အိုလံပစ် ၂၀၀ မီတာ ချန်ပီယံ သောမတ်စ် လုန်းစတား ဂရန်းပရီ၌ အပြင်းအထန်ပြေး ဗိုလ်စွဲ

ဇွန်လ ၇ ရက်။ အိုလံပစ် ၂၀၀ မီတာ ချန်ပီယံ ဂက်ဘီ သောမတ်စ်သည် စနေနေ့က တက္ကဆက်ပြည်နယ်၊ ကောလိပ်စတေရှင်း (College Station) မြို့ရှိ လုန်းစတား ဂရန်းပရီ (Lone Star Grand Prix) ပြိုင်ပွဲ၌ အမျိုးသမီး မီတာ ၂၀၀ ပြိုင်ပွဲတွင် ကမ္ဘာ့အကောင်းဆုံးအချိန်ကို တင်မှတ်ကာ အနိုင်ရရှိခဲ့သည်။

၂၀၂၄ ပါရီအိုလံပစ်တွင် မီတာ ၂၀၀ အပြင် ၄x၁၀၀ မီတာနှင့် ၄x၄၀၀ မီတာ အသင်းလိုက်ပြေးပွဲများ၌ ရွှေတံဆိပ်ဆုများ ရရှိခဲ့သူ အမေရိကန်အားကစားသမားသည် ၂၁.၇၀ စက္ကန့်ဖြင့် ဝင်ရောက်ခဲ့ကာ ၎င်း၏ နိုင်ငံသူ ကေလာ ဝှိုက် (Kayla White) (၂၂.၀၇) နှင့် နိုင်ဂျီးရီးယားမှ ဖေဗာ အိုဖီလီ (Favour Ofili) (၂၂.၁၅) တို့ကို အသာရခဲ့သည်။

ယခုအချိန်သည် သောမတ်စ် အိုလံပစ်ရွှေတံဆိပ်ဆု ရရှိခဲ့သည့် ၂၁.၈၃ စက္ကန့်ထက် ပိုမိုမြန်ဆန်ခဲ့ပြီး ၂၀၂၃ ခုနှစ်တွင် တင်မှတ်ခဲ့သည့် ၎င်း၏ ကိုယ်ပိုင်အကောင်းဆုံးအချိန် ၂၁.၆၀ စက္ကန့်နှင့် ၀.၁၀ စက္ကန့်သာ ကွာခြားခဲ့သည်။

"ဒီအချိန်အတွက် နည်းနည်းတော့ အံ့အားသင့်မိပါတယ်။ ဒါပေမဲ့ ကျွန်မ ကြိုးကြိုးစားစား လေ့ကျင့်ခဲ့တာပါ" ဟု အသက် ၂၉ နှစ်အရွယ် အားကစားသမားက ပြောကြားခဲ့သည်။

"ကျွန်မ အာဖရိကမှာ ခရီးစဉ်ကောင်းလေးတစ်ခု ရှိခဲ့ပြီး အခုတော့ ကြိုးစားအားထုတ်မှုတွေက အရာထင်လာပါပြီ။ အိုလံပစ် ဒါမှမဟုတ် ကမ္ဘာ့ချန်ပီယံရှစ်ရဲ့ ဖိအားတွေ မရှိတဲ့ 'အနားယူ' နှစ်တစ်နှစ်ကို ပိုင်ဆိုင်ရတာ ပျော်ရွှင်မိပါတယ်။ ဒါကြောင့် ဒီရာသီမှာ ပျော်ပျော်ရွှင်ရွှင်ပဲ ဖြတ်သန်းနေပါတယ်" ဟု ၎င်းက ဆက်လက်ပြောကြားခဲ့သည်။

သောမတ်စ်သည် ပြီးခဲ့သည့်နှစ် တိုကျိုတွင် ကျင်းပခဲ့သည့် ကမ္ဘာ့ချန်ပီယံရှစ်ပြိုင်ပွဲကို အခီလိစ် (Achilles) ဒဏ်ရာကြောင့် လွဲချော်ခဲ့ရပြီး ဧပြီလတွင်မှ ပြိုင်ပွဲများသို့ ပြန်လည်ဝင်ရောက်နိုင်ခဲ့သည်။