ငါ့သရောက်တွင် စစ်မှုထမ်းတပ်သားသစ် ၁ ဦးကို လက်နက်ခဲယမ်းများဖြင့် ဖမ်းမိ

မန္တလေးတိုင်း၊ ညောင်ဦးမြို့နယ်ထဲက ငါ့သရောက်မြို့နယ်ခွဲအတွင်း မေ ၂၆ ရက်က စစ်မှုထမ်းတပ်သားသစ် တယောက်ကို လက်နက်ခဲယမ်းတွေနဲ့အတူ အရှင်ဖမ်းမိခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

Earthquake People’s Defence Force ရဲ့ ပြန်ကြားရေးနဲ့ ပြင်ပဆက်ဆံရေးတာဝန်ခံက “စစ်တပ်က ငါ့သ​ရောက်မြို့နယ်ထဲကို စစ်ကြောင်းထိုးလာတဲ့အထဲကနေ ပါလာတဲ့ ပစ တယောက်ကို စစ်ဆိုင်နေတဲ့ ရှေ့တန်းစစ်မြေပြင်တနေရာမှာ လက်နက်ခဲယမ်းတွေနဲ့အတူ အရှင်ဖမ်းမိခဲ့တာ ဖြစ်ပါတယ်” လို့ ပြောပါတယ်။

အရှင်ဖမ်းဆီးရမိသူဟာ ကိုယ်ပိုင်နံပါတ် ပစ/၁၇၇၅၈၅ တပ်သား မျိုးထက်ဇော် ဖြစ်ကာ သူနဲ့အတူ MA1 သေနတ် ၁ လက်၊ ကျည်အတောင့် ၁၀၀ ၊ ကျည်ဘောက် ၄ ခု၊ ၆၀ မမ အဖူး ၁ လုံး တို့ကိုလည်း သိမ်းဆည်းရရှိခဲ့တယ်လို့ သူက ဆက်ပြောပါတယ်။

အဆိုပါ စစ်မှုထမ်းတပ်သားဖမ်းဆီးမှုကိုတော့ Earthquake People's Defense Force၊ ပခုက္ကူခရိုင် Localတပ်ရင်း(PDLB)၊ 21 Bagan-People Defense Force၊ Bagan Garuda Force၊ ဒေါင်းရင်သွေးပြောက်ကျားတပ်ဖွဲ့ (DYT) နဲ့ Badassess Burma Force တို့ ပူးပေါင်းလုပ်ဆောင်ခဲ့ကြတာလို့ ဆိုပါတယ်။

21 Bagan-People Defense Force ရဲ့ သတင်းနဲ့ပြန်ကြားရေးတာဝန်ခံ ရဲဘော်ယက္ခက “ငါ့သရောက်ထဲကို စစ်တပ်ဘက်က ပြီးခဲ့တဲ့ မေလ ၂၄ ရက်နေ့ကစပြီး အင်အားအလုံးအရင်းနဲ့ စစ်ကြောင်း ၂ ကြောင်းထိုးနေတယ်။ တချို့နေရာတွေမှာတော့ တိုက်ပွဲတွေဖြစ်နေတာနဲ့ ဖြစ်ခဲ့တာတွေ ရှိတာပေါ့။ စစ်မှုထမ်းတပ်သားကို အရှင်ဖမ်းမိတဲ့နေရာကတော့ စစ်ဆိုင်ထားတဲ့ စစ်ရေးတင်းမာနေတဲ့ နေရာပေါ့။ သူတယောက်တည်း ရိက္ခာထွက်ရှာရင်း ဒီဘက်က မဟာမိတ်ရဲဘော်တွေနဲ့ ဆုံပြီး ဖမ်းဆီးမိခဲ့တာပါ” လို့DVB ကို ပြောပါတယ်။

ဖမ်းဆီးရမိတဲ့အဆိုပါ စစ်မှုထမ်းတပ်သားကို စစ်သုံ့ပန်းဥပဒေနဲ့အတူ ထိန်းသိမ်းထားပြီး စစ်ဆေးမှုတွေ ဆက်လက်ဆောင်ရွက်နေတယ်လို့လည်း သူက ဆက်ပြောပါတယ်။

စစ်တပ်စစ်ကြောင်းတွေဟာ ငါ့သရောက်မြို့နယ်ခွဲထဲကို အင်အားအလုံး​အရင်းနဲ့ စစ်ကြောင်းထိုး ဝင်ရောက်နေတာကြောင့် ဒေသခံပြည်သူတွေအနေနဲ့လည်း သတိနဲ့နေထိုင်သွားလာကြဖို့ တော်လှန်ရေးတပ်ဖွဲ့တွေ ဘက်က သတိပေးတိုက်တွန်းထားပါတယ်။