အစ္စရေးဝန်ကြီးချုပ်နေတန်ယာဟုနှင့် ပြောဆိုရာတွင် ရိုင်းစိုင်းသောစကားလုံးများ သုံးစွဲခဲ့ကြောင်း ထရမ့်အတည်ပြု

ဝါရှင်တန် - အမေရိကန်သမ္မတ ဒေါ်နယ်ထရမ့်သည် အစ္စရေးဝန်ကြီးချုပ် ဘင်ဂျမင်နေတန်ယာဟုနှင့် တင်းမာသော စကားပြောဆိုမှုတစ်ခု ဖြစ်ပွားခဲ့ကြောင်း အတည်ပြုပြောကြားလိုက်သည်။ အဆိုပါဖြစ်စဉ်တွင် ၎င်း၏ ရင်းနှီးသောမဟာမိတ်ဖြစ်သူအား ထရမ့်က ဆဲဆိုကြိမ်းမောင်းခဲ့ကြောင်း သတင်းများထွက်ပေါ်နေသည်။

ဗုဒ္ဓဟူးနေ့ (ဇွန်လ ၃ ရက်) က New York Post တွင် ဖော်ပြခဲ့သော အင်တာဗျူးတစ်ခု၌ တနင်္လာနေ့က နေတန်ယာဟုနှင့် ဖုန်းဖြင့်ပြောဆိုခဲ့သည့် အကြောင်းအရာနှင့် ပတ်သက်၍ ထရမ့်အား မေးမြန်းခဲ့သည်။

"ခင်ဗျားက 'မင်း အရူးဖြစ်နေတာလား။ မင်း ဘာတွေလုပ်နေတာလဲ။ မင်းထောင်မကျအောင် ငါကူညီပေးခဲ့တာလေ' လို့ ပြောခဲ့တယ်ဆိုတာ ဟုတ်ပါသလား။ ခင်ဗျား အဲဒီလိုစကားလုံးတွေနဲ့ သူ့ကို ပြောခဲ့တာလား" ဟု အင်တာဗျူးသူက မေးမြန်းခဲ့သည်။

"ဟုတ်တယ်၊ ကျွန်တော် ပြောခဲ့တာပါ" ဟု ထရမ့်က ပြန်လည်ဖြေကြားခဲ့သည်။ "လက်ဘနွန်နဲ့ အမြဲတမ်း တိုက်ခိုက်နေတဲ့ သူ့ရဲ့လုပ်ရပ်အပေါ် ကျွန်တော် နည်းနည်း စိတ်အနှောင့်အယှက် ဖြစ်မိတယ်"

"ကျွန်တော်က 'ဘီဘီ (Bibi)၊ ငါတို့ ဒါကို ရပ်တန့်ရမယ်' လို့ ပြောခဲ့တာပါ"

ထရမ့်က ဆက်လက်၍ နေတန်ယာဟုနှင့် "အလွန်ကောင်းမွန်သော ဆက်ဆံရေး" ရှိကြောင်း ပြောကြားခဲ့သည်။ "ကျွန်တော်တို့ အတူတကွ ကောင်းကောင်း လုပ်ဆောင်နိုင်ခဲ့ပါတယ်... ကျွန်တော် ဘီဘီကို အများကြီး သဘောကျပါတယ်"

အစ္စရေးအနေဖြင့် လက်ဘနွန်မြို့တော် ဘေရွတ်ကို ဗုံးကြဲတိုက်ခိုက်မည်ဟု ခြိမ်းခြောက်မှုများအပေါ် ထရမ့်က ယခုကဲ့သို့ ဆဲဆိုကြိမ်းမောင်းခဲ့ခြင်းဖြစ်ကြောင်း Axios သတင်းဌာနနှင့် ABC News တို့က ဖော်ပြခဲ့သည်။ အဆိုပါလုပ်ရပ်သည် အရှေ့အလယ်ပိုင်းစစ်ပွဲကို အဆုံးသတ်ရန် တီဟီရန်နှင့် ဆွေးနွေးနေမှုများကို ထိခိုက်စေမည်ကို ထရမ့်က စိုးရိမ်နေခြင်းဖြစ်သည်။