နွေဦးတော်လှန်ရေး နေ့စဉ်မှတ်စု (၁၄ ဇွန် ၂၀၂၆ )

အမျိုးသားညီညွတ်ရေး အစိုးရ

-မန္တလေးတိုင်းဌာနချုပ်နယ်မြေအတွင်း မေလနှင့်ဇွန်လ ပထမပတ်တိုက်ပွဲများ၌ စစ်တပ်ဘက်က ဗိုလ်မှူးချုပ် အောင်နိုင်ဦးနှင့် ဗိုလ်မှူးချုပ် သူရဝဏ္ဏလွင်တို့ ပြင်းထန်စွာဒဏ်ရာရခဲ့ပြီး ၁၈ ဦး သေဆုံးကြောင်း ပြည်သူ့ကာကွယ်ရေး တပ်မတော် (PDF) စစ်ရုံးချုပ်က ယနေ့ ထုတ်ပြန်သည်။

-မန္တလေးဒေသ၊ နွားထိုးကြီးမြို့နယ်အတွင်း လှည့်လည်စစ်ကြောင်းထိုးနေသည့် စစ်ကောင်စီတပ်ဖွဲ့ ဝင်များကို ဒရုန်းဖြင့် ဗုံးသီးကြဲချတိုက်ခိုက်ခဲ့ရာ စစ်ကောင်စီတပ်သား ၁၁ ဦးခန့် သေဆုံးခဲ့ကြောင်း နွားထိုးကြီးမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ထားသည်။

-မန္တလေးတိုင်း၊ ချမ်းမြသာစည်မြို့နယ်အနီး မြေအောက်အနက် ၈ ကီလိုမီတာခန့်ကို ဗဟိုပြုပြီး ရစ်ခ်တာစကေး ၄.၀ အဆင့်ရှိ အင်အားအနည်းငယ်သော မြေငလျင်တစ်ခုသည် ဇွန်လ ၁၁ ရက်နေ့ မြန်မာစံတော်ချိန် ည ၁၁ နာရီ ၃၂ မိနစ်ခန့်တွင် လှုပ်ခတ်ခဲ့ကြောင်း လူမှုရေးရာ၊ အလုပ်သမားနှင့် လူသားချင်းစာနာထောက်ထားရေးဝန်ကြီးဌာနက ထုတ်ပြန်ထားသည်။

တော်လှန်ရေး လှုပ်ရှားမှုများ

-နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ၈၁ နှစ်မြောက် မွေးနေ့အကြို အထိမ်းအမှတ် အဖြစ် ထိုင်းနိုင်ငံ၊ မဲဆောက်မြို့ရှိ မယ်တော်ဆေးခန်းတွင် အမျိုးသားဒီမိုကရေစီအဖွဲ့ချုပ် (NLD) ဗဟိုအမျိုးသမီးကော်မတီက ဦးဆောင်၍ နိုင်ငံရေးတက်ကြွလှုပ်ရှားသူများနှင့်အတူ အလှူအတန်း ပြုလုပ်ခဲ့ကြောင်း သိရသည်။

-မြန်မာနိုင်ငံမှာ ကမ္ဘာ့ဖလားထုတ်လွှင့်ခွင့်ရရှိထားသည့် အာဏာသိမ်းစစ်တပ် နှင့် ဗီယက်နမ်စစ်တပ် ပူးပေါင်းပိုင်သည့် Mytel ၏ TV360 စာမျက်နှာကို ဖေ့စ်ဘွတ်ခ်က ဖယ်ရှားလိုက်ကြောင်း Justice For Myanmar-JFM က အသိပေးထားသည်။

-နိုင်ငံတော်၏ အတိုင်ပင်ခံပုဂ္ဂိုလ်နှင့် လူထုခေါင်းဆောင် ဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့ရက်မြတ်ကို ကြိုဆိုဂုဏ်ပြုသည့်အနေဖြင့် ကိုရီးယားနိုင်ငံတွင် မီးထွန်းဆုတောင်းသည့် ဆီမီးသပိတ်တစ်ရပ်ကို ပြုလုပ်ခဲ့ကြောင်း မြန်မာနွေဦးတော်လှန်ရေး ထောက်ခံသူများ (ကိုရီးယား) ထံမှ သိရသည်။

-စစ်ကိုင်းတိုင်း၊ ရွှေဘိုမြို့နယ်အတွင်း နှင်းဆီလှုပ်ရှားမှု (ROSE Movement: Roses of Hope) အတွက် လက်ကမ်းစာစောင်များ ဖြန့်ဝေခဲ့ကြောင်း ရွှေဘိုမြို့နယ် သပိတ်အင်အားစုက အသိပေးထုတ် ပြန်ထားသည်။

-မကွေးတိုင်း၊ မကွေးမြို့ရှိ အကျဉ်းထောင်တွင် ဖမ်းဆီးထိန်းသိမ်းခံထားရသည့် နိုင်ငံရေးအကျဉ်းသား ၄၂ ဦးကို တိုက်ပိတ်ထားပြီး ၎င်းတို့အနက် နိုင်ငံရေးအကျဉ်းသား ၁၂ ဦးမှာ ပြင်းထန်စွာ ရိုက်နှက်နှိပ်စက်ခံ ထားရသဖြင့် အသက်အန္တရာယ် စိုးရိမ်ရသည့် အခြေအနေတွင် ရှိနေကြောင်း မုံရွာလူထုသပိတ်တိုက်ပွဲ ဦးဆောင်ကော်မတီက ယမန်နေ့က ထုတ်ပြန်ထားသည်။

-စစ်ကိုင်းတိုင်း၊ ဆားလင်းကြီးမြို့နယ်နှင့် ယင်းမာပင်မြို့နယ်တို့တွင် စစ်ကြောင်းထိုးနေသည့် စစ်ကောင်စီ တပ်ဖွဲ့ဝင်များကို တော်လှန်ရေးတပ်ဖွဲ့များက တိုက်ခိုက်ခဲ့ရာ စစ်ကောင်စီတပ်သား ၅၈ ဦး သေဆုံးခဲ့ ကြောင်း Black Shadow PDF က ယမန်နေ့က ထုတ်ပြန်ထားသည်။

-မကွေးတိုင်း၊ ဂန့်ဂေါမြို့နယ်၊ ရှောက်ပင်ကျေးရွာရှိ စစ်ကောင်စီတပ်စခန်းဂိတ်ကို ပြည်သူ့ကာကွယ် ရေးတပ်ဖွဲ့က ဝင်ရောက်တိုက်ခိုက်ခဲ့ရာ စစ်ကောင်စီဘက်မှ ၃ ဦး သေဆုံးပြီး သေနတ် ၅ လက် သိမ်းဆည်းရမိခဲ့ကြောင်း ဂန့်ဂေါမြို့နယ် ပြည်သူ့ကာကွယ်ရေးတပ်ဖွဲ့ (နဂါးညီနောင်) ထံမှ သိရသည်။

-မြန်မာစစ်တပ်ထံ ဥရောပသမဂ္ဂ (EU) ၏ ပိတ်ဆို့အရေးယူမှုများကို လျစ်လျူရှုကာ “Coast Watcher” ဟုခေါ်သည့် ကမ်းရိုးတန်းစောင့်ကြည့်ရေး ရေဒါများ တိုက်ရိုက်ရောင်းချခဲ့သည့် ပြင်သစ် Thales ကုမ္ပဏီကို ပြင်းပြင်းထန်ထန် ရှုတ်ချကြောင်းနှင့် ၎င်းအား ဥပဒေအရ အရေးယူပေးရန် မြန်မာနှင့် နိုင်ငံတကာ လူ့အခွင့်အရေးအဖွဲ့များက ပြင်သစ်အစိုးရထံoသို့ ပူးတွဲတောင်းဆိုလိုက်ကြသည်။

-မကွေးတိုင်း၊ ရေစကြိုမြို့အဝင်တွင် အကြမ်းဖက် စစ်တပ်က ဈေးဝယ်လာသည့်ကားများကို ဖမ်းဆီးပြီး ပြည်သူများကို ရိုက်နှက်ကာ တစ်ဦးလျှင် ငွေကျပ် ၂ သောင်းတောင်းခံနေကြောင်း Yesagyo Township Info Committee ထံမှ သိရသည်။

-စစ်ကိုင်းတိုင်း၊ ချောင်းဦးမြို့နယ်တွင် အကြမ်းဖက် စစ်တပ်က ကျေးရွာများကို ဒရုန်း၊ လက်နက်ကြီးများ ဖြင့် တိုက်ခိုက်မှု ပြည်သူ ၃ ဦးသေဆုံးပြီး မြေပြင်စစ်ကြောင်းကလည်း ကျေးရွာ ၃ ခုကို မီးရှို့ဖျက်ဆီး ခြင်းကြောင့် နေအိမ် ၂၀၀ မီးလောင်ခဲ့ပြီး ပြည်သူများ ထွက်ပြေးနေရကြောင်း စစ်ကိုင်းပြည်သူ ဖေးမကူကွန်ရက် ထုတ်ပြန်ထားသည်။

တိုင်းရင်းသား လက်နက်ကိုင်များ

-မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) က လူသတ်မှုကျူးလွန်သူ အမျိုးသား ၄ ဦးကို ကိုးကန့်အထူးဒေသ (၁) လောက်ကိုင်မြို့၌ ယမန်နေ့တွင် လူထုရှေ့ လှည့်လည်ပြသပြီးနောက် သေနတ်ဖြင့်ပစ်သတ်ကာ သေဒဏ်စီရင်ခဲ့ကြောင်း The Kokang သတင်းဌာနက ဖော်ပြသည်။

စစ်ကောင်စီ

-လျှပ်စစ်မီတာ ဖွင့်၍ ပြုပြင်ကာ ဓာတ်အားခိုးယူသုံးစွဲသဖြင့် မြောင်းတကာစက်မှုဇုန်ရှိ လုပ်ငန်းရှင် တစ်ဦးကို အမှုဖွင့် အရေးယူထားကြောင်း လျှပ်စစ်နှင့်စွမ်းအင်ဝန်ကြီးဌာနမှ သိရသည်။

-မြစ်ကြီးနား လမ်းကြောင်းတစ်လျှောက်ရှိ မြို့၊ ရွာများ၌ ပြန်လည် ထူထောင်ရေးလုပ်ငန်းများ ဆောင်ရွက်ရန် အထောက်အကူပြုပစ္စည်းများနှင့် ထောက်ပံ့ရေးကုန်ပစ္စည်းများ တင်ဆောင်သည့် ယာဉ်များ တတိယအကြိမ် မြစ်ကြီးနားမြို့သို့ ဇွန် ၁၃ ရက်ထပ်မံရောက်ရှိကြောင်း စစ်အုပ်စုက ထုတ်ပြန်သည်။

-မြဝတီမြို့ဝန်းကျင်ရှိ ဆိုက်များအတွင်းသို့ တရားမဝင်လမ်းကြောင်းမှတစ်ဆင့် ဝင်ရောက်နေသည့် တရုတ်နိုင်ငံသား လေးဦး ထပ်မံဖမ်းဆီးရမိ‌ကြောင်း သိရသည်။

-မိုးကုတ်ရတနာမြေမှ ရှာဖွေတွေ့ရှိသည့် အလေးချိန် ၁၄၃၀၀ ဂရမ် (၇၁,၅၀၀ ကရက်) ရှိသည့် နီလာအရိုင်းတုံးကြီး နှင့် ၃၅၄ ဒသမ ၇၇ ဂရမ် (၁၇၇၃ ဒသမ ၈၅ ကရက်)ရှိသည့် နီလာပုံဆောင်ခဲတို့အား အာဏာသိမ်းအရပ်သားတပိုင်းစစ်အစိုးရအဖွဲ့ခေါင်းဆောင် မင်းအောင်လှိုင် ကြည်ရှုစစ်ဆေးခဲ့ကြောင်း သိရသည်။

-ရှမ်းပြည်နယ်(မြောက်ပိုင်း)၊ မူဆယ်မြို့အတွင်း အွန်လိုင်းလိမ်လည်မှုနှင့် လောင်းကစားလုပ်ငန်းများတွင် ပါဝင်ပတ်သက်သူ ၉၄ ဦးကို လုပ်ငန်းသုံးပစ္စည်းများနှင့်အတူ ဖမ်းဆီးရမိခဲ့ကြောင်း ဇွန်လ ၁၃ ရက်နေ့တွင် ထုတ်ပြန်ထားသည်။

-သဘာဝပတ်ဝန်းကျင်ထိန်းသိမ်းရေးနှင့် သဘာဝအခြေပြု စီးပွားရေးဖွံ့ဖြိုးမှုပုံစံများဖြစ်သည့် ဇီဝစီးပွားရေး (Bio Economy)၊ အစိမ်းရောင်စီးပွားရေး (Green Economy) နှင့် စက်ဝန်းပုံစီးပွားရေး (Circular Economy) လုပ်ငန်းများကို အကောင်အထည်ဖော် ဆောင်ရွက်သွားရန် လိုအပ်ကြောင်း အာဏာသိမ်းအရပ်သားတပိုင်းစစ်အစိုးရအဖွဲ့ခေါင်းဆောင် မင်းအောင်လှိုင်က ပြောသည်။

-၂၀၂၀ ပြည့်နှစ်နှင့် နှိုင်းယှဉ်ပါက သစ်တောဖုံးလွှမ်းမှုရာခိုင်နှုန်းမှာ ၀ ဒသမ ၀၄ ရာခိုင်နှုန်း လျော့နည်းသွားကြောင်း တွေ့ရှိရပြီး သစ်တောပြုန်းတီးမှုများ လုံးဝရပ်တန့်သွားစေရန် ဆက်လက်ကြိုးပမ်းဆောင်ရွက်သွားရမည်ဖြစ်ကြောင်း အာဏာသိမ်းအရပ်သားတပိုင်း စစ်အစိုးရအဖွဲ့ခေါင်းဆောင် မင်းအောင်လှိုင်က ပြောသည်။