မွမ်ဘိုင်းမြို့တွင် ရေလှောင်ကန်များ ရေနည်းပါးလာသဖြင့် ရေပေးဝေမှုကို လျှော့ချ

မွမ်ဘိုင်း - ဆယ်စုနှစ်တစ်ခုကျော်အတွင်း အခြောက်သွေ့ဆုံး ဇွန်လကို ရင်ဆိုင်နေရသည့် အိန္ဒိယနိုင်ငံ၏ ငွေကြေးဗဟိုချက်မ မွမ်ဘိုင်းမြို့သည် ရေလှောင်ကန်များတွင် ရေပမာဏ လျော့နည်းလာသဖြင့် ဗုဒ္ဓဟူးနေ့ (ဇွန်လ ၁၇ ရက်) မှစတင်၍ ဆောက်လုပ်ရေးလုပ်ငန်းခွင်များသို့ ရေပေးဝေမှုကို ရပ်ဆိုင်းလိုက်ပြီး စက်မှုလုပ်ငန်းသုံး ရေအသုံးပြုမှုကို ၂၀ ရာခိုင်နှုန်း လျှော့ချလိုက်သည်။

နိုင်ငံ၏ အနောက်ဘက်ကမ်းရိုးတန်းတွင် တည်ရှိသော မွမ်ဘိုင်းမြို့သည် မြို့ပြင်ရှိ ရေကန်ခုနစ်ခုကို မှီခိုအားထားနေရပြီး လက်ရှိတွင် ယင်းရေကန်များ၌ စုစုပေါင်းရေသိုလှောင်နိုင်မှုပမာဏ၏ ၁၀.၃၅ ရာခိုင်နှုန်းသာ ကျန်ရှိတော့ကြောင်း တာဝန်ရှိသူများက ပြောကြားသည်။

ထိုအခြေအနေကြောင့် လူဦးရေ ၁၃ သန်းရှိသော မွမ်ဘိုင်းမြို့တွင် ရေအသုံးပြုရန် ရက်ပေါင်း ၄၀ စာသာ ကျန်ရှိတော့သည်။

ဗုဒ္ဓဟူးနေ့မှစတင်၍ ဆောက်လုပ်ရေးလုပ်ငန်းခွင်အားလုံးသို့ ရေပေးဝေမှုကို ခေတ္တဖြတ်တောက်သွားမည်ဖြစ်ပြီး အဆိုပါလုပ်ငန်းခွင်များအတွက် ရေသွယ်တန်းမှုအသစ်များကိုလည်း ဆိုင်းငံ့ထားမည်ဖြစ်ကြောင်း တာဝန်ရှိသူများက ပြောသည်။

စက်မှုလုပ်ငန်း၊ စီးပွားရေးလုပ်ငန်းများနှင့် အားကစားကလပ်များသို့ ပေးဝေနေသည့် ရေပမာဏကိုလည်း ၂၀ ရာခိုင်နှုန်း လျှော့ချသွားမည်ဖြစ်ကြောင်း မြို့တော်စည်ပင်သာယာရေးအဖွဲ့၏ အင်္ဂါနေ့နှောင်းပိုင်း ထုတ်ပြန်ချက်တွင် ဖော်ပြထားသည်။

မေလလယ်ပိုင်းကတည်းက တာဝန်ရှိသူများသည် ရေပေးဝေမှုကို ၁၀ ရာခိုင်နှုန်း လျှော့ချထားပြီးဖြစ်သည်။

မွမ်ဘိုင်းမြို့သည် မဟာရဋ္ဌပြည်နယ်၏ မြို့တော်ဖြစ်ပြီး ယင်းပြည်နယ်တွင် ဇွန်လ၏ ပထမ ၁၆ ရက်အတွင်း ပျမ်းမျှမိုးရေချိန်ထက် ၇၅ ရာခိုင်နှုန်း လျော့နည်းရွာသွန်းခဲ့ကြောင်း မိုးလေဝသအရာရှိတစ်ဦးက ပြောကြားသည်။

မုတ်သုံမိုးသည် ပုံမှန်အားဖြင့် ဇွန်လ ပထမပတ်တွင် မွမ်ဘိုင်းမြို့သို့ ရောက်ရှိလေ့ရှိသော်လည်း ယခုနှစ်တွင်မူ လကုန်ပိုင်းမှသာ ရောက်ရှိမည်ဟု ခန့်မှန်းထားသည်။

"ပုံမှန်အားဖြင့် ဇွန်လမှာ မွမ်ဘိုင်းမြို့က မုတ်သုံမိုးကြိုမိုးတွေကို ရရှိလေ့ရှိပြီး ဇွန်လလယ်လောက်မှာ မုတ်သုံမိုးက တည်ငြိမ်တဲ့ မိုးရေချိန်ကို ပေးစွမ်းပါတယ်" ဟု အဆိုပါအရာရှိက ပြောသည်။

မွမ်ဘိုင်းရှိ ဆောက်လုပ်ရေးလုပ်ငန်းခွင်အများစုသည် စီးပွားဖြစ်ရေတင်ကားများကို မှီခိုအားထားနေရကြောင်း CREDAI MCHI စက်မှုအဖွဲ့အစည်း၏ ဥက္ကဋ္ဌ Sukhraj Nahar က Reuters သို့ ပြောကြားခဲ့ပြီး မုတ်သုံမိုး မကြာမီ ရောက်ရှိလာတော့မည်ဖြစ်သဖြင့် လုပ်ငန်းများအပေါ် ကြီးမားသော သက်ရောက်မှုရှိရန် မဖြစ်နိုင်ကြောင်း ဖြည့်စွက်ပြောဆိုသည်။

"မိုးမရွာခင် ၁၀ ရက်လောက်အထိတော့ ကျွန်တော်တို့ အခြေအနေကို ထိန်းကျောင်းသွားမှာပါ။ ဒါပေမဲ့ ရေရှည်အတွက် ဘာတွေ စဉ်းစားထားသလဲ" ဟု မြို့၏ ထိပ်တန်း အိမ်ခြံမြေလုပ်ငန်းရှင်တစ်ဦးဖြစ်ပြီး Hiranandani Group ၏ မန်နေဂျင်းဒါရိုက်တာဖြစ်သူ Niranjan Hiranandani က Reuters သို့ ပြောကြားခဲ့သည်။

အိန္ဒိယနိုင်ငံသည် ၁၁ နှစ်အတွင်း အားအနည်းဆုံး မုတ်သုံမိုးကို ရင်ဆိုင်နေရပြီး ယင်းအခြေအနေကြောင့် စျေးကွက်နှင့် စားသုံးသူများကြားတွင် စိုက်ပျိုးရေးထွက်ကုန် လျော့နည်းမည်ကို စိုးရိမ်မှုများ မြင့်တက်လာသလို စားသောက်ကုန်စျေးနှုန်းများ မြင့်တက်လာမည်ကိုလည်း စိုးရိမ်နေကြသည်။