ကူရာစောင်အသင်းအနေဖြင့် ကမ္ဘာ့ဖလားပြိုင်ပွဲတွင် ပထမဆုံးအကြိမ် ပါဝင်ယှဉ်ပြိုင်ရခြင်း၌ ဆုံးရှုံးစရာမရှိကြောင်း အက်ဗိုကတ် ပြောကြား

ဟူစတန်၊ ဇွန် ၁၃

ကူရာစောင်အသင်းသည် တနင်္ဂနွေနေ့တွင် ဟူစတန်၌ ဂျာမနီအသင်းနှင့် ယှဉ်ပြိုင်ရမည့် ကမ္ဘာ့ဖလားပွဲဦးထွက်တွင် ဆုံးရှုံးစရာမရှိကြောင်းနှင့် ဗိုလ်လုပွဲအဆင့်တွင် အနှောင့်အယှက်ပေးနိုင်မည့် အစီအစဉ်ရှိကြောင်း နည်းပြ ဒစ်ခ် အက်ဒ်ဗိုကတ်က ပြောကြားလိုက်သည်။

နယ်သာလန်နိုင်ငံတွင် နေထိုင်ကြသည့် ၎င်းတို့၏ လူမျိုးစုဝင် ကစားသမားများကို အဓိကအားထားနေရသည့် ကူရာစောင်အသင်းသည် ကမ္ဘာ့ဖလားသို့ ဝင်ရောက်ယှဉ်ပြိုင်ခွင့်ရသည့် လူဦးရေနှင့် နယ်မြေအရ အသေးငယ်ဆုံးနိုင်ငံဖြစ်သော်လည်း ကြီးမားသော ရည်မှန်းချက်များရှိပြီး မည်သည့်ပြိုင်ဘက်ကိုမျှ အညံ့ခံမည်မဟုတ်ပေ။

"ကျွန်တော်တို့ဟာ ဂျာမနီနဲ့ယှဉ်ရင် သေးငယ်တဲ့နိုင်ငံဖြစ်ပေမဲ့ သူတို့အတွက် ခက်ခဲအောင်လုပ်ဆောင်သွားမှာဖြစ်ပြီး ရင်ဆိုင်ရခက်တဲ့အသင်းဖြစ်လာမှာပါ" ဟု အက်ဒ်ဗိုကတ်က စနေနေ့တွင် သတင်းထောက်များအား ပြောကြားခဲ့သည်။

"တစ်ခါတရံမှာ အသင်းငယ်တွေ၊ အပျော်တမ်းအသင်းတွေက အသင်းကြီးတွေကို အနိုင်ယူနိုင်တာမျိုး ဖြစ်လေ့ရှိပါတယ်။ နယ်သာလန်မှာဆိုရင် ဒါမျိုးက ပုံမှန်ဖြစ်လေ့ရှိပါတယ်။"

"ဂျာမနီက ပွဲကို ထိန်းချုပ်ကစားမယ့်အသင်းဖြစ်ပြီး ကျွန်တော်တို့ကတော့ အဲဒါကို တုံ့ပြန်ရမှာပါ။ ဂျာမနီအသင်း (တိုက်စစ်ဆင်တဲ့အခါ) ချန်ထားခဲ့မယ့် နေရာလွတ်တွေကို ကျွန်တော်တို့ အသုံးချပြီး အကျိုးအမြတ်ယူသွားမှာဖြစ်ပါတယ်" ဟု ၎င်းက ဆိုသည်။

အသက် ၇၈ နှစ်အရွယ်ရှိ အက်ဒ်ဗိုကတ်သည် တနင်္ဂနွေနေ့တွင် ကမ္ဘာ့ဖလားသမိုင်းတစ်လျှောက် အသက်အကြီးဆုံးနည်းပြ ဖြစ်လာမည်ဖြစ်ပြီး ၎င်း၏အသင်းမှာ ဖိအားမရှိကြောင်း ပြောကြားခဲ့သည်။

"ကျွန်တော်တို့မှာ ဆုံးရှုံးစရာမရှိပါဘူး။ အသင်းပြင်ပကနေ ကြည့်ရင်တော့ မျှော်လင့်ချက် သိပ်မရှိကြပါဘူး၊ ဒါပေမဲ့ ကျွန်တော်တို့ကတော့ လူတွေကို အံ့အားသင့်စေနိုင်မယ်လို့ ယုံကြည်ပါတယ်။ ဒီကိုရောက်လာတာတင်ကိုပဲ ကစားသမားတွေနဲ့ နိုင်ငံအတွက် အလွန်ကောင်းမွန်တဲ့ကိစ္စဖြစ်ပေမဲ့ ကျွန်တော်တို့ရဲ့ အရည်အချင်းကိုလည်း လူတွေကို ပြသရမှာဖြစ်ပါတယ်" ဟု ၎င်းက ဆိုသည်။

တောင်ကိုရီးယားနှင့် နယ်သာလန်အသင်းတို့နှင့်အတူ ကမ္ဘာ့ဖလားတွင် ပါဝင်ခဲ့ဖူးသည့် ၎င်း၏ ရှည်လျားသော နည်းပြသက်တမ်းတစ်လျှောက် အသင်းအတွင်းရှိ လေထုမှာ အကောင်းဆုံးဖြစ်ကြောင်း အက်ဒ်ဗိုကတ်က ချီးကျူးပြောဆိုခဲ့သည်။

"ဒီအသင်းရဲ့ စုစည်းညီညွတ်မှုက ကျွန်တော် တစ်ခါမှ မကြုံဖူးတဲ့အရာမျိုးပါပဲ။ ဒီကျွန်းနိုင်ငံအတွက် ကျွန်တော်တို့မှာ ရရှိလာမယ့်အရာတွေပဲ ရှိပါတယ်၊ ဒီအသင်းရဲ့ တစ်စိတ်တစ်ပိုင်းဖြစ်ရတာ အံ့ဩဖို့ကောင်းပါတယ်။ အသင်းက ဘာတွေအောင်မြင်ခဲ့လဲဆိုတာကို မြင်ရတဲ့အခါ နည်းပြတစ်ယောက်အနေနဲ့ ဂုဏ်ယူမိပါတယ်" ဟု ၎င်းက ပြောကြားခဲ့သည်။

ပွဲစဉ်မတိုင်မီ အသင်းအတွင်း ကစားသမားများအားလုံး ကျန်းမာရေးကောင်းမွန်ကြောင်း အက်ဒ်ဗိုကတ်က အတည်ပြုပြောကြားခဲ့သည်။

"အားလုံးပဲ ကြံ့ခိုင်မှုပြည့်ဝပြီး ကစားနိုင်ပါတယ်၊ လူတိုင်းလည်း လန်းဆန်းနေကြပါတယ်" ဟု ၎င်းက ဆိုသည်။

အီကွေဒေါနှင့် အိုင်ဗရီကို့စ်အသင်းတို့မှာလည်း အဆိုပါအုပ်စုတွင် ပါဝင်နေသည်။