ဖီဂျီက ဩစတြေးလျ ဘီလျံနာရဲ့ အမှိုက်သယ်ယူ မီးရှို့မယ့် 'ပစိဖိတ် သရွတ်ခွက်' စီမံကိန်းကို ပယ်ချလိုက်ပြီ

ဆစ်ဒနီ- ဖီဂျီနိုင်ငံ၏ ပတ်ဝန်းကျင်ဝန်ကြီးဌာနသည် ကြာသပတေးနေ့ (ဇွန် ၄ ရက်) တွင် ဩစတြေးလျဘီလျံနာတစ်ဦး၏ တောင်ပစိဖိတ်နိုင်ငံ၌ အမှိုက်ကို မီးရှို့၍ စွမ်းအင်ထုတ်လုပ်ရန် အစီအစဉ်ကို ပယ်ချခဲ့သည်။ ယင်းအစီအစဉ်ကို ရိုးရာမြေပိုင်ရှင်များနှင့် ခရီးသွားလုပ်ငန်းရှင်များက ပြင်းထန်စွာ ကန့်ကွက်ခဲ့ကြပြီးနောက် ပယ်ချခဲ့ခြင်းဖြစ်သည်။

ဒေသအနှံ့အပြားမှ ပြန်လည်အသုံးပြု၍မရသော အမှိုက်များကို သဘာဝအတိုင်း သန့်ရှင်းလှပသော ကမ်းခြေများကြောင့် ခရီးသွားများအကြား ရေပန်းစားသည့် ဖီဂျီနိုင်ငံသို့ သင်္ဘောဖြင့်ပို့ဆောင်ကာ တစ်နှစ်လျှင် တန် ၉၀၀,၀၀၀ အမှိုက်များကို မီးရှို့ဖျက်ဆီးမည့် အမှိုက်မီးရှို့စက် တည်ဆောက်ရန် အစီအစဉ်ကို ကျေးရွာသားများက "အမှိုက်ကိုလိုနီစနစ်" ဟု ဝေဖန်ခဲ့ကြသည်။

ဖီဂျီနိုင်ငံ၏ ကုလသမဂ္ဂဆိုင်ရာ သံအမတ်ကြီး ဖီလီပို တာရာကီနီကီနီ (Filipo Tarakinikini) က ဧပြီလတွင် လူမှုမီဒီယာ၌ နာဒီ (Nadi) မြောက်ဘက်ရှိ ဗူဒါ (Vuda) ကမ်းရိုးတန်းသည် "ပစိဖိတ်၏ ပြာခွက် ဖြစ်လာရမည်မဟုတ်" ဟု ရေးသားခဲ့သည်။

ဖီဂျီပတ်ဝန်းကျင်ဝန်ကြီးဌာနက ကြာသပတေးနေ့တွင် The Next Generation Holdings (TNG) ၏ အမှိုက်မှစွမ်းအင်ထုတ်လုပ်သည့်စက်ရုံနှင့် ပုဂ္ဂလိကဆိပ်ကမ်း တည်ဆောက်ရန် အဆိုပြုချက်ကို ပယ်ချခဲ့ကြောင်း ပြောကြားခဲ့သည်။ ယင်းသို့ပယ်ချရခြင်းမှာ စီမံကိန်း၏ အရွယ်အစား၊ တင်သွင်းလာသော အမှိုက်များ၊ အန္တရာယ်ရှိသော ပြာများကို စီမံခန့်ခွဲခြင်းနှင့် ပြည်သူ့ကျန်းမာရေးဆိုင်ရာ အန္တရာယ်များ စသည့် ကိစ္စရပ်များကြောင့်ဖြစ်သည်ဟု ဆိုသည်။

ခရီးသွားလုပ်ငန်းနှင့် ပတ်ဝန်းကျင်အပေါ် သက်ရောက်မှုများ၊ စီမံကိန်းအတွက် စီးပွားရေးဆိုင်ရာ အကြောင်းပြချက်များနှင့် ပတ်သက်သည့် မေးခွန်းများသည်လည်း ကုမ္ပဏီက တင်ပြခဲ့သည့် အချက်အလက်များတွင် ဖြေရှင်းမရဘဲ ရှိနေခဲ့ကြောင်း ဝန်ကြီးဌာနက ပြောကြားခဲ့သည်။

"၎င်းသည် ရင်းနှီးမြှုပ်နှံမှုကို ဆန့်ကျင်သည့် ဆုံးဖြတ်ချက် သို့မဟုတ် အမှိုက်ဖြေရှင်းနည်းအသစ်များကို ဆန့်ကျင်သည့် ဆုံးဖြတ်ချက် မဟုတ်ပါ" ဟု ဖီဂျီနိုင်ငံ၏ ပတ်ဝန်းကျင်ဆိုင်ရာ အတွင်းဝန် ဆီဗန်ဒရာ မိုက်ကယ် (Sivendra Michael) က ကြေညာချက်တစ်ခုတွင် ပြောကြားခဲ့သည်။

"စီမံကိန်း၏ ဖြစ်နိုင်ခြေရှိသော သက်ရောက်မှုများနှင့် အန္တရာယ်များကို လုံလောက်စွာ အကဲဖြတ်ခြင်း သို့မဟုတ် စီမံခန့်ခွဲနိုင်ခြင်း မရှိကြောင်း ဌာနက ကျေနပ်မှုမရှိခဲ့ပါ" ဟု ၎င်းက ထပ်လောင်းပြောကြားခဲ့သည်။

ပါရီမြို့ဖွား Kookai အမှတ်တံဆိပ်၏ ဖက်ရှင်လုပ်ငန်းရှင်နှင့် အမှိုက်စွန့်ပစ်ခြင်းလုပ်ငန်းမှ ကြီးပွားချမ်းသာလာသော ဩစတြေးလျဘီလျံနာတစ်ဦးတို့က ဖီဂျီနိုင်ငံ၏ ခရီးသွားလုပ်ငန်း အဓိကဝင်ပေါက်ဖြစ်သည့် နာဒီမြို့မှ ၁၅ ကီလိုမီတာအတွင်း တည်ဆောက်ရန် စီစဉ်ထားသည့် အမှိုက်မီးရှို့စက်အတွက် အစိုးရ၏ ထောက်ခံမှု ရရှိထားကြောင်း ယခင်က ပြောဆိုခဲ့ကြသည်။

ဩစတြေးလျအခြေစိုက် အီယန် မာလုဖ် (Ian Malouf) နှင့် ရော့ဘ် ခရွမ်ဘ် (Rob Cromb) တို့ နှစ်ဦးက ဖီဂျီအစိုးရအား ယင်းစီမံကိန်းသည် နိုင်ငံငယ်လေး၏ လျှပ်စစ်ဓာတ်အား လိုအပ်ချက် ၄၀ ရာခိုင်နှုန်းကို ဖြည့်ဆည်းပေးနိုင်ပြီး ဒီဇယ်အပေါ် မှီခိုမှုကို လျှော့ချနိုင်မည်ဖြစ်ကြောင်း ပြောကြားခဲ့သည်။

သို့သော် တင်ပြခဲ့သော ပတ်ဝန်းကျင်ထိခိုက်မှု ဆန်းစစ်ချက်အရ ၎င်းသည် ဖီဂျီနိုင်ငံ၏ ကာဗွန်ထုတ်လွှတ်မှုကို ၂၅ ရာခိုင်နှုန်းအထိ မြှင့်တင်ပေးမည်ဖြစ်ကြောင်း ဖော်ပြခဲ့သည်။

ထုတ်လွှတ်မှုများသည် ဖီဂျီ၏ သဘာဝခရီးသွားလုပ်ငန်း ဂုဏ်သတင်းကို ထိခိုက်စေပြီး အနီးအနားရှိ ဟိုတယ်များနှင့် ကျောင်းများအတွက် ဘေးအန္တရာယ်ဖြစ်စေနိုင်ကြောင်း ဒေသခံများက ပြောကြားခဲ့သည်။

"Dial-a-Dump" တည်ထောင်သူ မာလုဖ် (Malouf) သည် ဆစ်ဒနီမြို့တွင် အလားတူ အမှိုက်မှစွမ်းအင်ထုတ်လုပ်သည့် မီးရှို့စက်ကို ခွင့်ပြုချက်ရရှိရန် ခုနစ်နှစ်ကြာ ကြိုးပမ်းခဲ့သော်လည်း ၂၀၁၈ ခုနှစ်တွင် လူသားတို့၏ ကျန်းမာရေးအတွက် အန္တရာယ်ရှိသည်ဟုဆိုကာ ပယ်ချခံခဲ့ရသည်။

ပါရီဖက်ရှင်အမှတ်တံဆိပ် Kookai ၏ ပိုင်ရှင် ခရွမ်ဘ် (Cromb) သည် ဖီဂျီနိုင်ငံတွင် အဝတ်အထည်များ ထုတ်လုပ်သည်။

TNG ကမူ ယင်းဆုံးဖြတ်ချက်နှင့် ပတ်သက်၍ ချက်ချင်းမှတ်ချက်ပေးခြင်း မရှိသေးပေ။