ခင်ဦးမြို့နယ်၌ စစ်တပ်ပစ်ခတ်မှုကြောင့် စစ်ရှောင် အမျိုးသမီးငယ် ၁ ဦး သေဆုံး

စစ်ကိုင်းတိုင်း ခင်ဦးမြို့နယ်၊‌ ယောက်သွားအိုင်ရွာကို စစ်အာဏာရှင်တပ်က ဇွန် ၁၉ ရက်မှာ  ဒရုန်းယာဉ်နဲ့ ဗုံးကြဲပြီး လက်နက်ကြီးပါပစ်ခတ်လို့ စစ်ရှောင် အမျိုးသမီးငယ် တယောက် သေဆုံး သွားတယ်လို့ ဒေသခံတွေထံက သိရပါတယ်။

ရွှေဘို လေ့ကျင့်ရေး ၈ အထိုင် စစ်တပ်က  မနေ့ မနက်ခင်း ၆ နာရီ ၄၆ မိနစ်က စတင်ပြီး ဒရုနန်း အပါအဝင် လက်နက်ကြီးနဲ့ပါ ဗုံးကြဲ ပစ်ခတ်ခဲ့တာဖြစ်ပါတယ်။

ခင်ဦးဒေသခံတယောက်က “အရင်ဆုံးက အသေခံဒရုန်းယာဉ်နဲ့ ဗုံးသီး ၂ လုံးကြဲချတယ်။ အဲဒီဗုဲးကြဲ တာက ဘာအထိအခိုက်မှ မရှိခဲ့ဘူး။ ပြီးတော့ လက်နက်ကြီးနဲ့ ၅ မိနစ်ခြား တကြိမ်ပစ်တယ်။ ပစ်တဲ့ လက်နက်ကြီးက  ၅ မိနစ်ကို ၁ လုံးပစ်တာ။ စုစု‌ပေါင်း လက်နက်ကြီး ၄ လုံးနဲ့ ပစ်သွားတာ။ လက်နက်ကြီး တလုံးက တော့ စစ်ရှောင်တဲပေါ်ကျပြီး အသက် ၁၆ နှစ် အရွယ် အမျိုးသမီးငယ် သေဆုံးခဲ့ရတယ်။ စစ်‌ဘေး ရှောင်တဲတလုံးလည်း ပျက်စီးသွားတယ်”လို့ ပြောပါတယ်။

ယောက်သွားအိုင်ရွာမှာ တိုက်ပွဲ ဖြစ်ပွားတာမရှိဘဲ စစ်တပ်က အကြောင်းမဲ့ ပစ်ခတ်တာ ဖြစ်တယ် လို့လည်း သိရပါတယ်။

ခင်ဦးမြို့နယ်ပြည်သူကာကွယ်ရေးအဖွဲ့မှ ကိုသစ္စာက “ကျနော်အမြင်ကတော့ ဒီကောင်တွေ ထင်ရာ ရမ်းသန်းပစ်နေတာ။ သူတို့ပစ်တဲ့ နေရာက ဘာတိုက်ပွဲမှမရှိဘူး။ ကျ‌နော်တို့အဖွဲ့တွေ စခန်းလည်း မရှိဘူး။ ပြည်သူကို ဒုက္ခပေးချင်တဲ့ ရည်ရွယ်ချက်နဲ့ကို တမင်ပစ်တာ”လို့ ပြောပါတယ်။

ယောက်သွားအိုင်ရွာဟာ ခင်ဦးမြို့နယ် အရှေ့မြောက်ခြမ်း ရွှေဘို-မြစ်ကြီးနား ဗျူဟာလမ်းမကြီး ဘေးမှာ တည်ရှိတဲ့ ကျေးရွာ ဖြစ်ပါတယ်။