အပစ်ရပ် မွန်ပြည်သစ်ပါတီ ထိန်းချုပ်နယ်မြေ ချောင်းနှစ်ခွရွာကို စစ်တပ်ဗုံးကြဲ

မွန်ပြည်နယ် ရေးမြို့နယ်က စစ်တပ်နဲ့အပစ်ရပ်စာချုပ် လက်မှတ်ရေးထိုးထားတဲ့ မွန်ပြည်သစ်ပါတီ (NMSP) ထိန်းချုပ် ချောင်းနှစ်ခွရွာကို အာဏာရှင်စစ်တပ်က ဗုံးကြဲတိုက်ခိုက်ခဲ့တာကြောင့် နေအိမ် ၆ လုံး ပျက်စီးသွားတယ်လို့ ဒေသခံတွေဆီက သိရပါတယ်။

ချောင်းနှစ်ခွရွာမှာရှိတဲ့ နီပွန်ဖောင်ဒေးရှင်းကနေ ဆောက်ပေးတဲ့ အဆောက်အဦတွေကို စစ်တပ်က ဒီနေ့ ဇွန် ၁၈ ရက် မနက်အစောပိုင်း ၁ နာရီခွဲဝန်းကျင်မှာ ပေါင် ၅၀၀ ဗုံးနှစ်လုံး ကြဲချတာဖြစ်ပြီး အရပ်သားတွေ ထိခိုက်မှုမရှိဘူးလို့ ဆိုပါတယ်။

ဒေသခံတယောက်က “တကယ်ကဗျာ အဲဒီဒေသမှာ တော်လှန်ရေးအင်အားစုတွေ နေကြတာရှိတယ်။ သတင်းကြိုရလို့ ရှောင်လိုက်ကြတာ။ ဗုံးကြဲခံရတဲ့နေရာက မွန်ပြည်သစ်ပါတီရဲ့ ရုံးနဲ့ ဘေးကပ်လျက်ပဲ။ စာသင်ကျောင်းရှိတယ်၊ ဆေးရုံရှိတယ်ဗျ။ ဗုံးက ၂ နှစ်လုံးကြဲတာ။ နီပွန်ဖောင်ဒေးရှင်းက ဆောက်ပေးထားတဲ့အိမ် ၆ အိမ်ပျက်စီးတယ်။ အဲဒီမှာနေတာက မွန် ပြည်သစ်ပါတီရဲ့ ရဲဘော်တွေ၊ မိသားစုဝင်တွေ၊ အငြိမ်းစားယူထားသူတွေ နေကြတာ။ လေယာဉ်က နှစ်ကြိမ်လာကြဲတာ။ ပထမတကြိမ် တလုံးကြဲပြီး ပြန်လှည့်သွားတာ စက္ကန့် ၃၀ လောက်ပဲ ကြာတာယ် ပြန်လာပြီးကြဲတာ” လို့ DVB ကိုပြောပါတယ်။

အဲဒီနေရာဟာ မွန်ပြည်သစ်ပါတီ တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးပြီးနောက်မှာ နီပွန်ဖောင်ဒေးရှင်းက ပြန်လည်ထူထောင်ရေးအတွက် တည်ဆောက်ပေးထားတဲ့ နေရာလည်း ဖြစ်ပါတယ်။

အခုလို ဗုံးကြဲတိုက်ခိုက်တာဟာလည်း ဇွန် ၉ ရက်နေ့က 7 EAO Alliance ညှိနှိုင်းရေးအဖွဲ့နဲ့ စစ်တပ်ရဲ့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) တို့ နေပြည်တော်မှာ တွေ့ဆုံမှုအပြီး တိုက်ခိုက်ခံရတာလည်း ဖြစ်ပါတယ်။

အခုလို ဗုံးကြဲတိုက်ခိုက်ခံရတာကိုတော့ မွန်ပြည်သစ်ပါတီဘက်က ထုတ်ပြန်ပြောဆိုတာ မရှိသေးပါဘူး။