ကာကင်းစခန်းများကိုAA သိမ်းပိုက်ပြီးနောက် တောင်မော်ဦးရေတပ်စခန်းကို ထိုးစစ်ဆင်တိုက်ခိုက်

နိရဉ္စရာ၊ ဇွန်၅/ ၂၀၂၆

ကျောက်ဖြူမြို့နယ်၊ ဓည၀တီရေတပ်ဌာနချုပ်ခွဲ၊ တောင်မော်ဦးရေတပ်စခန်း၏ နှစ်နှင့်ချီအခိုင်အမာ တည်ဆောက်ထားသော ကာကင်းစခန်းများကို အာရက္ခတပ်တော်(AA)က အပြီးသတ်သိမ်းပြီးနောက် နောက်ဆုံးလက်ကျန်တောင်မော်ဦး(ခ)တောင်မော်ကြီးရေတပ်စခန်းကို ဆက်လက်ထိုးစစ်ဆင်တိုက်ခိုက်နေပြီဖြစ်ကြောင်းသတင်းရရှိသည်။

“ စစ်တပ်အမာခံကာကင်းတွေ အကုန်ကျသွားပြီ။ စကမ စစ်ကြောင်းတွေက ဖရိုဖရဲဖြစ်ပြီး တောင်မော်ဦး ရေတပ်ကိုနောက်ဆုတ်သွားတယ်။ အေဒါ AA က လိုက်တိုက်နေပါတယ်”ဟု စစ်ရေး ရင်းမြစ်တစ်ခုက နိရဉ္စရာကို ပြောသည်။

မေလနောက်ဆုံးအပတ်တွင်နှစ်ဖက်တိုက်ပွဲပြင်းထန်ခဲ့ပြီးဇွန်လဆန်း၌ စစ်တပ်ဖက်ကလက်ကျန် အင်အားများကို စုပေါင်းကာ ကာကင်းစခန်းများကိုကာကွယ်ခဲ့သော်လည်း အကျဆုံးများပြားလာပြီးနောက်လက်လွှတ်ကာနောက်ဆုတ်သွားခဲ့ရသည်ဟု နိရဉ္စရာကို ၎င်းက ဆက်လက် ပြောဆိုသည်။

"နှစ်ဖက်တိုက်ပွဲက အဲဒီမေလကုန်တုန်းကတအားအပြင်းအထန်ဖြစ်ခဲ့တယ်။မိုးကလည်းရွာတုန်းဆိုတော့ လေကြောင်းပစ်ကူမရဘူး။ စကစ ဖက်ကလည်း မြေပြင်ကအင်အားဖြည့်ပြီးပြန်ထိုးတယ်။AA ဖက်ကလည်း တန်ပြန်ထိုးစစ်ဆင်တယ်။နောက်တော့စကစဘက်က အကျဆုံးများတယ်။ကာကင်းအထိုင်ကုန်းတွေကို စစ်ကြောင်းကလက်ကျန်တွေနောက်ဆုတ်သွားခဲ့တယ်။သူတို့ ပူးပေါင်းပြီး ကာကွယ်ခဲ့သေးတယ်။ ဒါပေမယ့် မနိုင်ဘူး။ အခုတော့ ကာကင်းတွေကို လက်လွှတ်ပြီး ဆုတ်သွားကြပြီ"ဟု ပြောဆိုသည်။

မေလကုန်မှ ဇွန်လ ၂ ရက်နေ့အကြားတွင် အရေးပါသောကာကင်းများကိုAA ကသိမ်းပိုက်ရရှိခဲ့သည်ဟုသူကဆက်ပြောသည်။

“ စနဲကို ထိုးစစ်ဆင်တဲ့ စစ်ကြောင်းတွေထဲက ဒဏ်ရာရသူတွေ နောက်ဆုတ်လာတဲ့ စစ်သားတွေကအဲဒီ ကာကင်းတွေမှာ တစ်ထောက် ခိုအောင်းတယ်။အဲဒါကဒါကို နားချိန်မပေးဘူး။ကာကင်းတွေကို AA ကတပြိုင်နက်တည်းအင်နဲ့အားနဲ့ဝင်စီးတယ်။တိုက်ပွဲအပြင်းအထန် ဖြစ်ခဲ့တယ်။စကစဖက်ကတော့ သေဆုံးမူများခဲ့တယ်။အေအေဘက်ကလည်းပေးဆပ်ရမှုတချို့ရှိပါတယ်”ဟု ပြောဆိုသည်။

အာရက္ခတပ်တော်မှ ကာကင်းစခန်းများမှ အလောင်းများနှင့် လက်နက်ခဲယမ်းများကိုထပ်မံ သိမ်းဆည်းရမိသည်ဟုသိရသည်။

တောင်မော်ဦးရေတပ်စခန်းသည်တရုတ်ရေနံတင်ဆိပ်ကမ်းရှိရာ မဒေးကျွန်း တောင်ဘက် ၃ မိုင်ခန့်အကွာတွင် တည်ရှိပြီး အဆိုပါစခန်းမှနေ၍ အာရက္ခတပ်တော်ရှိရာ စနဲမြို့ကို စတင် ထိုးစစ်ဆင် တိုက်ခိုက်ခဲ့ခြင်းဖြစ်သည်။

အာဏာသိမ်းစစ်တပ်သည် စနဲမြို့ကို သိမ်းပြီး ရမ်းဗြဲမြို့နယ်နှင့်ကျောက်ဖြူမြို့နယ်ကို အလယ်က ကားလမ်းအတိုင်း ဖြတ်တောက်စိုးမိုးရန် ရည်ရွယ်ချက်ဖြင့် စစ်ဆင်ရေးတစ်ရပ်ကို မျှော်လင့်​ချက်ကြီးမားစွာဖြင့်ပြုလုပ်ခဲ့သော်လည်း အာရက္ခတပ်တော်၏ ပြန်လည်ခုခံမှုနှင့် တန်ပြန်ထိုးစစ်ကို မတားနိုင်ဆီးနိုင်ဘဲနောက်ဆုံးအရှုံးနှင့် ရင်ဆိုင်သွားခဲ့ရသည်ဟု သိရသည်။

ထိုသို့စနဲထိုးစစ် အရှုံးနှင့် ရင်ဆိုင်သွားရပြီးနောက် အခဲမကျေဖြစ်နေသော စစ်ရှုံး အာဏာသိမ်းစစ်တပ်သည်စနဲမြို့ အပါအဝင် ကျောက်ဖြူမြို့နယ်နှင့် ရမ်းဗြဲမြို့နယ်ထဲကလူနေကျေးရွာများ၊စစ်ဘေးရှောင်နေထိုင်ရာ နေရာများကို နေ့ရောညပါ လေယာဉ်ဖြင့်အုပ်စုလိုက်လာရောက် ဗုံးကြဲတိုက်ခိုက်ခြင်း၊စစ်ရေယာဉ်များမှ လက်နက်ကြီးများဖြင့် ပစ်ခတ်ခြင်း၊ ဒရုန်းဗုံးများချ၍  နေအိမ်များကိုမီးရှို့ခြင်းများ ဆက်လက်ပြုလုပ်နေသဖြင့် ထောင်နှင့်ချီသော ဒေသခံများသည် နေအိမ်များကို စွန့်ခွာကာ စစ်ပြေးရှောင်နေရသည်ဟု သိရသည်။