ကျောင်းသားတစ်ဦး သေဆုံးချိန်တွင် လက်ထိတ်ခတ်ထားမှုကြောင့် ဗြိတိန်ရဲတပ်ဖွဲ့ ဖိအားပေးခံနေရ

လန်ဒန် - ဗြိတိန်နိုင်ငံ ဆောက်သမ်တန်မြို့တွင် အသက် ၁၈ နှစ်အရွယ် ကျောင်းသားတစ်ဦး ဓားဖြင့်အထိုးခံရပြီးနောက် သေဆုံးခါနီးအချိန်တွင် ရဲတပ်ဖွဲ့က လက်ထိပ်ခတ်ခဲ့သည့် ဖြစ်ရပ်နှင့်ပတ်သက်၍ ဗြိတိန်ရဲတပ်ဖွဲ့သည် အင်္ဂါနေ့ (ဇွန်လ ၂ ရက်) တွင် နိုင်ငံတစ်ဝန်း ပြင်းထန်သော ဝေဖန်မှုများနှင့် ရင်ဆိုင်ခဲ့ရသည်။ အဆိုပါဖြစ်ရပ်တွင် လူသတ်သမားက လူမျိုးရေးခွဲခြားသည့် တိုက်ခိုက်မှုဟု မဟုတ်မမှန် စွပ်စွဲပြောဆိုခဲ့ခြင်းဖြစ်သည်။

ဟင်နရီ နိုဝက် (Henry Nowak) သည် ပြီးခဲ့သည့်နှစ် ဒီဇင်ဘာလက အင်္ဂလန်တောင်ပိုင်း ဆောက်သမ်တန်မြို့တွင် ဓားဖြင့် အထိုးခံရပြီးနောက် သေဆုံးသွားခဲ့သည်။

သူ့ကို သတ်ဖြတ်ခဲ့သူ အသက် ၂၃ နှစ်အရွယ် ဆစ်ခ်ဘာသာဝင် ဗစ်ခရမ် ဒီဂွာ (Vickrum Digwa) ကို တနင်္လာနေ့တွင် တစ်သက်တစ်ကျွန်း ထောင်ဒဏ် ချမှတ်ခဲ့သည်။ ဒီဂွာသည် ဖြစ်စဉ်ဖြစ်ပွားချိန်တွင် နိုဝက်က သူ့ကို အရင်စတင် တိုက်ခိုက်ခဲ့ခြင်းဖြစ်သည်ဟု ရဲတပ်ဖွဲ့အား လိမ်လည်ပြောဆိုခဲ့သည်။

ရဲတပ်ဖွဲ့၏ ကိုယ်ခန္ဓာတွင် တပ်ဆင်ထားသော ကင်မရာ (bodycam) မှတ်တမ်းတွင် နိုဝက်သည် လမ်းမပေါ်တွင် လဲလျောင်းနေရင်း "ကျွန်တော် အထိုးခံထားရတာ" နှင့် "ကျွန်တော် အသက်ရှူလို့ မရတော့ဘူး" ဟု ပြောဆိုနေသော်လည်း ရဲအရာရှိတစ်ဦးက "မင်း အထိုးခံရတယ်လို့ ငါမထင်ဘူး" ဟု ပြန်လည်ပြောဆိုနေသည်ကို တွေ့ရသည်။

လူထုသဘောထား စစ်တမ်းများတွင် ဦးဆောင်နေသည့် လူဝင်မှုကြီးကြပ်ရေး ဆန့်ကျင်ရေးပါတီ Reform ၏ ခေါင်းဆောင် နိုက်ဂျယ် ဖာရေ့ချ် (Nigel Farage) က ဤဖြစ်ရပ်သည် လူဖြူဗြိတိန်လူမျိုးများ၏ အခွင့်အရေးထက် လူနည်းစုများ၏ အခွင့်အရေးကို ပိုမိုဦးစားပေးနေသည့် နမူနာတစ်ခုဖြစ်ကြောင်း ပြောကြားခဲ့သည်။

"လူမျိုးရေးခွဲခြားသူလို့ အခေါ်ခံရမှာကို ကြောက်ရွံ့မှုက ဟင်နရီ နိုဝက်ရဲ့ လူသတ်မှုကို ကိုင်တွယ်ဖြေရှင်းရမယ့် တာဝန်ထက် ပိုကြီးမားနေခဲ့တယ်" ဟု ၎င်းက ထုတ်ပြန်ချက်တွင် ဖော်ပြထားသည်။

"ဒီကိစ္စကို ကျွန်တော်တို့အနေနဲ့ အလွန်အမင်း ဒေါသထွက်မှုနဲ့ တုံ့ပြန်သင့်ပါတယ်" ဟုလည်း ၎င်းက ဆိုသည်။

တရားသူကြီး ဝီလျံ မောက်စ်လေ (William Mousley) က တနင်္လာနေ့တွင် တရားရုံး၌ ဤအမှုသည် ဗြိတိန်တစ်ဝန်း လူမျိုးရေးတင်းမာမှုများကို ဖြစ်ပေါ်စေခဲ့ကြောင်း ဝန်ခံပြောကြားခဲ့သည်။

အင်္ဂါနေ့ညနေပိုင်းတွင် ဆောက်သမ်တန်မြို့၌ ဆန္ဒပြပွဲတစ်ခု ဖြစ်ပွားရန်ရှိနေပြီး လူဝင်မှုကြီးကြပ်ရေး ဆန့်ကျင်ရေး တက်ကြွလှုပ်ရှားသူ စတီဗင် ယာ့ခ်စလေ-လင်နွန် (Stephen Yaxley-Lennon) - သို့မဟုတ် တော်မီ ရော်ဘင်ဆန် (Tommy Robinson) ဟု လူသိများသူက ၎င်း၏ ထောက်ခံသူများကို တက်ရောက်ရန် တိုက်တွန်းထားသည်။

ယခုသီတင်းပတ်အတွင်း အခြားသော ဆန္ဒပြပွဲများကိုလည်း ကြေညာထားသည်။

ဒီဂွာသည် ဆစ်ခ်ဘာသာဝင်များအတွက် ဘာသာရေးဆိုင်ရာ ဓားငယ် (ceremonial daggers) ကိုင်ဆောင်ခွင့်ရှိသည့် ခြွင်းချက်ကို အသုံးပြု၍ ၎င်းတွင် ဓားကိုင်ဆောင်ခွင့်ရှိသည်ဟု ပြောဆိုခဲ့သည်။

ရဲတပ်ဖွဲ့ ရောက်ရှိလာချိန်တွင် ဒီဂွာက ၎င်း၏ ခေါင်းပေါင်းကို အချွတ်ခံလိုက်ရပြီး မျက်လုံးတွင် ဒဏ်ရာရရှိခဲ့ကြောင်း ပြောဆိုခဲ့သည်။

ဝန်ကြီးချုပ်ရုံးဝန်ကြီး နစ်ခ် သောမတ်စ်-ဆိုင်းမော့စ် (Nick Thomas-Symonds) က BBC ရေဒီယိုသို့ ပြောကြားရာတွင် "ဖြစ်စဉ်နေရာမှာ ရဲတပ်ဖွဲ့ရဲ့ လုပ်ဆောင်ချက်တွေကို ကြည့်လိုက်ရင် တုန်လှုပ်စရာကောင်းလောက်အောင် ဖြစ်နေပါတယ်" ဟု ပြောကြားခဲ့သည်။