လက်ဘနွန်တွင် အစ္စရေးတို့၏ တိုက်ခိုက်မှုကြောင့် လူသုံးဦးသေဆုံးဟုဆို

ဘေရွတ် - အမေရိကန်နှင့် အီရန်တို့အကြား အရှေ့အလယ်ပိုင်းစစ်ပွဲကို အဆုံးသတ်ရန် သဘောတူညီချက် လက်မှတ်ရေးထိုးပြီး နာရီပိုင်းအကြာ ကြာသပတေးနေ့ (ဇွန်လ ၁၈ ရက်) တွင် လက်ဘနွန်တောင်ပိုင်း၌ အစ္စရေး၏ တိုက်ခိုက်မှုများကြောင့် လူသုံးဦး သေဆုံးခဲ့ကြောင်း လက်ဘနွန်နိုင်ငံပိုင် မီဒီယာများက ဖော်ပြသည်။

Kfar Tebnit ဒေသတွင် "ရန်သူ့ဒရုန်းတစ်စင်းက ကားတစ်စီးကို ပစ်မှတ်ထား တိုက်ခိုက်ခဲ့ခြင်း" ကြောင့် လူနှစ်ဦး သေဆုံးခဲ့ကြောင်း တရားဝင် အမျိုးသားသတင်းဌာန (NNA) က ဖော်ပြခဲ့ပြီး ယခင်က သေဆုံးသူ တစ်ဦးသာရှိသည်ဟု သတင်းထုတ်ပြန်ခဲ့ရာမှ ယခုကဲ့သို့ တိုးမြှင့်ဖော်ပြခဲ့ခြင်းဖြစ်သည်။

အိမ်နီးချင်း Zebdine ရွာတွင်လည်း နောက်ထပ် ဒရုန်းတစ်စင်း၏ တိုက်ခိုက်မှုကြောင့် လူတစ်ဦး ထပ်မံသေဆုံးခဲ့ကြောင်း NNA က ဆိုသည်။

တစ်ဖက်တွင်လည်း အစ္စရေးစစ်တပ်က ၎င်းတို့၏ စစ်သားတစ်ဦးသည် ယခင်ညက လက်ဘနွန်တောင်ပိုင်းတွင် ဖြစ်ပွားခဲ့သော ဖြစ်စဉ်တစ်ခုအတွင်း သေဆုံးခဲ့ပြီး အခြားခုနစ်ဦး ဒဏ်ရာရရှိခဲ့ကြောင်း ကြေညာခဲ့သည်။

အီရန်နှင့် အမေရိကန်တို့သည် တနင်္လာနေ့တွင် သဘောတူညီချက်တစ်ခု ရရှိခဲ့ကြောင်း ကြေညာပြီးနောက်ပိုင်း လက်ဘနွန်နိုင်ငံအတွင်း အကြမ်းဖက်မှုအဆင့်မှာ သိသိသာသာ လျော့ကျသွားခဲ့သည်။

အီရန်ကျောထောက်နောက်ခံပြု စစ်သွေးကြွအဖွဲ့ဖြစ်သည့် ဟစ်ဇ်ဘိုလာသည် အမေရိကန်-အစ္စရေး စစ်ဆင်ရေးအစတွင် အီရန်အစ္စလာမ္မစ်သမ္မတနိုင်ငံ၏ အမြင့်ဆုံးခေါင်းဆောင် သတ်ဖြတ်ခံရမှုကို လက်စားချေရန် အစ္စရေးကို တိုက်ခိုက်ခဲ့ခြင်းဖြင့် လက်ဘနွန်ကို အရှေ့အလယ်ပိုင်းစစ်ပွဲအတွင်းသို့ ဆွဲသွင်းခဲ့သည်။

အစ္စရေးက လက်ဘနွန်တစ်ဝန်း ကျယ်ကျယ်ပြန့်ပြန့် တိုက်ခိုက်မှုများဖြင့် ပြန်လည်တုံ့ပြန်ခဲ့ပြီး အစ္စရေးနှင့် နယ်နိမိတ်ချင်းထိစပ်နေကာ ဟစ်ဇ်ဘိုလာတို့၏ လွှမ်းမိုးမှုအောက်တွင် ကြာရှည်စွာရှိနေခဲ့သည့် တောင်ပိုင်းဒေသသို့ မြေပြင်စစ်ဆင်ရေးဖြင့် ကျူးကျော်ဝင်ရောက်ခဲ့သည်။