လင့်ခ်အင် ပူးတွဲတည်ထောင်သူ ရိဒ် ဟော့ဖ်မန်း မိုက်ခရိုဆော့ဖ်ဘုတ်အဖွဲ့မှ နုတ်ထွက်မည်

ဇွန်လ ၅ ရက် : ကွန်ရက်ချိတ်ဆက်ရေး ဝက်ဘ်ဆိုက် LinkedIn ကို ပူးတွဲတည်ထောင်သူ ဘီလျံနာ ရိဒ် ဟော့ဖ်မန်း (Reid Hoffman) သည် ၂၀၂၆ ခုနှစ် နှစ်ပတ်လည် ရှယ်ယာရှင်များအစည်းအဝေးတွင် Microsoft ၏ ဒါရိုက်တာဘုတ်အဖွဲ့ဝင်အဖြစ် ပြန်လည်အရွေးခံရန် ဆုံးဖြတ်ခဲ့ခြင်းမရှိကြောင်း အဆိုပါ ဆော့ဖ်ဝဲလ်ကုမ္ပဏီကြီးက သောကြာနေ့တွင် တင်ပြသည့် အစီရင်ခံစာ၌ ပြောကြားခဲ့သည်။

၂၀၁၇ ခုနှစ်ကတည်းက ဘုတ်အဖွဲ့ဝင်အဖြစ် တာဝန်ထမ်းဆောင်ခဲ့သော ဟော့ဖ်မန်းသည် အစည်းအဝေးကျင်းပချိန်အထိ ဆက်လက်တာဝန်ယူသွားမည်ဖြစ်သည်။ ၎င်း၏ ဆုံးဖြတ်ချက်သည် မူဝါဒ သို့မဟုတ် လုပ်ငန်းလည်ပတ်မှုဆိုင်ရာ ကိစ္စရပ်များနှင့်ပတ်သက်၍ အမှုဆောင်အရာရှိများနှင့် သဘောထားကွဲလွဲမှုကြောင့် မဟုတ်ကြောင်း Microsoft က ပြောကြားခဲ့သည်။

၂၀၁၆ ခုနှစ်တွင် ၎င်းသည် LinkedIn ကို Microsoft သို့ အမေရိကန်ဒေါ်လာ ၂၆.၂ ဘီလီယံဖြင့် ရောင်းချခဲ့ရာ ထိုအချိန်က နည်းပညာကုမ္ပဏီကြီး၏ အကြီးဆုံးသော သဘောတူညီမှုဖြစ်ခဲ့သည်။ ထိုအချိန်မှစ၍ အဆိုပါ လူမှုကွန်ရက်ပလက်ဖောင်းတွင် အဖွဲ့ဝင် ၁.၃ ဘီလီယံကျော်အထိ တိုးတက်လာခဲ့သည်။

ဟော့ဖ်မန်းသည် ၂၀၂၂ ခုနှစ်တွင် မူစတာဖာ ဆူလေမန်း (Mustafa Suleyman) နှင့်အတူ Inflection AI ကို ပူးတွဲတည်ထောင်ခဲ့ပြီး လျင်မြန်စွာ တိုးတက်နေသော ကဏ္ဍတွင် ဦးဆောင်နိုင်ရန် ကြိုးပမ်းခဲ့သည်။

၎င်းသည် ၂၀၁၀ ခုနှစ်တွင် Airbnb ၏ Series A ရန်ပုံငွေရှာဖွေမှုတွင် ရင်းနှီးမြှုပ်နှံမှုကို ဦးဆောင်ခဲ့ပြီး ၂၀၁၈ ခုနှစ်တွင် Greylock Partners အမည်ရှိ စွန့်ဦးတီထွင်လုပ်ငန်း ရင်းနှီးမြှုပ်နှံမှုကုမ္ပဏီမှတစ်ဆင့် ကိုယ်ပိုင်မောင်းနှင်သည့် ကားကုမ္ပဏီ Aurora ကို ထောက်ပံ့ခဲ့သည်။