ဖာပွန်နှင့် ဝေါလေဗျူဟာ၌ တကျော့ပြန် တိုက်ပွဲ ပြန်လည်ပြင်းထန် - BUR.MIZZIMA.COM

YT (ဇွန် ၆)

မဇ္ဈိမ။ ။ ကရင်အမျိုးသားအစည်းအရုံး (KNU)၏ တပ်မဟာ (၅) မူတြော်ခရိုင်အတွင်း တည်ရှိသည့် စစ်အုပ်စုတပ်၏ ဖာပွန်ဗျူဟာနှင့် KNU တပ်မဟာ​ (၆) ဒူးပလာယာခရိုင်အတွင်းတည်ရှိသည့် ဝေါလေဗျူဟာတို့၌ တကျော့ပြန်တိုက်ပွဲများ ပြန်လည်ဖြစ်ပွားနေကြောင်း သတင်းရင်းမြစ်များထံက သိရသည်။

ကရင်အမျိုးသားလွတ်မြောက်ရေးတပ်မတော် (KNLA) နှင့် ပြည်သူ့ကာကွယ်ရေးတပ် (PDF) ပူးပေါင်းတပ်များက ထိုဗျူဟာစခန်းများကို ပူးပေါင်းထိုးစစ်ဆင်နေကြခြင်းဖြစ်သည်။

ဖာပွန်ဗျူဟာကို KNLA ပူးပေါင်းတပ်များ ပိတ်ဆို့ထားသည်မှာ နှစ်နှစ်ခန့် ရှိပြီဖြစ်သည်။ စစ်အုပ်စုတပ်က ထိုစခန်း လက်မလွှတ်ရရေးအတွက် ဖာပွန်- ကမမောင်းလမ်းအတိုင်း အင်အားရာချီဖြင့် မြေပြအင်အားဖြည့်တင်းနေခြင်းလည်း ရှိသည်။

ပြီးခဲ့သည့် ဇွန်လ ပထမအပတ်အတွင်းကစ၍ ဖာပွန်ဗျူဟာကို KNLA ပူးပေါင်းတပ်က တကျော့ပြန် တိုက်ပွဲ ပြန်လည်ဆင်နွှဲနေပြီး စစ်အုပ်စုကလည်း လေကြောင်းပစ်ကူများဖြင့် အပြင်းအထန် ခုခံနေသည်။

“ အခြေအနေကတော့ သူ့ဘက်က အထိအခိုက်များနေသလိုပဲ ဒီဘက်ကလည်း နည်းနည်းတော့ အကျအဆုံး ရှိနေတယ်။ သူတို့ကိုတော့ မြေပြင်က ပိတ်ထားတယ်။ အခုထိတော့ သူတို့က ဝါးဒူးအကျော်ပေါ့ ဒီဘက်နဲ့တော့ ဝေးသေးတယ်ပြောရမယ်” ဟု မြေပြင်သတင်းရင်းမြစ်က ပြောသည်။

အလားတူ KNLA ပူးပေါင်းတပ်များ အချိန်တနှစ်နီးပါးကြာ ပိတ်ဆို့ထားသည့် တပ်မဟာ (၆) နယ်မြေ၊ ထိုင်း- မြန်မာနယ်စပ်အနီးရှိ ဝေါလေဗျူဟာ၌လည်း ဇွန်လ ၂ ရက်နေ့ကစ၍ တိုက်ပွဲများ ပြန်လည်ပြင်းထန်နေပြီး လေကြောင်းပစ်ကူများသုံးကာ အပြင်းအထန် ခုခံနေကြောင်း သတင်းရရှိသည်။

“ အဓိက လေကြောင်းပစ်ကူကပဲ သူတို့အတွက် အဓိကပေါ့။ လေယာဉ်ပဲ သူတို့ ကောင်းကောင်းသုံးနိုင်တာ” ဟု စစ်ရေးသတင်းရင်းမြစ်က ပြောသည်။

ဇွန်လ ၂ ရက်နေ့ ဝေါလေဗျူဟာ တိုက်ပွဲအတွင်း ပစ်ခတ်သည့် အသေခံဒရုန်းတစင်း ထိုင်းနယ်စပ်ဘက်ခြမ်းသို့ ကျရောက်ပေါက်ကွဲပြီး မြန်မာရွှေ့ပြောင်း မိသားစုသုံးဦး သေဆုံးကာ နှစိဦး ထိခိုက်ဒဏ်ရာ ရရှိခဲ့သည်။

ဝေါလေဗျူဟာစခန်းသိမ်းတိုက်ပွဲကြောင့် ထိုင်း- မြန်မာနယ်စပ် ထိုင်းနိုင်ငံဘက်ခြမ်းနှင့် စစ်ဘေးရှောင်စခန်းများတွင် စုဝေး ခိုလှုံလျက်ရှိကြပြီး စစ်အုပ်စုတပ်၏ တိုက်ခိုက်မှုများကြောင့် အရပ်သား ထိခိုက်သေဆုံးမှုများ မကြာခဏ ရှိနေသည်။

စာတည်း။ ။အောင်ကျော်ဖြိုး