မြောက်ကိုရီးယားသို့ရှားပါးခရီးစဉ်အတွင်း တရုတ်သမ္မတရှီကျင့်ဖျင် ကင်ဂျုံအန်းအား မယိမ်းယိုင်သောထောက်ခံမှုပေးမည်ဟု ကတိပြု

တရုတ်နိုင်ငံပိုင်မီဒီယာများမှ ထုတ်လွှင့်ပြသသည့် ဗီဒီယိုမှတ်တမ်းများအရ တရုတ်ခေါင်းဆောင်သည် ကင်ဂျုံအွန်နှင့် ၎င်း၏ဇနီး ရီဆောလ်ဂျူးတို့၏ ကြိုဆိုမှု၊ ဂုဏ်ပြုတပ်ဖွဲ့၏ အလေးပြုမှုတို့ဖြင့် အနီရောင်ကော်ဇောခင်း ကြိုဆိုခြင်းကို ခံယူခဲ့ပြီး ကလေးငယ်များက ပန်းစည်းများဖြင့် ဂုဏ်ပြုပေးခဲ့ကြသည်။

နိုင်ငံတော်အခမ်းအနားများနှင့် စစ်ရေးပြအခမ်းအနားများ ကျင်းပရာ မြို့တော်ရှိ ကင်အီဆွန်းရင်ပြင်တွင် အမြောက် ၂၁ ချက် ပစ်ဖောက်ဂုဏ်ပြုခဲ့ကြောင်း၊ ခေါင်းဆောင်ကြီးများ၏ ဧရာမပုံတူပန်းချီကားများအောက်တွင် စုရုံးရောက်ရှိနေကြသည့် ပရိသတ်များက ကြွေးကြော်သံများ ဟစ်အော်ကာ မီးပုံးပျံများ လွှတ်တင်ခဲ့ကြကြောင်း ဆင်ဟွာသတင်းဌာနက ဖော်ပြသည်။

တရုတ်-မြောက်ကိုရီးယား ဆက်ဆံရေးသည် "သမိုင်းဝင် အစမှတ်သစ်" တစ်ခုသို့ ရောက်ရှိနေပြီဖြစ်ကြောင်း ရှီကျင့်ဖျင်က အစောပိုင်းတွင် ပြောကြားခဲ့ပြီး သံတမန်ရေး၊ တရားဥပဒေစိုးမိုးရေး၊ စစ်ရေးမှသည် စိုက်ပျိုးရေး၊ ကုန်သွယ်ရေး၊ နည်းပညာနှင့် ဆောက်လုပ်ရေးကဏ္ဍများအထိ ပိုမိုခိုင်မာသော ဖလှယ်မှုများ ပြုလုပ်ရန် တိုက်တွန်းခဲ့သည်။

"မဟာဗျူဟာမြောက် ပိုင်ဆိုင်မှု"

ရှီကျင့်ဖျင်သည် တနင်္လာနေ့က မြောက်ကိုရီးယားနိုင်ငံပိုင် မီဒီယာများတွင် ဖော်ပြခဲ့သည့် မှတ်ချက်များ၌ "ဒေသတွင်း လုံခြုံရေးနှင့် တည်ငြိမ်မှုကို အန္တရာယ်ဖြစ်စေသည့် စစ်ဝါဒကို ပြန်လည်အသက်သွင်းရန် ကြိုးပမ်းမှုများနှင့် ပူးပေါင်းကြံစည်မှုများ၊ အာဏာရှင်စနစ်နှင့် လွှမ်းမိုးလိုမှုတို့ကို ဆန့်ကျင်ရန်" ကင်ဂျုံအွန်အား တိုက်တွန်းထားသည်။

"ရှီ-ကင် ထိပ်သီးအစည်းအဝေးဟာ ပေကျင်းက ဖျုံယန်ကို မဟာဗျူဟာမြောက် ပိုင်ဆိုင်မှုတစ်ခုအဖြစ် ဆက်လက်ရှုမြင်နေဆဲဆိုတာကို သတိပေးလိုက်တာပဲ ဖြစ်ပါတယ်" ဟု Foundation for Defense of Democracies မှ တရုတ်ရေးရာ အကြီးတန်းသုတေသီ Craig Singleton က ပြောကြားသည်။

ရုရှားနှင့် အီရန်တို့နှင့်အတူ အိမ်နီးချင်းနိုင်ငံများသည် အမေရိကန်၏ အာဏာကို လျော့ပါးစေရန်နှင့် ၎င်း၏ မဟာမိတ်အဖွဲ့များကို ဖိအားပေးရန်အတွက် ဘုံအကျိုးစီးပွားများ ရှိနေကြသည်ဟု ၎င်းက ထပ်လောင်းပြောကြားသည်။

ရှီကျင့်ဖျင်သည် တရားမျှတပြီး စနစ်တကျရှိသော ဘက်ပေါင်းစုံ ပူးပေါင်းဆောင်ရွက်မှုနှင့် အားလုံးပါဝင်သော စီးပွားရေး ဂလိုဘယ်လိုက်ဇေးရှင်းကို မြှင့်တင်ရန် မြောက်ကိုရီးယားနှင့်အတူ လက်တွဲလုပ်ဆောင်သွားမည်ဟု ကတိပြုခဲ့ပြီး ရေရှည်ဒေသတွင်း ငြိမ်းချမ်းရေးနှင့် တည်ငြိမ်ရေးသည် ဘုံရည်မှန်းချက်ဖြစ်ကြောင်း ပြောကြားခဲ့သည်။

"သူ့ရဲ့ ဒီခရီးစဉ်ဟာ နောက်ဆုံးသွားရောက်ခဲ့တဲ့ ခရီးစဉ်နဲ့ မတူညီတဲ့ အခြေအနေတွေအောက်မှာ ဒီရိုးရာဓလေ့ကို ဆက်လက်ထိန်းသိမ်းထားဖို့ ရည်ရွယ်တာဖြစ်ပါတယ်" ဟု Asia Society မှ အကြီးတန်းသုတေသီ John Delury က X လူမှုကွန်ရက်တွင် ရေးသားဖော်ပြခဲ့သည်။