ရမ်းဗြဲတွင် စစ်ရှောင်စခန်း ဗုံးကြဲခံရပြီး ၂ ဦးသေ၊ ၅ ဦးထက်မနည်း ဒဏ်ရာရ

ရခိုင်ပြည်နယ် ရမ်းဗြဲမြို့နယ်၊ ပိန္နဲတောင်ကျေးရွာရှိ စစ်ဘေးရှောင်စခန်းကို စစ်အာဏာရှင် လေတပ် က ဇွန် ၁ ရက် ညနေမှာ လေကြောင်း ဗုံးကြဲတိုက်ခိုက်ခဲ့တာကြောင့် စစ်ဘေးရှောင် ၂ ယောက် သေဆုံး ခဲ့တယ်လို့ ဒေသခံတွေက ပြောပါတယ်။

ရမ်းဗြဲမြို့နယ် ပိန္နဲတောင်ကျေးရွာအနီးရှိ ကြောင်ချတွင်း စစ်ရှောင်စခန်းကို ဇွန် ၁ ရက် ည ၉ နာရီ ဝန်းကျင်မှာ စစ်အာဏာရှင်လေတပ်က ဂျက်ဖိုက်တာ ၂ စီးနဲ့ ဗုံး ၄ လုံး ကြဲချ တိုက်ခိုက်ခဲ့တာကြောင့် စစ်ဘေးရှောင် ၂ ယောက် သေဆုံးခဲ့ပြီး နောက်ထပ် ၅ ယောက်ထက်မနည်း ထိခိုက်ဒဏ်ရာ ရရှိခဲ့ ကြတယ်လို့ ရမ်းဗြဲဒေသခံ အမျိုးသမီးတယောက်က ပြောပါတယ်။

“ပိန္နဲတောင်ရွာအနီးက စစ်ဘေးရှောင်စခန်းကို ဗုံးကြဲခဲ့တာ။ အဲဒီမှာက ကျောက်ဖြူဘက်က စစ်ဘေးရှောင်တွေ အဓိကနေထိုင်ကြတာ။ ဂျက်ဖိုက်တာ ၂ စီးနဲ့ ဗုံး ၄ လုံး ကြဲချခဲ့တာ။ သေတာက ၂ ဦး ရှိတယ်။ နောက်ထပ်လည်း ၅ ဦးထက်မနည်း ထိခိုက်ဒဏ်ရာ ရရှိခဲ့တာရှိတယ်။”

သေဆုံးခဲ့သူတွေဟာ သက်ကြီးပိုင်း အမျိုးသား စစ်ဘေးရှောင်တွေ ဖြစ်ကြပြီး ထိခိုက်ဒဏ်ရာ ရရှိခဲ့ သူတွေမှာလည်း အမျိုးသမီးတွေနဲ့ သက်ကြီးပိုင်းတွေ ပါဝင်တယ်လို့ သိရပါတယ်။

ပိန္နဲတောင်ကျေးရွာအနီးက ဆောက်လုပ်ရေးလုပ်ငန်းခွင်တခုကိုလည်း မေ ၂၈ ရက် မနက်ပိုင်းက လေကြောင်း ဗုံးကြဲတိုက်ခိုက်ခဲ့တာကြောင့် ဆောက်လုပ်ရေးအလုပ်သမား ၃ ယောက် သေဆုံးပြီး ၇ ယောက် ထိခိုက်ဒဏ်ရာ ရရှိခဲ့ကြပါတယ်။

လက်ရှိ ဗုံးကြဲတိုက်ခိုက်ခံရတဲ့ ကျေးရွာတွေဟာ ရမ်းဗြဲ-ကျောက်ဖြူ လမ်းပိုင်းမှာ တည်ရှိပြီး စစ်အာဏာရှင်တပ်က လေကြောင်းတိုက်ခိုက်မှုတွေ ဆက်တိုက်ပြုလုပ်လာနေတာကြောင့် ဒေသခံ တွေ စိုးရိမ်နေကြတယ်လို့ သိရပါတယ်။

ဇွန် ၁ ရက် မနက်ပိုင်းကလည်း တောင်ကုတ်မြို့နယ်က ကင်းတောင်နဲ့ ဆားပြင်ကျေးရွာအနီးက တောင်တန်းတွေကို စစ်အာဏာရှင်တပ်က လေကြောင်းက လေယာဉ် ၆ စီးနဲ့ ဗုံးကြဲ တိုက်ခိုက် ခဲ့တယ်လို့ ဒေသခံတွေဆီက သိရပါတယ်။

စစ်အာဏာရှင်တပ်က ရခိုင်ပြည်က မြို့၊ ရွာတွေကို ဆက်တိုက် လေကြောင်းတိုက်ခိုက်မှုတွေ ပြုလုပ်လာနေတာကြောင့် ရခိုင်ပြည်နယ်မှာ အရပ်သား ထိခိုက်သေဆုံးမှုဟာ ဆက်တိုက် မြင့်တက် လာနေပါတယ်။