AI Summary
ရန်ကုန်မြို့အဝင် X Ray စစ်ဆေးရေးဂိတ်တွင် စစ်အာဏာရှင်ခန့် ဧရာဝတီတိုင်းနယ်လုံဝန်ကြီး၏ တူဖြစ်သူကို ဖမ်းဆီးပြီး စစ်ကြောရေးသို့ ပို့ဆောင်ခဲ့သည့် အမှတ် ၂၀၅ တပ်ရင်းမှူးနှင့်အဖွဲ့ စစ်ဆေးခံနေရကြောင်း သိရသည်။ မေ ၃၁ ရက် ညနေပိုင်းက ကားပေါ်မှ လူငယ်နှစ်ဦးကို ဖမ်းဆီးခဲ့ရာ တစ်ဦးမှာ နယ်လုံဝန်ကြီး ဗိုလ်မှူးကြီး စိုးမင်းဦး၏ တူဖြစ်နေသောကြောင့် ၎င်း၏မိဘများ လိုက်လာပြီး ပြဿနာရှာခဲ့ရာမှ ပြန်လည်လွတ်မြောက်ခဲ့သည်။ ထိုဖြစ်စဉ်ကြောင့် ဖမ်းဆီးခဲ့သည့် X Ray ဂိတ်မှ စစ်သားများနှင့် စမဟ ၂၀၅ တပ်ရင်းမှူး ဒုဗိုလ်မှူးကြီး စိုးမိုးအောင်တို့ စစ်ဆေးခံနေရခြင်းဖြစ်သည်။ စစ်ရေးသတင်းအရင်းအမြစ်များကမူ ၎င်းတို့အချင်းချင်းဖြစ်၍ အရေးယူခံရမည်မဟုတ်ဘဲ သာမန်ပြည်သူများဆိုလျှင် စစ်မှုထမ်းသင်တန်းကျောင်းသို့ ပို့ဆောင်ခံရမည်ဖြစ်ကြောင်း ထောက်ပြသည်။ လက်ရှိတွင် စစ်မှုထမ်းအပတ်စဉ် ၂၆ အတွက် လူသစ်စုဆောင်းမှုများ ပြုလုပ်နေပြီး၊ ယခင်အပတ်စဉ် ၂၅ တွင်လည်း အသက် ၄၇ နှစ်အရွယ် အမျိုးသားတစ်ဦးကို အသက် ၃၅ နှစ်ဟု မှတ်ပုံတင်ပြင်ဆင်ကာ စစ်မှုထမ်းခိုင်းခဲ့သည့် ဖြစ်စဉ်များရှိခဲ့သည်။ အာဏာသိမ်းစစ်ခေါင်းဆောင်က ၂၀၂၄ ခုနှစ် ဖေဖော်ဝါရီ ၁၀ ရက်တွင် စစ်မှုထမ်းဥပဒေကို အသက်သွင်းခဲ့ပြီးနောက် မတ် ၂၈ ရက်မှစ၍ သင်တန်းများပေးခဲ့ရာ အပတ်စဉ် ၂၆ အထိ ရောက်ရှိနေပြီဖြစ်သည်။
ဧရာဝတီတိုင်းကနေ ရန်ကုန်မြို့ကို လာလည်တဲ့ စစ်အာဏာရှင်ခန့် တိုင်းနယ်လုံဝန်ကြီးရဲ့ တူဖြစ်သူကို မြို့အဝင် X Ray စစ်ဆေးရေးဂိတ်မှာ ဖမ်းဆီးပြီး စစ်ကြောရေးနဲ့တည်းခိုရေးတပ်ကို ပို့လိုက်တဲ့ အမှတ် ၂၀၅ တပ်ရင်းမှူးနဲ့အဖွဲ့ စစ်ဆေးခံနေရတယ်လို့ ထန်းတပင်မြိုခံတွေဆီက သိရပါတယ်။
မေ ၃၁ ရက် ညနေက ရန်ကုန်မြို့အဝင် X Ray စစ်ဆေးဂိတ်မှာ အာဏာရှင်စစ်တပ်က ကားတစီးပေါ်ကနေ လူငယ် ၂ ယောက်ကို ဖမ်းဆီးပြီး ဘုရင့်နောင် စစ်ကြောရေးနဲ့ တည်းခိုရေးတပ်ကို ပို့လိုက်ရာ လူငယ်တယောက်ဟာ ဧရာဝတီတိုင်း နယ်လုံဝန်ကြီး ဗိုလ်မှူးကြီး စိုးမင်းဦးရဲ့တူ ဖြစ်နေတာကြောင့် စစ်ဆေးခံရတာလို့ သတင်းအရင်းအမြစ်က ပြောပါတယ်။
“ဖမ်းခံရတဲ့ ကောင်လေးက စစ်ကြောရေးကနေ သူ့အိမ်ကို ဖုန်းဆက်လိုက်တာ၊ သူ့မိဘတွေ လိုက်လာပြီး ပြဿနာရှာတာ။ အဲဒီကျမှ ဖမ်းထားတဲ့ နယ်လုံဝန်ကြီးတူရော၊ သူ့ သူငယ်ချင်းရော ပြန်လွှတ်ပေးလိုက်တာ။ X Ray ဂိတ်က စစ်သားတွေရော စမဟ ၂၀၅ က တပ်ရင်းမှူးနဲ့ အဖွဲ့ရော စစ်ဆေးခံရတယ်။”
စစ်ဆေးခံရသူတွေဟာ ထန်းတပင်၊ မှော်ဘီ၊ တိုက်ကြီးနဲ့ ဥက္ကံမြို့က စစ်မှုထမ်းဆင့်ခေါ်ရေး ကိစ္စတွေကို ဦးဆောင်နေတဲ့ အမှတ် ၂၀၅ စစ်မှုထမ်းဟောင်းတပ်ရင်းမှ တပ်ရင်းမှူး ဒုဗိုလ်မှူးကြီး စိုးမိုးအောင်နဲ့အဖွဲ့ ဖြစ်တယ်လို့ စစ်ရေးသတင်းအရင်းအမြစ်က ပြောပါတယ်။
“စစ်ဆေးခံရတာတော့ မှန်တယ်၊ အရေးယူ မယူတော့ မသိဘူး။ သူတို့ အချင်းချင်းဆိုတော့ ကိုကြီး ညီလေးနဲ့ပဲ ပြီးသွားမှာ။ အဲဒီကလေးတွေနေရာမှာ တခြားသူဆို အခုလောက်ဆို သင်တန်းကျောင်းပို့ပြီးလောက်ပြီ။ ရန်ကုန်မှာ စစ်မှုထမ်း ၂၆ အတွက် အခုကတည်းက ကြိုတင်ပြီး လူသစ်စုဆောင်းနေတာ။”
စစ်မှုထမ်းအပတ်စဥ် ၂၅ တုန်းကလည်း မိသားစုစားဝတ်နေရေးအတွက် ရေနံချောင်းမြို့နယ်ကနေ ရန်ကုန်မြို့ကိုတက်လာပြီး တာမွေမြို့နယ်မှာ ဆိုက်ကားနင်းနေတဲ့ အသက် ၄၇ နှစ်အရွယ် ဦးမြင့်ဆိုင်ကို စစ်တပ်က ဖမ်းပြီး အသက် ၃၅ နှစ် မှတ်ပုံတင်ပြင်ဆင်ပြုလုပ်ပေးကာ စစ်ထဲ ထည့်ခဲ့တယ်လို့ဇနီးဖြစ်သူ ဒေါ်ခင်စိုးရီက ဇွန် ၁ ရက်က လူမှုကွန်ရက်မှာ ပြောပါတယ်။
မေ ၂၅ ရက်က အာဏာရှင်စစ်တပ်က မြန်မာနိုင်ငံတဝန်းမှာရှိတဲ့ သင်တန်းကျောင်းတွေမှာ စစ်မှုထမ်းအပတ်စဥ် ၂၅ ကို ဖွင့်လှစ်ခဲ့တာ ဖြစ်ပါတယ်။
လူတိုင်း မဖြစ်မနေ စစ်မှုထမ်းရမဲ့ ဥပဒေကို အာဏာသိမ်းစစ်ခေါင်းဆောင်က ၂၀၂၄ ခုနှစ် ဖေဖော်ဝါရီ ၁၀ ရက်က အသက်သွင်းခဲ့ပြီး မတ် ၂၈ ရက်မှာ စတင်သင်တန်းပေးခဲ့ရာ အခုဆိုရင် အပတ်စဉ် ၂၆ အထိ ရောက်လာပြီ ဖြစ်ပါတယ်။