နန်းမယ်ခုံမြို့နယ် စစ်တပ်က ဒရုန်းဖြင့်ဗုံးကြဲတိုက်ခိုက် ကလေး (၂) ဦး သေဆုံး

ကရင်နီပြည်နယ် နန်းမယ်ခုံမြို့နယ်ရှိ ကျေးရွာတစ်ရွာအတွင်းရှိ စာသင်ကျောင်းကို စစ်ကော်မရှင်တပ်က ဒရုန်းဖြင့် ဗုံးကြဲတိုက်ခိုက်ခဲ့ရာ ကလေး (၂) ဦး သေဆုံးခဲ့ကြောင်း စုံစမ်းသိရသည်။

ယမန်နေ့ (ဇွန်လ ၂၄ ရက်) နေ့လည် ၁ နာရီဝန်းကျင်တွင် နန်းမယ်ခုံမြို့နယ် လီဝိုးကျေးရွာရှိ စာသင်ကျောင်းတခုကို စစ်ကော်ရှင်တပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် ကလေး နှစ် ဦး သေဆုံးခဲ့ကြောင်း သျှမ်း-ကရင်နီ တကြော စစ်ရှောင်ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။

“မနေ့က ဒရုန်းနဲ့ကြဲတာပါ။ကလေးနှစ်ယောက် ထိခိုက်သေဆုံးခဲ့တယ်။ကျောင်းကို ဒရုန်းနဲ့ တောက်လျှောက် ကြဲခဲ့တာပါ။” ဟု သျှမ်း-ကရင်နီ တကြော စစ်ရှောင်ကူညီပေးနေသည့် အမျိုးသားတစ်ဦးက ပြောသည်။

အဆိုပါ ဒရုန်းဗုံးကြဲတိုက်ခိုက်မှုကြောင့် ကလေးငယ်တစ်ဦးသည့် ပွဲချင်းပြီးသေဆုံးခဲ့ပြီး ကျန်ကလေးငယ်တစ်ဦးသည် ဆေးကုသမှုခံယူရန် ပို့ဆောင်စဉ် သေဆုံးခဲ့ကြောင်းသိရသည်။

ထိုသေဆုံးခဲ့သည့် ကလေးနှစ်ဦသည် အသက် ၁၀ နှစ် ဝန်းကျင် ကလေးငယ်တစ်ဦး နှင့် ၆ နှစ်အရွယ်ရှိ ကလေး တစ်ဦး ဖြစ်ကြောင်းသိရသည်။

စစ်ကော်မရှင်တပ်က မိုးဗြဲမြို့နယ်မှတဆင့် တိုက်ပွဲဖြစ်ပွားခြင်းမရှိသည့် နန်းမယ်ခုံမြို့နယ်ဘက်ကို လက်နက်ကြီးပစ်ခြင်း၊ ဒရုန်းဖြင့် ဗုံးကြဲတိုက်ခိုက်ခြင်းကို မကြာခဏပြုလုပ်လေ့ရှိကြောင်း သိရသည်။

အလားတူယမန်နေ့ (ဇွန်လ ၂၄ ရက်) ည ၁၀ နာရီဝန်းကျင်တွင် ဒီးမော့ဆိုအနောက်ခြမ်း လွိုင်နန်းဖမြို့နယ်အတွင်း ကျေးရွာတစ်ခုကို စစ်ကော်မရှင်က လေကြောင်း ဗုံးကြဲခိုက်ခဲ့ကြောင်း သိရသည်။