ဝင်းဝ စခန်းအနီး၌ တိုက်ပွဲ ပြင်းထန်ဖြစ်ပွား

YT (ဇွန် ၁၅)

မဇ္ဈိမ။ ။ တနင်္သာရီတိုင်း၊ သရက်ချောင်းမြို့နယ်၊ အမှတ် (၈) ပြည်ထောင်စုကားလမ်းမကြီးပေါ်ရှိ ဝင်းဝတပ်စခန်းအနီး၌ တိုက်ပွဲများ ပြင်းထန်ဖြစ်ပွားနေကြောင်း ဒေသခံများထံက သိရသည်။

ယနေ့ (ဇွန်လ ၁၅ ရက်) နံနက်အစောပိုင်းကစ၍ ဝင်းဝတပ်စခန်းဘက်မှ ထွက်လာသည့် စစ်အုပ်စုတပ်စစ်ကြောင်းနှင့် တော်လှန်ရေးအင်အားစု ပူးပေါင်းတပ်များအကြား မင်းဒပ်ရွာနှင့် သီကုန်းရွာအကြား၌ တိုက်ပွဲများဖြစ်ပွားနေခြင်းဟု သိရသည်။

“ စစ်တပ်က မင်းဒပ် ဝင်းဝစခန်းဘက်ကနေ ထွက်လာတာပါ။ အောက်ဖက်က ရွာတွေကတော့ ထွက်ပြေးတဲ့သူ ပြေးကုန်ပြီဗျ။ လက်နက်ကြီးသံတွေလည်း ဆက်တိုက်ပဲ။ နှစ်ဖက်ပစ်ခတ်တာ တော်တော်ကြမ်းနေပါတယ်” ဟု မင်းဒပ်ရွာခံတဦးက ယနေ့နံနက် ၉ နာရီခွဲခန့်က ပြောသည်။

တိုက်ပွဲသည် နံနက်ပိုင်း ၉ နာရီခွဲဝန်းကျင်က တကြိမ် ရပ်တန့်သွားခဲ့ပြီးနောက် ယနေ့ ညနေ ၅ နာရီဝန်းကျင်တွင် တကျော့ပြန်တိုက်ပွဲ ထပ်ဖြစ်ပွားနေကြောင်း သိရသည်။

တိုက်ပွဲများအတွင်း နှစ်ဖက် ထိခိုက်မှု အခြေအနေများအား မသိရသေးပါ။

ဝင်းဝတပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) နှင့် ပြည်သူ့ကာကွယ်ရေး ပူးပေါင်းတပ်များက ပြီးခဲ့သည့် မတ်လ ၁၁ ရက်နေ့က တိုက်ခိုက်သိမ်းပိုက်ခဲ့ပြီး ထိုစခန်းပြန်ရရေး စစ်အုပ်စုတပ်က မြေပြင်စစ်ကြောင်း၊ ပင်လယ်ပြင်ရှိ စစ်သင်္ဘော၏ လက်နက်ကြီးပစ်ကူနှင့် လေကြောင်းမှ Y-12၊ K8W တို့ဖြင့် နေ့ညမပြတ် ထိုးစစ်များဖြင့် မတ်လ ၃၁ ရက်နေ့တွင် ပြန်လည်ထိန်းချုပ်သွားခဲ့သည်။

ထို ဝင်းဝစခန်းသိမ်းတိုက်ပွဲအတွင်း မင်းဒပ်၊ ဂုံညင်းဆိပ် အပါအဝင် အနီးအနားကျေးရွာများမှ ဒေသခံများ စစ်ဘေးတိမ်းရှောင်ခဲ့ရသည်။

စာတည်း – သန့်ဇော်(သန်လျင်)