AA ထိန်းချုပ်မြို့နယ် ၃ ခုကို စစ်တပ်ဗုံးကြဲ၊ ပလက်ဝနှင့် ရမ်းဗြဲတွင် ၄ ဦး သေ၊ ၉ ဦး ဒဏ်ရာရ
AI Summary
အာရက္ခတပ်တော်ထိန်းချုပ်ထားသော ပလက်ဝ၊ ရမ်းဗြဲနှင့် ပေါက်တောမြို့နယ်များတွင် စစ်ကောင်စီတပ်က လေကြောင်းမှ ဗုံးကြဲတိုက်ခိုက်မှုများ ဆက်တိုက်ပြုလုပ်ခဲ့သည်။ အဆိုပါတိုက်ခိုက်မှုများကြောင့် အရပ်သားပြည်သူ ၄ ဦး သေဆုံးပြီး ၉ ဦးထက်မနည်း ပြင်းထန်စွာ ဒဏ်ရာရရှိခဲ့သည်။ စစ်ရေးအရ နယ်မြေစိုးမိုးမှုရယူရန်နှင့် ထိုးစစ်ဆင်မှုများကြောင့် စစ်ကောင်စီက လေကြောင်းတိုက်ခိုက်မှုများကို အသုံးပြုခြင်းဖြစ်သည်။ တိုက်ခိုက်မှုများကြောင့် ဒေသခံများမှာ ဘေးလွတ်ရာသို့ ထွက်ပြေးတိမ်းရှောင်နေကြရပြီး ဒေသတွင်း လူမှုစီးပွားရေးနှင့် လုံခြုံရေးအခြေအနေများမှာ ပိုမိုဆိုးရွားလာသည်။ လက်ရှိတွင် စစ်ကောင်စီတပ်၏ လေကြောင်းတိုက်ခိုက်မှုများကြောင့် အရပ်သားထိခိုက်သေဆုံးမှုများ မြင့်တက်လျက်ရှိပြီး ဒေသခံများမှာ စိုးရိမ်ထိတ်လန့်စွာဖြင့် နေထိုင်နေကြရသည်။
အာရက္ခတပ်တော်(AA)ထိန်းချုပ်ထားတဲ့ ပလက်ဝ၊ ရမ်းဗြဲနဲ့ ပေါက်တောမြိုနယ်တို့ကို စစ်အာဏာရှင်တပ်က လေကြောင်းကနေ ဗုံးကြဲတိုက်ခိုက်တာကြောင့် အရပ်သား ၄ ယောက် သေဆုံးပြီး နောက်ထပ် ၉ ယောက်လည်း ဒဏ်ရာအပြင်းအထန်ရခဲ့ကြတယ်လို ဒေသခံတွေက ပြောပါတယ်။
ပလက်ဝမြို့နယ်၊ ဆမီးမြို့နားက ဝါရူးနဲ့ ကယက်ကျေးရွာကြားကို မေ ၂၈ ရက် မနက် ၁၁ နာရီဝန်းကျင်မှာ ဂျက်တိုက်လေယာဉ်နဲ့ ၄ ကြိမ် ဗုံးကြဲတိုက်ခိုက်ခဲ့တာဖြစ်ပြီး အနီးအနားက ဒေသခံအမျိုးသားတယောက်သေဆုံး၊ ၂ ယောက် ဒဏ်ရာအပြင်းအထန်ရခဲ့ကြတယ်လို ပလက်ဝဒေခံ တယောက်က ပြောပါတယ်။
“စစ်တပ်က ပထမဆုံး ဒရုန်းနဲ့ ကင်းထောက်တာတွေပြုလုပ်ပြီးမှ ဂျက်ဖိုက်တာနဲ့ လာပြီး ဗုံးကြဲတာ။ ရွာထဲမှာကျတာ မဟုတ်ပေမဲ့ ရွာနဲ့နီးနီးလေးပဲ။ အရပ်သား တဦးသေဆုံးခဲ့ပြီးတော့ နောက်ထပ် ၂ ဦးလည်း ဒဏ်ရာအပြင်းအထန်ရရှိခဲ့တယ်။ ဗုံးကြဲမှုမတိုင်ခင်မှာ Y-12 နဲ့ ကင်းထောက်ပြီးမှ ဂျက်ဖိုက်တာနဲ့ ဗုံးကြဲတိုက်ခိုက်တာ။”
ဗုံးကြဲတိုက်ခိုက်ခံရတဲ့ ကျေးရွာတွေဟာ CDF-ပလက်ဝ ထိန်းချုပ်ထားတဲ့ကျေးရွာတွေဖြစ်ပြီး သေဆုံးသွားသူနဲ့ ထိခိုက်ဒဏ်ရာရရှိသွားသူတွေဟာ ခရီးသွားတယ်ဖြစ်တယ်လို့ ဒေသခံတွေက ပြောပါတယ်။
မတ် ၂၉ ရက်ကလည်း ပလက်ဝမြို့နယ်၊ ကြောင်းချောင်းကျေးရွာကို စစ်အာဏာရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၄ ယောက် အပါဝင် အရပ်သား ၇ ယောက် သေဆုံးခဲ့ပြီး နောက်ထပ် ၄ ယောက် ဒဏ်ရာအပြင်းအထန် ရရှိခဲ့ကြပါတယ်။
ရမ်းဗြဲနဲ့ ကျောက်ဖြူလမ်းပိုင်းမှာ လမ်းပြင်နေကြတဲ့ ဆောက်လုပ်ရေးလုပ်ငန်းတခုကိုလည်း မေ ၂၈ ရက် မနက်ပိုင်း ၆ နာရီကနေ ၇ နာရီကျော်အထိ လေကြောင်းကနေ ဗုံးကြဲ တိုက်ခိုက်ခဲ့တဲ့ အတွက် ဆောက်လုပ်ရေးလုပ်ငန်းခွင်က အလုပ်သမား ၃ ယောက် သေဆုံးပြီး ၇ ယောက် ထိခိုက်ဒဏ်ရာရခဲ့ကြတယ်လို ရမ်းဗြဲဒေသခံ အမျိုးသားတယောက် ပြောပါတယ်။
“ရမ်းဗြဲ-ကျောက်ဖြူလမ်းပိုင်းက ပိန္နဲတောင်-မော်ဦး လမ်းပိုင်းကို စစ်တပ်က လေကြောင်းကနေ ဂျက်ဖိုက်တာ ၂ စင်း၊ Y-12 ၂ စင်းနဲ့ ၁ နာရီကျော်ကြာ ဗုံးကြဲတိုက်ခိုက်ခဲ့တာ။ ဆောက်လုပ်ရေး လုပ်ငန်းခွင်က ယာဉ်မောင်းတဦးနဲ့ နောက်ထပ်နှစ်ဦး နေရာမှာတင် သေဆုံးသွားသလို နောက်ထပ် ၇ ဦးလည်း ထိခိုက်ဒဏ်ရာရရှိသွားတယ်။ ဒဏ်ရာရရှိသွားတဲ့သူတွေအထဲမှာ အသက်စိုးရိမ်ရတဲ့ သူတွေလည်း ပါတယ်။”
စစ်အာဏာရှင်တပ် လေကြောင်းဗုံးကြဲလို့ သေဆုံးသွား ၃ ယောက်ဟာ မအီမြို့၊ ဂျီဖြူတောင် ကျေးရွာသားတွေဖြစ်ကြပြီး ဆောက်လုပ်ရေးလုပ်ငန်းခွင်မှာ အလုပ် လုပ်ကိုင်နေကြသူတွေ ဖြစ်ပါတယ်။
စစ်အာဏာရှင်တပ်က ကျောက်ဖြူနဲ့ စနဲမြို့ အနီးပတ်ဝန်းကျင်ကျေးရွာတွေကိုလည်း မေ ၂၇ ရက် က လေကြောင်းဗုံးကြဲတိုက်ခိုက်ခဲ့တာကြောင့် အမျိုးသားတယောက် သေဆုံးခဲ့ပါတယ်။
ဒါ့အပြင် ပေါက်တောမြိုနယ်၊ ကြိမ်ခွေမော်ကျေးရွာအနီးကိုလည်း မေ ၂၈ ရက် နေ့လယ်ပိုင်းက ဂျက်တိုက်လေယာဉ် ၄ စင်းနဲ့ ဗုံးကြဲတိုက်ခိုက်ခဲ့တာကြောင့် ဘေးလွတ်ရာကို ထွက်ပြေး တိမ်းရှောင် နေကြရတယ်လို့ ပေါက်တောဒေသခံတွေက ပြောပါတယ်။
“ကြိမ်ခွေမော်နဲ့ ဒါးကိုင်ကြားတောင်တန်းတွေကို ဗုံးကြဲခဲ့တာ။ အတော်လေးကို ကြောက်ဖို့ ကောင်းတယ်။ လူအထိအခိုက်တော့ မရှိဘူး။ ပတ်ဝန်းကျင်ရွာတွေက လူအချို့ တိမ်းရှောင် နေကြတာတော့ ရှိတယ်။ အရင်ကလည်း ဒီနေရာတွေက ဗုံးကြဲခံရဖူးပြီ” လို့ ပြောပါတယ်။
မတ် ၆ ရက်ကလည်း ကြိမ်ခွေမော်ကျေးရွာအနီးက တောင်တန်းတွေကို စစ်အာဏာရှင်တပ်က လေကြောင်းကနေ ဗုံးအလုံး ရာချီကြဲချတိုက်ခိုက်ခဲ့ပါတယ်။
အာရက္ခတပ်တော် AA ဟာ ရခိုင်ပြည်နယ်က မြို့နယ် ၁၄ ခုနဲ့ ပလက်ဝမြို့နယ်တို့ကို သိမ်းပိုက် ထိန်းချုပ်ထားပြီး စစ်တွေနဲ့ ကျောက်ဖြူမြိုနယ်တို့ကိုလည်း ထိုးစစ်ဆင် တိုက်ခိုက်နေပါတယ်။