ယူကရိန်းနှင့် ခြေစမ်းပွဲတွင် လဲကျခဲ့သည့် အဲရစ်ဆင် နေအိမ်၌ ပြန်လည်သက်သာလာနေ

ကိုပင်ဟေဂင်၊ ဇွန် ၈ - ဒိန်းမတ်လက်ရွေးစင် ကွင်းလယ်ကစားသမား ခရစ်ရှန် အဲရစ်ဆင်သည် ယူကရိန်းအသင်းနှင့် ယှဉ်ပြိုင်ကစားခဲ့သည့် နိုင်ငံတကာခြေစမ်းပွဲစဉ်အတွင်း ကွင်းအတွင်း၌ လဲကျသွားခဲ့ပြီးနောက် တနင်္လာနေ့တွင် နေအိမ်သို့ ပြန်လည်ရောက်ရှိခဲ့ပြီး မိသားစုနှင့်အတူ ကျန်းမာရေးပြန်လည်ကောင်းမွန်လာနေကြောင်း ပြောကြားခဲ့သည်။

"ကျွန်တော့်ရဲ့ ICD (နှလုံးခုန်နှုန်းထိန်းစက်) ကနေ လျှပ်စစ်ရှော့ခ်ဖြစ်ခဲ့ရတာဟာ ကျွန်တော်နဲ့ ကျွန်တော့်မိသားစုအပေါ် အကြီးအကျယ် သက်ရောက်မှုရှိခဲ့ပါတယ်။ ဒါပေမဲ့ ဒါဟာ ၂၀၂၁ ခုနှစ်က ဖြစ်ပျက်ခဲ့တဲ့ အခြေအနေနဲ့ မတူညီတဲ့ အခြေအနေတစ်ခုဖြစ်ကြောင်း အားလုံးကို စိတ်အေးစေချင်ပါတယ်" ဟု အဲရစ်ဆင်က Instagram တွင် ရေးသားဖော်ပြခဲ့သည်။

"ကျွန်တော် အခုနေလို့ကောင်းပါတယ်၊ ကျွန်တော့်ရဲ့ ကျန်းမာရေးပြန်လည်ကောင်းမွန်လာမှုကလည်း စတင်နေပါပြီ" ဟု ၎င်းက ထပ်လောင်းပြောကြားခဲ့သည်။

အသက် ၃၄ နှစ်အရွယ်ရှိ အဆိုပါ ကွင်းလယ်ဖန်တီးရှင်သည် ဒိန်းမတ်နိုင်ငံ၊ အိုဒန်ဆေးမြို့၌ ယူကရိန်းအသင်းနှင့် ယှဉ်ပြိုင်ကစားစဉ် ပွဲချိန် ၆၅ မိနစ်တွင် ရင်ဘတ်ကို ဖိကိုင်ကာ မြက်ခင်းပြင်ပေါ်သို့ လဲကျသွားခဲ့သဖြင့် ပရိသတ်များကြားတွင် စိုးရိမ်မှုများ မြင့်တက်ခဲ့သည်။

တနင်္ဂနွေနေ့က ဖြစ်ပွားခဲ့သည့် ဖြစ်ရပ်သည် အသက် ၃၄ နှစ်အရွယ် ကွင်းလယ်ကစားသမားတစ်ဦးအနေဖြင့် နိုင်ငံအသင်းအတွက် ပါဝင်ကစားပေးနေစဉ်အတွင်း မြက်ခင်းပြင်ပေါ်သို့ ဒုတိယအကြိမ်မြောက် လဲကျခဲ့ခြင်းဖြစ်သည်။

၂၀၂၁ ခုနှစ်ကလည်း ၎င်းသည် ကိုပင်ဟေဂင်မြို့၌ ဖင်လန်အသင်းနှင့် ယှဉ်ပြိုင်ကစားခဲ့သည့် ဥရောပချန်ပီယံရှစ် အုပ်စုအဖွင့်ပွဲစဉ်အတွင်း လဲကျခဲ့ဖူးသည်။

ထိုစဉ်က ၎င်းသည် အသက်ကယ် CPR ကုသမှုကို ခံယူခဲ့ရပြီးနောက် နှလုံးခုန်နှုန်းကို ပြန်လည်ထိန်းညှိပေးသည့် အထူး ICD စက်ကို တပ်ဆင်ခဲ့ရသည်။ ထို့နောက် ၎င်းသည် ကလပ်အသင်းနှင့် နိုင်ငံလက်ရွေးစင်အသင်းတို့တွင် ဘောလုံးသမားဘဝကို ပြန်လည်စတင်နိုင်ခဲ့သူဖြစ်သည်။