လုပ်ငန်းမလုပ်သည့် မြေဧက ၃,၆၀၀ ခန့်ကို လုပ်ပိုင်ခွင့် ပြန်သိမ်း
AI Summary
စစ်အာဏာရှင်၏ မြေလွတ်၊ မြေလပ်နှင့် မြေရိုင်းများစီမံခန့်ခွဲရေး ဗဟိုကော်မတီက ရန်ကုန်၊ တနင်္သာရီနှင့် မကွေးတိုင်းတို့တွင် လုပ်ငန်းလုပ်ရန် မြေလုပ်ပိုင်ခွင့်ယူခဲ့သော်လည်း အမှန်တကယ် အကောင်အထည်မဖော်ခဲ့သည့် မြေဧက ၃,၆၀၀ ခန့်ကို လုပ်ပိုင်ခွင့် ပြန်လည်သိမ်းဆည်းခဲ့သည်။ ဤသို့သိမ်းဆည်းရာတွင် ပေးထားသည့် အာမခံကြေးများကိုပါ သိမ်းဆည်းခဲ့ကြောင်း မေလ ၁၅ ရက်နေ့ထုတ် မြန်မာနိုင်ငံပြန်တမ်းတွင် ဖော်ပြထားသည်။ လုပ်ငန်းရှင်များသည် မြေလုပ်ပိုင်ခွင့်ရပြီး ၄ နှစ်အတွင်း အကောင်အထည်ဖော်ရမည်ဖြစ်သော်လည်း အချို့မှာ လုံးဝမလုပ်ဆောင်ဘဲထားခြင်း သို့မဟုတ် တစ်ဝက်တစ်ပျက်သာ လုပ်ကိုင်ခြင်းတို့ကြောင့် ယခုကဲ့သို့ သိမ်းဆည်းခံရခြင်းဖြစ်သည်။ တနင်္သာရီတိုင်းမှ အဏ္ဏဝါစိုးမိုးကုမ္ပဏီနှင့် မကွေးတိုင်းမှ နေရောင်ခြည်စွမ်းအင်သုံး လျှပ်စစ်ထုတ်လုပ်မည့်သူများအပြင် ရန်ကုန်တိုင်းရှိ ငါး၊ ပုဇွန်၊ ကြက်မွေးမြူရေးနှင့် သီးနှံစိုက်ပျိုးရေးလုပ်ငန်းရှင်များလည်း မြေသိမ်းဆည်းခံရသူများတွင် ပါဝင်သည်။ ၂၀၀၇ ခုနှစ်ကတည်းက မြေယူထားပြီး လုံးဝအကောင်အထည်မဖော်ခဲ့သည့် ဗိုလ်မှူးကြီးများနှင့် ဗိုလ်ကြီးများ၊ ၂၀၂၀ ပြည့်နှစ်ကတည်းက သိမ်းဆည်းခံရသည့် ပုဂ္ဂလိကတစ်ဦးတို့လည်း ရှိခဲ့သည်။ ဤလုပ်ဆောင်မှုကြောင့် လုပ်ငန်းမလုပ်ဘဲ မြေယာများ အလဟဿဖြစ်နေခြင်းကို တားဆီးနိုင်ခဲ့ပြီး မြေလုပ်ပိုင်ခွင့်ရယူထားသူများအနေဖြင့် လုပ်ငန်းများကို အမှန်တကယ် အကောင်အထည်ဖော်ရန် လိုအပ်ကြောင်း သတိပေးလိုက်ခြင်းလည်း ဖြစ်သည်။
ရန်ကုန်တိုင်း၊ တနင်္သာရီတိုင်းနဲ့ မကွေးတိုင်းတို့မှာ လုပ်ငန်းလုပ်ဖို့ မြေလုပ်ပိုင်ခွင့်တွေယူခဲ့ပေမဲ့ အမှန်တကယ် မလုပ်တဲ့ မြေဧက ၃,၆၀၀ လောက်ကို လုပ်ပိုင်ခွင့်ပြန်သိမ်းခဲ့တယ်လို့ စစ်အာဏာရှင်ရဲ့ မြေလွတ်၊ မြေလပ်နှင့် မြေရိုင်းများစီမံခန့်ခွဲရေး ဗဟိုကော်မတီက ထုတ်ပြန် ပါတယ်။
မေ ၁၅ ရက်မှာထုတ်ပြန်တဲ့ မြန်မာနိုင်ငံပြန်တမ်းမှာ ဖော်ပြလာတာဖြစ်ပြီး ပေးထားတဲ့ အာမခံကြေးတွေကိုပါ သိမ်းဆည်းလိုက်တယ်လို့ ဆိုပါတယ်။
တနင်္သာရီတိုင်း၊ သရက်ချောင်းမှာ အဏ္ဏဝါစိုးမိုးကုမ္ပဏီက ဆီအုန်းစိုက်ဖို့ မြေဧက ၅,၆၅၀ ယူခဲ့ပြီး ၃,၂၇၂ ဧကကျော်ပဲ စိုက်ပျိုးထားတာကြောင့် ကျန်တဲ့ ၂,၃၇၇ ဧကကျော်ကို သိမ်းဆည်း လိုက်ပါတယ်။
မကွေးတိုင်း၊ စကုမှာတော့ နေရောင်ခြည်စွမ်းအင်သုံးလျှပ်စစ်ထုတ်ဖို့အတွက်ဆိုပြီး ဧက ၇၀၀ ယူထားပေမဲ့ ၃၆၅ ဧကပဲ သုံးခဲ့တာကြောင့် ကျန်တဲ့မြေတွေကို ပြန်သိမ်းလိုက်ပါတယ်။
ရန်ကုန်တိုင်းက လှည်းကူး၊ မှော်ဘီ၊ တိုက်ကြီးနဲ့ သုံးခွမြို့နယ်တို့မှာလည်း ငါး၊ ပုဇွန်၊ ကြက်၊ မွေးဖို့၊ သီးနှံစိုက်ပျိုးဖို့ဆိုပြီး မြေဧကပေါင်း ၁,၁၄၀ လောက်ကို လုပ်ပိုင်ခွင့်ပေးခဲ့ပေမဲ့ တကယ်မလုပ်တဲ့ ၈၇၅ ဧကကို ပြန်လည်သိမ်းဆည်းပါတယ်။
မှော်ဘီနဲ့ လှည်းကူးမှာ ဗိုလ်မှူးကြီး ၃ ယောက်နဲ့ ဗိုလ်ကြီး ၁ ယောက်တို့ဟာ ကြက်ဆူ၊ ရာဘာ၊ သရက်နဲ့ သီဟိုသရက်စိုက်ဖို့၊ ကြက်နွားမွေးဖို့ဆိုပြီး မြေ ၃၅ ဧကလောက်ကို ၂၀၀၇ ခုနှစ် လောက်ကလည်းက လုပ်ပိုင်ခွင့်ယူခဲ့ပေမဲ့ လုံးဝ အကောင်အထည်မဖော်ခဲ့တာကို တွေ့ရပါတယ်။
ဒါ့အပြင် တခြားပုဂ္ဂလိကတယောက်ကလည်း မြေဧက ၆၆၀ လောက်ယူထားပြီး ၅၉၀ ဧကလောက်ကို အကောင်အထည်မဖော်တာကြောင့် ၂၀၂၀ ခုနှစ်ကတည်းက ပြန်သိမ်းဆည်းခဲ့တာ ကို တွေ့ရပါတယ်။
မြေတွေကို ၁၉၉၂ ခုနှစ်လောက်ကနေ ၂၀၁၆ ခုနှစ်အတွင်း လုပ်ပိုင်ခွင့်ချပေးထားခဲ့တာဖြစ်ပြီး ၄ နှစ်အတွင်း အကောင်အထည်ဖော်ရမှာဖြစ်ပေမဲ့ တချို့မြေတွေက လုံးဝ အကောင်အထည် မဖော်တာ၊ တချို့မြေတွေက တဝက်လောက်ပဲ အကောင်အထည်ဖော် လုပ်ကိုင်တာကို တွေ့ရပါတယ်။