ဆော်ဒီစွမ်းအင်ဝန်ကြီး ရုရှားခရီးစဉ်အတွင်း တည်ငြိမ်သောစွမ်းအင်ကဏ္ဍဖြစ်ပေါ်ရေး တိုက်တွန်း

ဆော်ဒီအာရေဗျနိုင်ငံ၏ စွမ်းအင်ဝန်ကြီး မင်းသား အဗ္ဗဒူအဇစ် ဘင် ဆလ်မန် အယ်လ် ဆောင် (Prince Abdulaziz bin Salman Al Saud) သည် စိန့်ပီတာစဘတ်မြို့၌ ရုရှားနိုင်ငံမှ ၎င်း၏ လုပ်ဖော်ကိုင်ဖက်နှင့် တွေ့ဆုံခဲ့ပြီး အီရန်နှင့် ယူကရိန်းစစ်ပွဲများကြောင့် ဖြစ်ပေါ်လာသည့် အနှောင့်အယှက်များကြားတွင် OPEC+ အဖွဲ့အနေဖြင့် ရေနံဈေးနှုန်းများ အဆမတန် မြင့်တက်လာမှုကို ရင်ဆိုင်နေရချိန်၌ ကမ္ဘာ့စွမ်းအင်ဈေးကွက် တည်ငြိမ်ရေးအတွက် တောင်းဆိုလိုက်သည်။

OPEC+ အဖွဲ့သည် ရေနံတင်ပို့မှု လျော့ကျခြင်းနှင့်အတူ မကြုံစဖူးသော စိန်ခေါ်မှုများဖြင့် ရင်ဆိုင်နေရပြီး နှစ်ပေါင်း ၆၀ နီးပါး OPEC ၏ အဓိကအင်အားစုဖြစ်ခဲ့သည့် အာရပ်စော်ဘွားများပြည်ထောင်စု (UAE) သည် ဧပြီလတွင် ရေနံတင်ပို့သည့်နိုင်ငံများအဖွဲ့မှ နုတ်ထွက်သွားခဲ့သည်။

ကြာသပတေးနေ့တွင် ဆော်ဒီဝန်ကြီးနှင့် အခြားသော ထိပ်တန်း OPEC အရာရှိများသည် ရုရှားနိုင်ငံ၏ ထင်ရှားသော စီးပွားရေးဆိုင်ရာ စုဝေးပွဲဖြစ်သည့် စိန့်ပီတာစဘတ် နိုင်ငံတကာ စီးပွားရေးဖိုရမ်သို့ သွားရောက်ခဲ့ကြသည်။

"ကျွန်တော်တို့ အခုဖြတ်သန်းနေရတဲ့ အခြေအနေက အချက်တစ်ချက်ကို မီးမောင်းထိုးပြနေပါတယ်။ အဲဒါကတော့ ကမ္ဘာကြီးဟာ စွမ်းအင်တိုင်းကို လိုအပ်နေပြီး ဒီစွမ်းအင်အတွက် တည်ငြိမ်မှုပုံစံတိုင်းကိုလည်း လိုအပ်နေတာပါပဲ။ ဘာကြောင့်လဲဆိုတော့ စွမ်းအင်လုံခြုံမှုမရှိရင် ရေရှည်တည်တံ့ခိုင်မြဲမှုကိုပါ ဆုံးရှုံးသွားမှာဖြစ်လို့ပါပဲ" ဟု ဝန်ကြီးက ပြောကြားခဲ့သည်။

"အပြောင်းအလဲတွေက အများကြီးရှိနေသလို မသေချာမရေရာမှုတွေလည်း အများကြီးရှိနေပါတယ်။ တစ်ခုခုက အမှန်တရားဖြစ်လာပြီလို့ ထင်ထားပေမဲ့ နောက်တစ်နေ့မနက်မှာ နိုးထလာတဲ့အခါ အဲဒီအမှန်တရားက အမှန်တရားမဟုတ်တော့တာမျိုးတွေလည်း ရှိနေပါတယ်" ဟု ၎င်းက ဆက်လက်ပြောသည်။

ရုရှားနိုင်ငံမှ ၎င်း၏ လုပ်ဖော်ကိုင်ဖက်ဖြစ်သူ ဒုတိယဝန်ကြီးချုပ် အလက်ဇန္ဒား နိုဗက် (Alexander Novak) ကလည်း ၎င်း၏ သဘောထားကို ထောက်ခံပြောဆိုခဲ့သည်။

"လက်ရှိအချိန်မှာ ဝယ်လိုအားနဲ့ ပတ်သက်ပြီး ဘာကိုမျှော်လင့်ရမလဲဆိုတာ ဘယ်သူမှ အတိအကျ မသိကြဘူးဆိုတဲ့ ကောက်ချက်ကို ကျွန်တော်တို့ ရရှိခဲ့ပါတယ်။ တစ်နည်းအားဖြင့် ပြောရရင် မသေချာမရေရာမှုတွေက ပိုပြီးတိုးလာပါတယ်" ဟု ဆော်ဒီဝန်ကြီးနှင့် တွေ့ဆုံအပြီးတွင် နိုဗက်က ပြောကြားခဲ့သည်။

သို့သော်လည်း OPEC+ အနေဖြင့် ကမ္ဘာ့စွမ်းအင်ကဏ္ဍတွင် ဖြစ်ပေါ်နေသော အပြောင်းအလဲများကို ထိန်းညှိပေးနိုင်ခဲ့ကြောင်း နိုဗက်က ဖြည့်စွက်ပြောကြားခဲ့သည်။ "လွန်ခဲ့တဲ့ နှစ်အနည်းငယ်က ခန့်မှန်းချက်တွေကို အခုအခါမှာ အခြေခံကျကျ ပြန်လည်ပြင်ဆင်ဖို့ လိုအပ်နေပါတယ်" ဟု နိုဗက်က ဆိုသည်။

ရုရှားနိုင်ငံ၏ ရေနံထုတ်လုပ်မှုသည် နှစ်စပိုင်းမှစ၍ ကျဆင်းလာခဲ့ကြောင်း နိုဗက်က ပြောကြားခဲ့ပြီး ယင်းကျဆင်းမှုမှာ ရေနံချက်စက်ရုံများတွင် စီစဉ်ထားခြင်းမရှိသော ပြုပြင်ထိန်းသိမ်းမှုများကြောင့်ဖြစ်ကြောင်း အကြောင်းပြခဲ့သည်။ ရိုက်တာသတင်းဌာန၏ အဆိုအရ ရုရှားအရာရှိတစ်ဦးက ထုတ်လုပ်မှု ကျဆင်းနေကြောင်း ပထမဆုံးအကြိမ်အဖြစ် ပွင့်ပွင့်လင်းလင်း ဝန်ခံလိုက်ခြင်းဖြစ်သည်။

နိုဗက်အနေဖြင့် ရေနံချက်စက်ရုံ ပြုပြင်ထိန်းသိမ်းရသည့် အကြောင်းရင်းကို ထုတ်ဖော်ပြောကြားခြင်း မရှိသော်လည်း ယူကရိန်းနိုင်ငံသည် မကြာသေးမီလများအတွင်း ရုရှားရေနံချက်စက်ရုံများအပေါ် တိုက်ခိုက်မှုများကို ပိုမိုပြင်းထန်စွာ လုပ်ဆောင်လျက်ရှိသည်။

အမေရိကန်-အစ္စရေးတို့၏ အီရန်အပေါ် စစ်ပွဲကြောင့် ဟော်မုဇ်ရေလက်ကြား ပိတ်ဆို့သွားခြင်းနှင့် ပင်လယ်ကွေ့ OPEC အဖွဲ့ဝင်နိုင်ငံများအပြင် အဖွဲ့ဝင်ဟောင်းဖြစ်သည့် UAE တို့၏ ရေနံတင်ပို့မှု အတင်းအကျပ် လျှော့ချရမှုများကြောင့် ရေနံထုတ်လုပ်မှု ခွဲတမ်းတိုးမြှင့်ရန် သဘောတူညီချက်များသည် လက်တွေ့တွင် အဓိပ္ပာယ်မဲ့သလို ဖြစ်နေသည်။

ရိုက်တာသတင်းဌာန၏ ဖော်ပြချက်အရ ဆော်ဒီအာရေဗျ၊ ရုရှားနှင့် အခြား OPEC+ နိုင်ငံ ၅ နိုင်ငံတို့သည် တနင်္ဂနွေနေ့တွင် တွေ့ဆုံကြသည့်အခါ ဇူလိုင်လအတွက် ၎င်းတို့၏ ထုတ်လုပ်မှုပန်းတိုင်ကို ထပ်မံတိုးမြှင့်ရန် သဘောတူညီဖွယ်ရှိကြောင်း အမည်မဖော်လိုသူ သတင်းရင်းမြစ်များကို ကိုးကား၍ ဖော်ပြထားသည်။