အဆင့်အတန်းမြင့်မားပြီးလှပခေတ်မီသောမြို့ပြစီမံကိန်းများ အကောင်အထည်ပေါ်နိုင်ရန် ရခိုင်ပြည်သူများအားULA/AA ဖိတ်ခေါ်

နိရဉ္စရာ၊မေ၂၉/၂၀၂၆

အဆင့်အတန်းမြင့်မားပြီး လှပခေတ်မီသော မြို့ပြစီမံကိန်းများ အောင်အောင်မြင်မြင် အကောင်အထည်ပေါ်နိုင်ရန်အတွက် အာရက္ခပြည်သူများအနေဖြင့်ပူးပေါင်းပါဝင်ကြရန်ULA/AA ဖိတ်ခေါ်လိုက်သည်။

မေလ၂၉ရက်နေ့စွဲဖြင့်ထုတ်ပြန်သည့်  “ အာရက္ခတပြည်လုံးရှိမြို့ပြစည်ပင်သာယာရေးနှင့် စနစ်တကျတိုးတက်ဖွံ့ဖြိုးရေးဆိုင်ရာထုတ်ပြန်ကြေညာချက်”တွင်ထိုသို့တိုက်တွန်းဖိတ်ခေါ်ထားခြင်းဖြစ်သည်။

ထုတ်ပြန်ချက်ထဲတွင်“ အာရက္ခတပ်တော်သည်စစ်မြေပြင်၌ရန်သူနှင့် စစ်ရေးအရအပြင်းထန်ဆုံးရင်ဆိုင်တိုက်ပွဲဝင်နေရသည့်နည်းတူ ရက္ခိုင်အမျိုးသားအဖွဲ့ချုပ်/ အာရက္ခတပ်တော်(ULA/ AA)အားနိုင်ငံတကာဖိအားများသက်ရောက်စေရန်အားထုတ်ကြိုးပမ်းနေကြသည့်အစုအဖွဲ့များ၊အမျိုးသားသစ္စာဖောက်အချို့၏တကိုယ်တော်တိုက်ခိုက်ဆောင်ရွက်ချက်များကိုလည်းဘက်စုံထောင့်စုံမှရင်ဆိုင်ရလျက်ရှိသည်ဟုဖော်ပြထားသည်။

ဤကဲ့သို့စစ်ရေး၊နိုင်ငံရေး၊သံတမန်ရေးတိုက်ခိုက်မှုများကြားထဲတွင်ပင်အာရက္ခပြည်သူ့တော်လှန်ရေးအစိုးရသည်တရားဥပဒေစိုးမိုးရေး၊ကျန်းမာရေး၊ပညာရေး၊အုပ်ချုပ်ရေး၊မြို့ပြ၊ရပ်ရွာ၊ကျေးလက်ဖွံ့ဖြိုးရေစီမံကိန်းစသည့်တိုင်းပြည်တည်ဆောက်ရေးကဏ္ဍများနှင့် ပြည်သူ့ဝန်ဆောင်မှုများကိုပါအာရက္ခပြည်သူလူထုများနှင်းအတူတကွခိုင်မြဲစွာလက်တွဲလျက်အချိန်နှင့်တပြေးညီတစိုက်မတ်မတ်ကြိုးပမ်းအားထုတ်လုပ်ဆောင်လျက်ရှိနေကြောင်းဖော်ပြသည်။

မပြီးပြတ်သေးသော အမျိုးသားတော်လှန်ရေးခရီးကြမ်းကိုလျှောက်လှမ်းရင်းပြည်သူ့အုပ်ချုပ်ရေး လုပ်ငန်းများကိုပိုမိုစနစ်ကျစွာဆောင်ရွက်လျက်ရှိသော်လည်းအယင်အာဏာရှင်အစိုးရအဆက်ဆက်လက်ထက်၌အာရက္ခဒေသ၏ဖွံ့ဖြိုးတိုးတက်ရေးကိုလျစ်လျူရှုထားခြင်း၊မြို့ပြစီမံကိန်းများကိုစည်းစနစ်ကျစွာ၊နည်းလမ်းမှန်ကန်စွာဆောင်ရွက်နိုင်မှုမရှိခဲ့ခြင်း၊တည်ဆဲဥပဒေများကိုအာဏာပိုင်အဆက်ဆက်နှင့်ကိုယ်ကျိုးရှာစီးပွားရေးသမားများလက်တလုံးခြားကိုယ်ကျိုးရှာဆောင်ရွက်ခြင်းများရှိခဲ့သောကြောင့်အာရက္ခဒေသတခုလုံးဖွံ့ဖြိုးတိုးတက်ရေးတွင်စိန်ခေါ်မှုမျိုးစုံတို့ကို နေ့တိုင်းကြုံတွေ့ရလျက်ရှိသည်ဟုဆိုသည်။

နှစ်ကာလရှည်ကြာစုပုံနေခဲ့သောအဆိုပါဆိုးမွေများကြောင့်အာရက္ခဒေသအတွင်းလူမှုဘဝနေထိုင်မှုအဆင့်အတန်းမာအဖက်ဖက်မှနိမ့်ကျလျက်ရှိနေသည်။

အာရက္ခပြည်သူ့တော်လှန်ရေးအစိုးရသည်အာရက္ခပြည်သူများ၏လူနေမှုအဆင့်အတန်းမြင့်မားလာစေရန်၊စနစ်တကျဖွံ့ဖြိုးလာစေရန်၊တိုးပွားလာသောလူဦးရေကြောင့်ဖြစ်ပေါ်လာသည့်လူနေထူထပ်မှုများကိုစနစ်တကျဖြေရှင်းယှင်းပေးနိုင်ရန်၊မြို့ပြများ၌လမ်းနယ်နိမိတ်အပါအဝင်ကားလမ်းဘေးမြေနေရာရာများအားဥပဒေမဲ့ကျူးကျော်ခြင်းများကိုထိန်းသိမ်းနိုင်ရန်ရည်ရွယ်ချက်ဖြင့်လမ်း၊တံတားများအပါအဝင်မြို့ပြတည်ဆောက်ရေးလုပ်ငန်းများကိုစနစ်တကျဆောင်ရွက်နိုင်ရန်“မြို့ပြစီမံကိန်းလုပ်ငန်းကော်မတီများ” ဖွဲ့စည်းကာအားသွန်ခွန်စိုက်ဆောင်ရွက်လျက်ရှိနေသည်ဟုဖော်ပြသည်။

အထူးသဖြင့်အာရက္ခပြည်သူပြည်သားများအသက်တမျှတန်ဖိုးထားလာခသောအာရက္ခပြည်သမိုင်း၏အထင်ကရ၊အာရက္ခရို့၏အသည်းနှလုံးဖြစ်သည့်“မြောက်ဦးရှေးဟောင်းယဉ်ကျေးမှုအမွေအနှစ်ဇုန်” အားသန့်ရှင်းသပ်ရပ်စွာဖြင့်ရေရှည်ထိန်းသိမ်းကာကွယ်စောင့်ရှောက်နိုင်ရန်၊ကမ္ဘာ့အမွေအနှစ်၊အာရက္ခအမွေအနှစ်အဖြစ်တည်တံ့နိုင်ရန်ရည်ရွယ်ချက်များဖြင့်“မြောက်ဦးမြို့ပြတည်ဆောက်ရေးစီမံကိန်း” ကိုလည်းအကောင်အထည်ဖော်ဆောင်ရွက်လျက်ရှိသည်ဟုဖော်ပြသည်။

“မြို့ပြစီမံကိန်းလုပ်ငန်းကော်မတီများသည်မြောက်ဦးအပါအဝင်ဒေသအသီးသီးမှစီမံကိန်းလျာထားမြေရာများကိုကွင်းဆင်းတိုင်းတာခြင်း၊မြေနှင့်သက်ဆိုင်သူများအားဖိတ်ခေါ်တွေ့ဆုံဆွေးနွေးရှင်းလင်းမှုများပြုလုပ်ခြင်း၊တဦးချင်းပိုင်ဆိုင်သောမြေဧရိယာကိုတိုင်းတာအတည်ပြု၍နယ်နိမိတ်ပိုင်းခြားသတ်မှတ်ခြင်းအပြင်အခြေအနေ၏ လိုအပ်ချက်အရဥပဒေလုပ်ထုံးလုပ်နည်းများနှင့်အညီမြီသိမ်းဆည်းရန်အမိန့်ကြော်ငြာစာထုတ်ပြန်ခြင်း၊သင့်တင့်သောလျော်ကြေးငွေပေးဆောင်ခြင်းစသည့်အဆင့်ဆင့်သောလုပ်ငန်းစဉ်များဖြင့်တည်ဆောက်ရေးလုပ်ငန်းများအားစနစ်တကျဆောင်ရွက်လျက်ရှိသည်ဟုဆိုသည်။

ထို့ကြောင့်“ မိဖပြည်သူများအနေ့ဖြင့်လည်းအာရက္ခတိုင်းပြည်တည်ဆောက်ရေးလုပ်ငန်းများအရှိန်အဟုန်မြှင့်ဆောင်ရွက်နိုင်ရန်၊အနာဂတ်အာရက္ခမျိုးဆက်များအတွက်အဆင့်အတန်းမြင့်မားပြီးလှပခေတ်မီသောလူ့ဘောင်တခုချန်ထားခဲ့နိုင်ရန်နှင့် မြို့ပြစီမံကိန်းများအောင်အောင်မြင်မြင်အကောင်အထည်ပေါ်နိုင်ရန်အလို့ငှာအမျိုးသားရေးအခြေခံစိတ်၊တိုင်းချစ်ပြည်ချစ်စိတ်၊တိုင်းပြည်အပေါ်ထားရှိသောအရင်းခံစေတနာစိတ်များဖြင့်အယင်ကထက်ပိုသောပူးပေါင်းပါဝင်လုပ်ဆောင်မှုမျိုးဖြင့်ပါဝင်ပေးကြရန်အလေးအနက်အသိပီးဖိတ်ခေါ်တိုက်တွန်းနှိုးဆော်အပ်ပါသည်” ဟုဖော်ပြထားသည်။