ပီရူးရဲများ ကမ္ဘာ့ဖလားလာဘ်ကောင်အရုပ်ဝတ်ကာ မူးယစ်ဆေးရောင်းဝယ်သူကို ဖမ်းဆီး

ပီရူးရဲတပ်ဖွဲ့ဝင်တွေဟာ မူးယစ်ဆေးဝါး မှောင်ခိုကူးသူလို့ သံသယရှိရသူတယောက်ကို ဖမ်းဆီးနိုင်ဖို့ ကမ္ဘာ့ဖလားအထိမ်းအမှတ် လာဘ်ကောင်အရုပ်ဝတ်စုံတွေ ဝတ်ဆင်ပြီး ဇွန် ၁၁ ရက်က မြို့တော် လီမာမှာ စစ်ဆင်ရေးတရပ် ဆောင်ရွက်ခဲ့ပါတယ်။

ရဲတပ်ဖွဲ့က မျှဝေထားတဲ့ ရုပ်သံဗီဒီယိုဖိုင်ထဲမှာ ကလပ်ချ် လင်းယုန်ငှက်ရုပ်နဲ့ မေပယ်လ် သမင်ရုပ် ဝတ်စုံတွေ ဝတ်ဆင်ထားတဲ့ ရဲတပ်ဖွဲ့ဝင်တွေဟာ သံတံခါးတခုကို ရိုက်ချိုးဖျက်ဆီးပြီး သံသယရှိသူ ကို လုံးထွေး ဖမ်းဆီးခဲ့ကြပါတယ်။

အခုလို ထူးထူးခြားခြား ဝတ်ဆင်ပြီး ဖမ်းဆီးရတာဟာ ရဲတပ်ဖွဲ့ရဲ့ ထောက်လှမ်းရေးနည်းဗျူဟာလို့ ရဲမှူးကြီး ကာလို့စ်အယ်လ်ကန်တာရာ အိုဘရီဂွန်က ပြောပါတယ်။

ထောက်လှမ်းရေးသတင်းအရ ဖမ်းဆီးခံရသူဟာ ကမ္ဘာ့ဖလား ဘောလုံးပွဲ ရူးသွပ်သူဖြစ်တာကြောင့် ရဲတပ်ဖွဲ့ဝင်တွေကို လာဘ်ကောင်ဝတ်စုံတွေ ဝတ်ဆင်စေခဲ့ကာ သံသယရှိသူက မရိပ်မိအောင် သူ့အနားကို အလွယ်တကူ ကပ်သွားပြီး ဖမ်းဆီးနိုင်ခဲ့တာလို့ ရှင်းပြပါတယ်။

ဒေသတွင်း မီဒီယာတွေရဲ့ ဖော်ပြချက်အရ အဆိုပါစစ်ဆင်ရေးအတွင်း အာဏာပိုင်တွေဟာ ကိုကင်း အခြေခံပစ္စည်း (CBP) ပါဝင်တဲ့ အထုပ်ပေါင်း ၂,၅၂၄ ထုပ်အပြင်၊ နောက်ထပ် ကိုကင်း အခြေခံ ပစ္စည်း ၂၁၀ ဂရမ် နဲ့ မာရီဝါနာ (ဆေးခြောက်) ၂၀၉ ဂရမ်တို့ကို သိမ်းဆည်းရမိခဲ့ပါတယ်။

ဒါ့အပြင် သေနတ် တလက်၊ ခဲယမ်းမီးကျောက်တွေနဲ့ ငွေသားအချို့ကိုပါ သိမ်းဆည်းရမိခဲ့တယ်လို့ ဆိုပါတယ်။

အခုလို ဖမ်းဆီးမှုတွေလုပ်ခဲ့တဲ့ ပီရူးရဲတပ်ဖွဲ့ခွဲဟာ ဟောလိုးဝင်းနဲ့ ခရစ္စမတ်လိုမျိုး အားလပ်ရက် ကာလတွေအတွင်း စစ်ဆင်ရေးတွေ ဆောင်ရွက်တဲ့အခါမှာ ရဲတပ်ဖွဲ့ဝင်တွေကို လူသိများတဲ့ ဇာတ်ကောင်ဝတ်စုံတွေ ဝတ်ဆင်ခိုင်းလေ့ ရှိပါတယ်။

အရင်တုန်းကလည်း ရဲတပ်ဖွဲ့ဝင်တွေကို စူပါဟီးရိုး ဝတ်စုံတွေ၊ သည်းထိတ်ရင်ဖို ရုပ်ရှင်ဇာတ်ကောင် ဝတ်စုံတွေနဲ့ ကပီဘာရာဆိုတဲ့ နာမည်ကြီး ရေဝက်ရုပ် ဝတ်စုံတွေအထိ ဝတ်ဆင်စေပြီး မူးယစ်ဆေးဝါးနှိမ်နင်းရေး လုပ်ငန်းတွေကို ဆောင်ရွက်ခဲ့ဖူးပါတယ်။

Source:Reuters