ဗီယက်နမ်နိုင်ငံသည် အကျဉ်းသား ၁၀,၀၀၀ နီးပါးကို ပြန်လည်လွှတ်ပေးမည်

ဟနွိုင်း - ဗီယက်နမ်နိုင်ငံသည် မကြာသေးမီက ကျင်းပခဲ့သည့် ပါလီမန်ရွေးကောက်ပွဲကို ဂုဏ်ပြုသောအားဖြင့် နိုင်ငံခြားသားများအပါအဝင် အကျဉ်းသား ၁၀,၀၀၀ နီးပါးကို ပြန်လွှတ်ပေးမည်ဖြစ်ကြောင်း စနေနေ့ (မေလ ၃၀ ရက်) တွင် ပြောကြားခဲ့သည်။

ဗီယက်နမ်နိုင်ငံသည် အထူးအခမ်းအနားများ သို့မဟုတ် ပွဲတော်များမတိုင်မီတွင် လွတ်ငြိမ်းချမ်းသာခွင့်ပေးကြောင်း မကြာခဏ ကြေညာလေ့ရှိသည်။

ဆိုင်ဂုံမြို့ကျဆုံးခြင်း နှစ် ၅၀ ပြည့်နှင့် လွတ်လပ်ရေးကြေညာခြင်း နှစ် ၈၀ ပြည့် အထိမ်းအမှတ်ပွဲများကို ကျင်းပခဲ့သည့် ယမန်နှစ်က အကျဉ်းသား ၂၂,၀၀၀ ကျော်ကို ပြန်လွှတ်ပေးခဲ့ရာ ယင်းသည် တစ်နှစ်အတွင်း အများဆုံးစံချိန်တင် အရေအတွက်ဖြစ်သည်။

ဗီယက်နမ်ကွန်မြူနစ်ပါတီ အထွေထွေအတွင်းရေးမှူးချုပ်နှင့် သမ္မတ တိုလမ် (To Lam) လက်မှတ်ရေးထိုးထားသည့် စာရွက်စာတမ်းအရ ယခုနှစ် လွတ်ငြိမ်းချမ်းသာခွင့်အစီအစဉ်အရ ဇွန်လအစပိုင်းတွင် အကျဉ်းသား ၉,၉၅၀ ကို ပြန်လွှတ်ပေးမည်ဖြစ်သည်။

ယခုလွတ်ငြိမ်းချမ်းသာခွင့်သည် "(ငါးနှစ်တစ်ကြိမ်) ကွန်မြူနစ်ပါတီညီလာခံနှင့် အမျိုးသားလွှတ်တော်ရွေးကောက်ပွဲများ အောင်မြင်ခြင်း" ကို ဂုဏ်ပြုခြင်းဖြစ်ကြောင်း ပြည်သူ့လုံခြုံရေး ဒုတိယဝန်ကြီး လီဗန်တွီယန် (Le Van Tuyen) က စနေနေ့ သတင်းစာရှင်းလင်းပွဲတွင် ပြောကြားခဲ့သည်။

မတ်လတွင် ဗီယက်နမ်နိုင်ငံသည် အာဏာရကွန်မြူနစ်ပါတီ၏ ဆုံးဖြတ်ချက်များကို အတည်ပြုပေးရန် အဓိကတာဝန်ယူသည့် ထိပ်တန်းဥပဒေပြုအဖွဲ့ဖြစ်သော အမျိုးသားလွှတ်တော်အတွက် ရွေးကောက်ပွဲများကို ကျင်းပခဲ့သည်။

လာမည့်လတွင် ပြန်လွှတ်ပေးမည့် အကျဉ်းသားများထဲတွင် "နိုင်ငံအသီးသီးမှ" အမျိုးသား ၅၆ ဦးနှင့် အမျိုးသမီး ၇ ဦး အပါအဝင် နိုင်ငံခြားသား ၆၃ ဦး ပါဝင်ကြောင်း တွီယန်က အသေးစိတ်အချက်အလက်များကို ထုတ်ဖော်ပြောကြားခြင်းမရှိဘဲ ပြောဆိုခဲ့သည်။

ဗီယက်နမ်ဥပဒေအရ "အစိုးရကို ဖြုတ်ချရန် ကြိုးပမ်းမှု" သို့မဟုတ် "အကြမ်းဖက်မှု" တို့ဖြင့် ပြစ်ဒဏ်စီရင်ခံထားရသူများသည် လွတ်ငြိမ်းချမ်းသာခွင့်ရရှိရန် အရည်အချင်းမပြည့်မီပေ။

ဗီယက်နမ်နိုင်ငံသည် ယခင်က အကျဉ်းသားပေါင်း ၁၁၈,၀၀၀ ခန့်ကို ၎င်းတို့၏ ပြစ်ဒဏ်စေ့ရောက်မည့်ရက်မတိုင်မီ ကြိုတင်လွှတ်ပေးခဲ့ပြီးဖြစ်သည်။

ဗီယက်နမ်နိုင်ငံတစ်ဝန်းတွင် အကျဉ်းသား ၁၉၀,၀၀၀ ကျော်မှာ ထောင်ဒဏ်များ ကျခံနေရကြောင်း ပြည်သူ့လုံခြုံရေးဝန်ကြီးဌာန၏ ယခင်အစီရင်ခံစာများတွင် ဖော်ပြထားသည်။