခံသတင်းများတွင် ဖော်ပြထားသည်။

-ရန်ကုန်တိုင်းဒေသကြီး ဆိပ်ကြီးခနောင်တိုမြို့နယ်နှင့် ဒလမြို့နယ်တို့ကို ဆက်သွယ်ပေးမည့် ဆိပ်ကြီးခနောင်တို (တွံတေးတူးမြောင်း) တံတားကို လမ်းဦးစီးဌာနနှင့် တံတားဦးစီးဌာန တည်ဆောက်ရေး အဖွဲ့ (၄) တို့က ဆောင်ရွက်လျက်ရှိကြောင်း သိရသည်။