မော်လ်တာနိုင်ငံတွင် ကြားဖြတ်ရွေးကောက်ပွဲအတွက် မဲပေးမှုများ စတင်နေပြီး အာဏာရပါတီ အနိုင်ရရှိမည်ဟု ခန့်မှန်းထား

မော်လ်တာနိုင်ငံ၏ လာမည့်ငါးနှစ်တာကာလအတွက် အစိုးရကို မည်သူဦးဆောင်မည်ကို ဆုံးဖြတ်ပေးမည့် ကြိုတင်ရွေးကောက်ပွဲအတွက် မဲပေးမှုများ စတင်နေပြီဖြစ်သည်။

အာဏာရ လေဘာပါတီ (Labour Party) နှင့် အလယ်အလတ်ဝါဒီ အမျိုးသားရေးပါတီ (Nationalist Party) တို့အကြား အဓိကယှဉ်ပြိုင်ရမည့် ရွေးကောက်ပွဲအတွက် မဲရုံများကို စနေနေ့တွင် ဖွင့်လှစ်ပေးခဲ့သည်။

လေဘာပါတီကို ဦးဆောင်နေသည့် ဝန်ကြီးချုပ် ရောဘတ် အဘီလာ (Robert Abela) သည် ကမ္ဘာ့ဈေးကွက်အပေါ် သက်ရောက်မှုရှိနေသည့် အီရန်စစ်ပွဲ၏ နောက်ခံအခြေအနေများကြောင့် ရွေးကောက်ပွဲကို သတ်မှတ်ရက်ထက် တစ်နှစ်စော၍ ခေါ်ယူကျင်းပခဲ့ခြင်းဖြစ်သည်။

ဟော်မုဇ်ရေလက်ကြား ပိတ်ဆို့မှုကြောင့် ဖြစ်ပေါ်လာသည့် စွမ်းအင်ဈေးနှုန်း မြင့်တက်မှုနှင့် ငွေကြေးဖောင်းပွမှုတို့သည် ၎င်း၏ပါတီအား စံချိန်တင် လေးကြိမ်မြောက် ဆက်တိုက် အာဏာရရှိရေးအတွက် အဟန့်အတားဖြစ်စေမည်ကို အဘီလာ စိုးရိမ်နေကြောင်း သတင်းများက ဖော်ပြသည်။

ယခုနှစ် ရွေးကောက်ပွဲတွင် စီးပွားရေးကိစ္စရပ်များက လွှမ်းမိုးထားပြီး အိမ်လခများ မြင့်တက်လာခြင်းနှင့် အခြေခံအဆောက်အအုံများ ယိုယွင်းလာခြင်းတို့သည် မဲဆန္ဒရှင်အများစု၏ အဓိက စိုးရိမ်ချက်များ ဖြစ်နေသည်။

ဥရောပသမဂ္ဂတွင် အသေးငယ်ဆုံးနှင့် လူဦးရေအထူထပ်ဆုံးနိုင်ငံဖြစ်သည့် မော်လ်တာတွင် လူဦးရေ ရုတ်တရက် တိုးပွားလာမှုကြောင့် ပြည်သူ့ကျန်းမာရေး ဝန်ဆောင်မှုလုပ်ငန်းများမှာလည်း ဖိအားများ တိုးမြင့်လာလျက်ရှိသည်။

ပြီးခဲ့သည့် ဆယ်စုနှစ်အတွင်း မော်လ်တာ၏ နိုင်ငံရေးနယ်ပယ်တွင် လေဘာပါတီက လွှမ်းမိုးထားနိုင်ခဲ့ပြီး၊ အဘီလာ၏ပါတီသည် ယခု ကြိုတင်ရွေးကောက်ပွဲတွင် အနိုင်ရရှိရန် အလားအလာကောင်းနေကြောင်း လူထုသဘောထား စစ်တမ်းများက ဖော်ပြနေသည်။

သို့သော်လည်း အမျိုးသားရေးပါတီ၏ ခေါင်းဆောင်သစ် အဲလက်စ် ဘော့ဂ် (Alex Borg) က လေဘာပါတီကို အနိုင်ယူပြီး အသက် ၃၀ အရွယ်ဖြင့် မော်လ်တာသမိုင်းတွင် အသက်အငယ်ဆုံး ဝန်ကြီးချုပ်ဖြစ်လာရန် မျှော်လင့်နေသည်။

ယခုရွေးကောက်ပွဲသည် ၂၀၁၇ ခုနှစ်တွင် ကားဗုံးခွဲတိုက်ခိုက်မှုကြောင့် လုပ်ကြံသတ်ဖြတ်ခံခဲ့ရသည့် စုံစမ်းထောက်လှမ်းရေး သတင်းထောက် ဒက်ဖနီ ကာရူအာနာ ဂါလီဇီယာ (Daphne Caruana Galizia) ၏ အရိပ်မည်းအောက်တွင် ကျင်းပနေခြင်းဖြစ်သည်။

ကာရူအာနာ ဂါလီဇီယာသည် မော်လ်တာနိုင်ငံ၏ အဂတိလိုက်စားမှုများကို ဖော်ထုတ်ခဲ့သူဖြစ်ပြီး သူမ၏ သေဆုံးမှုသည် နောက်ဆုံးတွင် ဝန်ကြီးချုပ်ဟောင်း ဂျိုးဇက် မူစကတ် (Joseph Muscat) ရာထူးမှ နုတ်ထွက်ရသည်အထိ ဖြစ်စေခဲ့သည်။

အစိုးရသည် သူမ၏သေဆုံးမှုအတွက် တာဝန်ရှိကြောင်း ပြည်သူ့စုံစမ်းစစ်ဆေးရေးအဖွဲ့က ကောက်ချက်ချခဲ့သော်လည်း တိုက်ရိုက်ပါဝင်ပတ်သက်မှုရှိကြောင်း အထောက်အထား မတွေ့ရှိခဲ့ပေ။

အဆိုပါ အစီရင်ခံစာတွင် အစိုးရသည် "ပြစ်ဒဏ်ကင်းလွတ်ခွင့်ရနေသည့် ပတ်ဝန်းကျင်" ကို ဖန်တီးပေးထားခဲ့သဖြင့် ကာရူအာနာ ဂါလီဇီယာကို သတ်ဖြတ်သူများအနေဖြင့် ၎င်းတို့၏ လုပ်ရပ်အတွက် မည်သည့်အရေးယူမှုမှ ခံရမည်မဟုတ်ဟု ယုံကြည်သွားစေခဲ့ကြောင်း ဖော်ပြထားသည်။

၂၀၂၅ ခုနှစ် ဇွန်လတွင် သူမကို သတ်ဖြတ်ခဲ့သည့် ကားဗုံးကို ထောက်ပံ့ပေးခဲ့သူ အမျိုးသားနှစ်ဦးကို တစ်သက်တစ်ကျွန်း ထောင်ဒဏ် ချမှတ်ခဲ့သည်။

ရွေးကောက်ပွဲရလဒ်များကို တနင်္ဂနွေနေ့ မွန်းတည့်အချိန်ခန့်တွင် ကြေညာရန် မျှော်လင့်ထားသည်။